Iovani 8 - Rapa Nui

He viꞌe taiꞌata e tahi

¹ He eꞌa a Ietū he iri ki ruŋa i te Maꞌuŋa o te ꞌŌrivo.

² ꞌI te rua mahana ꞌi te pō era ꞌā, he hoki ki te Kona Haꞌamuri ꞌAtua. He haka hāhine ia te taŋata, ꞌe he noho a Ietū he hāpī.

³ Te nuꞌu ⌊maꞌori o te haka tere hūrio⌋ ꞌe te ⌊fariseo⌋ he maꞌu i te viꞌe e tahi ko maꞌurima ꞌā e taiꞌata ꞌana. He haka māroa ꞌi vāeŋa o te taꞌatoꞌa,

⁴ ꞌe he kī ki a Ietū: —E te Maꞌori, te viꞌe nei ko maꞌurima ꞌana e mātou e taiꞌata ꞌā.

⁵ ꞌI ruŋa i te ⌊haka tere iŋa ꞌa Mōtē⌋ e hāꞌaki ena: e tamaꞌi hai māꞌea ki te mate i te ŋā viꞌe tuꞌu pē nei. ¿Pē hē ki taꞌa kī?

⁶ I ꞌui ai i te meꞌe nei mo uꞌi pē hē a Ietū ka pāhono era, pē ira a rāua ana ravaꞌa i te rāveꞌa mo aŋa i te ture mōꞌona. Kai pāhono a Ietū; he noi he pāpaꞌi hai maŋa-maŋa rima ꞌi ruŋa i te ꞌōꞌone.

⁷ ꞌE, ꞌi te rava ꞌui nō e tū nuꞌu era, he eꞌa te ꞌāriŋa a ruŋa he kī: —Mo ai e tahi taŋata o roto i a kōrua ꞌina he hara, ka tau e ia i te māꞌea raꞌe.

⁸ ꞌE he noi he pāpaꞌi haka ꞌou ꞌi ruŋa i te ꞌōꞌone.

⁹ I ŋaroꞌa era i rā meꞌe e tū nuꞌu era, he haꞌamata he maraŋa he oho, te nuꞌu raꞌe i oho he nuꞌu ꞌata paꞌari. I topa era ararua ko rā viꞌe

¹⁰ he eꞌa haka ꞌou te ꞌāriŋa o Ietū a ruŋa he ꞌui: —Ē, ¿hē tū nuꞌu era? ¿ꞌIna e tahi o rāua i haka ūtuꞌa atu i a koe?

¹¹ He pāhono e tū viꞌe era: —ꞌIna. He kī e Ietū: —ꞌIna takoꞌa a au e ko haka ūtuꞌa atu. Ka eꞌa koe ka oho, ꞌe ꞌina ko hara haka ꞌou.]

A Ietū he mōrī o te ao

¹² Ko roa atu ꞌā te hora he vānaŋa haka ꞌou a Ietū ki te taŋata, he kī pē nei ē: —A au he mōrī haka māꞌeha i te manaꞌu o te taŋata o te ao; te kope oho mai ki a au e ko oho a roto i te pōhāhā. He ai i a ia te mōrī vaꞌai i te ora ꞌāpī ꞌina he hopeꞌa raꞌa.

¹³ He kī e te fariseo: —Ko koe nō te kope vānaŋa riva-riva o ruŋa i a koe, ꞌo ira ꞌina e tahi hauhaꞌa o taꞌa vānaŋa ena.

¹⁴ He pāhono e Ietū: —Ka ai atu māꞌaku mau ꞌā e kī i te vānaŋa riva-riva o ruŋa i a au, e hauhaꞌa rō ꞌana ꞌo te ai ko ꞌite ꞌana a au mai hē a au i oho mai ai ꞌe ki hē a au ka oho nei, he meꞌe kai ꞌite e kōrua.

¹⁵ Hai manaꞌu taŋata a kōrua e kī ena i te tano ꞌe i te taꞌe tano ōꞌoku. ꞌE a au, ꞌina he kī i te tano ꞌe i te taꞌe tano o te taŋata.

