Marko 1 - Rapa Nui

He haka riva-riva iŋa i te ara mo te ⌊Kiritō⌋

¹ Te ⌊roŋo riva-riva o ruŋa i a Ietū⌋ he ⌊Kiritō⌋, Poki o te ꞌAtua, i haꞌamata ai

² pe he meꞌe haka ꞌite e te perofeta era ko ꞌItaia ꞌi ruŋa i tāꞌana puka ꞌi te vānaŋa kī e te ꞌAtua ki tāꞌana Poki: «ꞌĪ a au he uŋa i tāꞌaku taŋata maꞌuroŋo ꞌi raꞌe ki a koe mo haka riva-riva i te ara mōꞌou.

³ Tōꞌona reꞌo e ŋaroꞌa rō ꞌi te kona ꞌone taꞌe noho taŋata: “¡Ka haka riva-riva te ara mo te Kiritō; ka mātaki e tahi ara tī-tika!”».

⁴ Pē ira i tuꞌu i tātara ai a Iovani Papatito ꞌi te kona ꞌone taꞌe noho taŋata. Tāꞌana tātara: e ⌊papatito⌋ te taŋata mo takeꞌa ko ⌊huri ꞌana te rāua manaꞌu ki te ꞌAtua⌋, pē ira he haka kore e te ꞌAtua i te rāua hara.

⁵ E rahi rō ꞌā te taŋata e oho era mai Hērutarema ꞌe mai te kona taꞌatoꞌa o Hūrea haka roŋo i tāꞌana vānaŋa. Te nuꞌu pinitinia i te rāua hara i papatito tahi rō e Iovani ꞌi roto i te rio ko Horotana.

⁶ Te kahu uru o Iovani i aŋa ai hai huru-huru kameio ꞌe hai pena kiri e here era. Hai manu tuꞌu pa he pereteꞌi ꞌe hai meri ravaꞌa o rā kona e kai era.

⁷ ꞌI roto i tāꞌana tātara e kī takoꞌa rō ꞌā: «ꞌI tuꞌa ōꞌoku ka oho mai ena te kope ꞌata hau ꞌi te pūai ki a au; ꞌātā e ko tano a au mo kume i te hau o tōꞌona kirivaꞌe.

⁸ A au e papatito atu ena hai vai; ꞌe, a ia ka papatito ena i a kōrua hai ⌊Vārua Maitai⌋».

He papatito iŋa i a Ietū

⁹ ꞌI te mahana e tahi he eꞌa a Ietū mai Nātāreta, he kona o Karirea, he oho ki tū rio era ko Horotana ꞌe he papatito e Iovani.

¹⁰ I eꞌa era a Ietū mai roto i te vai, he takeꞌa ko ha-hata ꞌā te raŋi ꞌe mai ruŋa i topa ai te Vārua Maitai ki ruŋa i a ia tuꞌu pa he pāroma.

¹¹ He ŋaroꞌa i te reꞌo mai te raŋi ka kī: «A koe he Poki ꞌāꞌaku, Poki haŋa rahi; ꞌi ruŋa i a koe tōꞌoku koa».

He haka ꞌatu iŋa i a Ietū

¹² I oti era rā ŋā meꞌe, he maꞌu e te Vārua Maitai i a Ietū ki roto atu era o tū kona ꞌone taꞌe noho taŋata era.

¹³ E maha ꞌahuru mahana i noho ai ꞌi ira, ꞌe he haka ꞌatu e Rukifero mo hara o Ietū; ꞌi muri i te manuꞌino e noho era ꞌe o te merahi te hāpaꞌo i a ia.

He haꞌamata iŋa o Ietū i tāꞌana aŋa

¹⁴ I puru era ꞌi roto i te hare maꞌuꞌaurī e ⌊ꞌErore⌋ i a Iovani, he hoki a Ietū ki Karirea he haꞌamata he haka ꞌite i te ⌊roŋo riva-riva o te ꞌAtua⌋.

¹⁵ Pē nei e kī era: «Nā ko hāhine mai ꞌā te ⌊haka tere iŋa ꞌāpī o te ꞌAtua⌋; ko tano ꞌana, paꞌi, te hora kī era mo tuꞌu mai. ꞌO ira, ka huri te kōrua manaꞌu ki a ia, ka haka tapa mai roto i te hara, ꞌe ꞌai ka haka moe rō te kōrua manaꞌu ꞌi ruŋa i te roŋo riva-riva o te ꞌAtua, ki oꞌo ai a kōrua ki roto i te haka tere iŋa ꞌāpī ōꞌona».

Ko Ietū ꞌe he ŋāŋata hī ika

¹⁶ E haꞌere e oho nō ꞌā a Ietū a te taha-taha o te vai ko Karirea, he takeꞌa e rua kope hī ika ko Tīmona ꞌe he taina ōꞌona ko Antarea, e tuku ꞌā.

¹⁷ He kī e Ietū: «Ka oho mai kōrua mo nuꞌu hāpī ꞌāꞌaku. ꞌĪ a au he haka riro i a kōrua he nuꞌu hī taŋata mo te ꞌAtua».

¹⁸ ꞌI tū hora ꞌā i haka rē ai i te rāua kūpeŋa ꞌe he eꞌa he oho ꞌi muri i a Ietū.

¹⁹ Pe muꞌa ꞌiti he takeꞌa i a ⌊Tanatiako⌋ ararua ko tōꞌona taina ko ⌊Iovani⌋, he ŋā poki ꞌa Tevereo, ꞌi ruŋa i te rāua vaka e haka riva-riva ꞌana i te kūpeŋa.

²⁰ He kī e Ietū ki tū ŋā kope era mo oho ꞌi muri i a ia. ꞌI tū hora ꞌā he eꞌa ararua mai muri i te rāua matuꞌa tane ꞌe nuꞌu aŋa o rāua, ꞌe he oho ꞌi muri i a Ietū.

He taŋata uru e te tātane

²¹ He oho ia a Ietū ananake ko tū nuꞌu era ki Kaperenāū. I tano era te ⌊mahana haka ora⌋, he uru a Ietū ki roto i te ⌊hare pure hūrio⌋ he hāpī i te taŋata.

²² I ŋaroꞌa era i a Ietū, he māere tahi ꞌi te pūai o te hāpī iŋa; e hāpī era pa he taŋata i a ia te parau o te meꞌe taꞌatoꞌa ꞌe taꞌe pa he hāpī iŋa o te ⌊maꞌori o te haka tere hūrio⌋.

²³ E hāpī nō ꞌā a Ietū, he oꞌo e tahi taŋata ko uru ꞌā e te tātane, he ohu:

²⁴ —¿He aha taꞌa meꞌe haŋa i a mātou, e Ietū o Nātāreta ē? ¿E oho mai ꞌana koe mo haka kore i a mātou? Ko ꞌite ꞌana a au ko ai koe: he kope moꞌa uŋa mai e te ꞌAtua.

²⁵ He kī e Ietū ki tū tātane era: —¡Ka mou ꞌe ka eꞌa koe mai roto i te taŋata ena!

²⁶ He haka kiki-kiki i rā taŋata, ꞌai ka eꞌa mai roto koia ko ki-kiu.

²⁷ He riꞌa-riꞌa te nuꞌu taꞌatoꞌa koia ko ꞌui ki a rāua ꞌā: «¿He aha nei? ¡Te huru o tōꞌona hāpī iŋa huru ꞌāpī! ¡Te pūai ꞌātā he haꞌatura e te tātane!».

²⁸ ꞌE kai roa te parau ꞌāpī o ruŋa i a Ietū i tuꞌu ai ki te kona taꞌatoꞌa o Karirea.

He haka ora iŋa o Ietū i te huŋavai o Tīmona

²⁹ I eꞌa era a kuā Ietū mai roto i te hare pure, he oho koia ko Tanatiako ꞌe ko Iovani ki te hare o Tīmona ꞌe o Antarea. I tuꞌu era he uru ananake.