¹⁶ ꞌE, mo kī tāꞌue ōꞌoku, he parautiꞌa mau ꞌā ꞌo te ai taꞌe hoko tahi nō a au ka kī era, ararua māua ko tōꞌoku Matuꞌa uŋa mai era i a au.

¹⁷ ꞌI te haka tere iŋa o kōrua e hāꞌaki rō ꞌā: mo ai hoko rua mataꞌite kī i tū vānaŋa ꞌana, e hauhaꞌa rō ꞌana te rāua meꞌe kī.

¹⁸ Iā, ko au mau ꞌana ia tōꞌoku mataꞌite, ꞌe he Matuꞌa uŋa mai i a au tōꞌoku rua mataꞌite.

¹⁹ He ꞌui ia e rā nuꞌu: —¿ꞌI hē tuꞌu matuꞌa? He pāhono e Ietū: —A kōrua ꞌina kai ꞌite ko ai a au, ꞌe ko ai tōꞌoku Matuꞌa. ꞌĀhani e ꞌite rō ꞌana e kōrua ko ai a au, ko ꞌite takoꞌa ꞌana ko ai tōꞌoku Matuꞌa.

²⁰ Te meꞌe nei i kī ai e Ietū ꞌi te hora hāpī ꞌi te Kona Haꞌamuri ꞌAtua, hāhine ki te ꞌavahata haka rē moni. ꞌE, ꞌina e tahi nuꞌu i ꞌa-ꞌaru i a Ietū ꞌi te meꞌe era kai tano ꞌā tōꞌona hora.

He taꞌe aŋi-aŋi iŋa i te vānaŋa ꞌa Ietū

²¹ He kī haka ꞌou e Ietū: —E ko roa a au ka oho rō nei ꞌe he kimi mai kōrua i a au. ꞌE, a kōrua e ko tuꞌu atu ki te kona nei ōꞌoku ka oho nei ꞌo te ai e ko haka kore hia e te ꞌAtua i te kōrua hara ka mā-mate rō ena.

²² He kī e te hūrio ra-rahi: —¿E manaꞌu ꞌana ꞌō pēaha te kope era mo tiŋaꞌi i a ia, ꞌo ira e kī mai ena e ko tuꞌu tātou ki te kona ena ōꞌona ka oho ena?

²³ He kī e Ietū: —O raro nei a kōrua, ꞌe o ruŋa era a au; o te ao nei a kōrua; ꞌe taꞌe a au o te ao nei.

²⁴ Te tumu o tāꞌaku vānaŋa era: “he mā-mate kōrua e ko haka kore hia e te ꞌAtua i te kōrua hara” ko te meꞌe nei: mo taꞌe ai he parautiꞌa mau ꞌā mo kōrua pē nei ē: a au he kope nei e au e kī atu ena, he mā-mate kōrua ꞌi te kōrua hara.

²⁵ He ꞌui e rā nuꞌu: —¿Ko ai ia koe? He pāhono e Ietū: —A au ko tū kope kī mau atu era ꞌā e au mai te hora haꞌamata hāpī i te taŋata ki te hora nei.

²⁶ E rahi rō ꞌā te meꞌe mo kī atu ōꞌoku o ruŋa i a kōrua, mo ture ꞌe mo haka ūtuꞌa. Ka ai atu pē ira, tāꞌaku meꞌe kī nō ki te taŋata o te ao he meꞌe kī mai e te kope uŋa mai i a au. He parautiꞌa mau nō, paꞌi, tāꞌana meꞌe kī.

²⁷ ꞌE, ꞌina e rā nuꞌu he aŋi-aŋi pē nei ē: te kope era e kī era e Ietū he ꞌAtua Matuꞌa.

²⁸ ꞌO ira i kī ai e Ietū: —Hora ena o kōrua ka veo ena i te ⌊Poki o te taŋata⌋ ꞌi ruŋa i te tātaurō, ka ꞌite iho ena e kōrua: a au ko tū kope kī mau atu era ꞌā e au, tāꞌaku meꞌe aŋa taꞌe hai manaꞌu ōꞌoku, ꞌe tāꞌaku meꞌe kī mau nō he meꞌe hāpī mai e tōꞌoku Matuꞌa.