³⁰ Te māmā huŋavai o Tīmona e moe rō ꞌana ꞌi ruŋa i te roꞌi, e vera pūai rō ꞌā te hakari ꞌi te māui-ui. He haka ꞌite ki a Ietū.

³¹ He haka hāhine a Ietū ki tū viꞌe era, he ꞌa-ꞌaru a te rima ꞌe he haka eꞌa ki ruŋa. ꞌI tū hora ꞌā he ora rō ꞌai te māui-ui, ꞌe he haꞌamata rā viꞌe he vaꞌai hai kai mo kuā Ietū.

He haka ora iŋa o Ietū meꞌe rahi nuꞌu māui-ui

³² I ahi-ahi pō era, he maꞌu ki a Ietū i te nuꞌu māui-ui taꞌatoꞌa o ira ꞌe i te nuꞌu oꞌo e te tātane.

³³ Pē ira i taka-taka ai te nuꞌu taꞌatoꞌa o rā kona ꞌi haho o te hare.

³⁴ Rauhuru māui-ui i haka ora ꞌe meꞌe rahi tātane i haka eꞌa mai roto i te taŋata, ꞌe ꞌina he haꞌatiꞌa e Ietū mo vānaŋa o rā ŋā tātane ꞌo te ꞌite ko ai a ia.

He haka ꞌite iŋa o Ietū i te roŋo o te ꞌAtua

³⁵ ꞌI te rua mahana, e pōꞌuri nō ꞌā, he eꞌa a Ietū mai Kaperenāū he oho he pure ꞌi te kona ꞌina he taŋata.

³⁶ He eꞌa a kuā Pētero he kimi.

³⁷ I ravaꞌa era he kī: —Nā te nuꞌu taꞌatoꞌa e kimi ꞌā i a koe.

³⁸ He kī ia e Ietū: —Mai tātou ki oho hai kona taŋata hāhine mai ki haka ꞌite a au i te roŋo o te ꞌAtua ꞌi rā ŋā kona takoꞌa. Mo ira, paꞌi, a au i oho mai ai.

³⁹ ꞌI roto i te hare pure hūrio o te kona taꞌatoꞌa o Karirea e haka ꞌite era a Ietū i te roŋo, ꞌe, takoꞌa, e haka eꞌa era i te tātane mai roto i te taŋata.

He haka ora iŋa o Ietū i te taŋata rēpera e tahi

⁴⁰ ꞌI te mahana e tahi he haka hāhine ki a Ietū te taŋata māui-ui ꞌi te rēpera, he noi he tū-turi ꞌai ka kī: —Mo haŋa ōꞌou, i a koe te ora o tōꞌoku māui-ui.

⁴¹ He haka ꞌaroha a Ietū i tū taŋata era; he haka puā hai rima he kī: —Ko haŋa ꞌana a au.

⁴² ꞌI tū hora ꞌā he kore te māui-ui ꞌe he ora rō ꞌai.

⁴³ I meꞌe era he haka oho e Ietū ꞌai ka kī:

⁴⁴ —ꞌIna koe ko ꞌaꞌamu e tahi nuꞌu. Ka oho ka haka takeꞌa i a koe ki te ⌊oromatuꞌa⌋. E maꞌu te meꞌe mo tūtia haka ꞌite mai e ⌊Mōtē⌋ mo tuꞌu ⌊haka maꞌitaki⌋ mo ꞌite e te oromatuꞌa ꞌe pē ira takoꞌa ꞌā e te taŋata ko ora ꞌana tuꞌu māui-ui.

⁴⁵ Kai mou rā kope; i ꞌaꞌamu nō ki te taꞌatoꞌa. ꞌO ira ꞌina he tano haka ꞌou a Ietū mo tuꞌu ki te kona nūnaꞌa hare e ꞌite rō ꞌana e te nuꞌu ꞌo putu-putu ꞌi muri. Te aŋa ia ꞌa Ietū he noho a te kona ꞌina he rahi e te taŋata. ꞌE, ka ai atu pē ira, ko te tuꞌu iŋa ꞌā ki a ia te nuꞌu mai te kona taꞌatoꞌa.