²⁹ Ararua māua ko te kope uŋa mai i a au; ꞌina a ia he haka rē i a au hoko tahi nō ꞌo te ai te meꞌe aŋa mau nō ꞌāꞌaku he meꞌe haŋa ꞌāꞌana.

³⁰ I kī era a Ietū i te meꞌe nei, i rahi rō te nuꞌu i haka moe i te rāua manaꞌu ꞌi ruŋa i a ia.

He ŋā poki o te ꞌAtua ꞌe he ꞌekaravo o te hara

³¹ He kī e Ietū ki te hūrio ⌊haka moe i te manaꞌu⌋ ꞌi ruŋa i a ia: —Mo haka roŋo ꞌe mo haꞌatura mo oho nō kōrua ki tāꞌaku vānaŋa, he nuꞌu hāpī mau ꞌana ia kōrua ꞌāꞌaku;

³² he ꞌite kōrua i te parautiꞌa, ꞌe hai nā parautiꞌa he eꞌa kōrua mai te rima o te meꞌe haka ꞌekaravo atu i a kōrua.

³³ He pāhono e rā nuꞌu: —A mātou he hakaara o ⌊ꞌAparahama⌋, ꞌe ꞌina mātou kai ai ꞌā he ꞌekaravo. ¿Pē hē ia koe e kī mai ena he eꞌa a mātou mai te rima o te kope haka ꞌekaravo i a mātou?

³⁴ He kī e Ietū: —ꞌĪ a au he kī atu: te taŋata hara oho nō he ꞌekaravo o te hara.

³⁵ Te ꞌekaravo o te huaꞌai e tahi e ko noho mau rō ꞌai ananake ko rā huaꞌai. Te ŋā poki o rā huaꞌai taꞌe pē ira; a rāua, paꞌi, he noho mau rō ꞌai ꞌi roto i rā huaꞌai.

³⁶ Mo haka eꞌa i a kōrua e te Poki o te ꞌAtua mai te rima o te meꞌe haka ꞌekaravo i a kōrua, he eꞌa mau rō ꞌai.

³⁷ »Ko ꞌite ꞌana a au he hakaara kōrua o ꞌAparahama ꞌe ko ꞌite takoꞌa ꞌana e haŋa rō ꞌana kōrua mo tiŋaꞌi i a au, he taꞌe haŋa o kōrua ki tāꞌaku vānaŋa haka ꞌite atu.

³⁸ A au e vānaŋa nei hai meꞌe i haka ꞌite ꞌe i haka takeꞌa mai e tōꞌoku Matuꞌa. A kōrua takoꞌa e aŋa ena i te meꞌe i takeꞌa ꞌe i ŋaroꞌa mai te kōrua matuꞌa.

³⁹ He kī e rā nuꞌu: —¡Te mātou matuꞌa ko ꞌAparahama! He pāhono e Ietū: —ꞌĀhani kōrua he ŋā poki mau ꞌā ꞌa ꞌAparahama, te kōrua meꞌe aŋa he meꞌe aŋa e ia.

⁴⁰ Ka ai atu ko kī atu ꞌana a au i te parautiꞌa hāpī mai e te ꞌAtua, e haŋa nō ꞌana a kōrua mo tiŋaꞌi i a au. ¡A ꞌAparahama kai aŋa i te meꞌe pē nā!

⁴¹ Te meꞌe aŋa o kōrua pa he meꞌe aŋa e te kōrua matuꞌa. He kī e rā nuꞌu: —¡Taꞌe a mātou he mōrore; e tahi nō mātou Matuꞌa, he ꞌAtua!

⁴² He pāhono e Ietū: —Mo ai he parautiꞌa mau ꞌā he ꞌAtua te kōrua matuꞌa, e haŋa rō mai ꞌana ia kōrua ki a au; mai te ꞌAtua mau nō, paꞌi, a au i oho mai ai. I oho mai ai a au taꞌe hai manaꞌu ōꞌoku ꞌā, o te ꞌAtua a au i uŋa mai.

⁴³ »¿He aha kōrua e taꞌe aŋi-aŋi ena i tāꞌaku meꞌe haka ꞌite atu? He taꞌe tano o kōrua mo haka roŋo mai.

⁴⁴ Te kōrua matuꞌa ko Rukifero; ꞌāꞌana kōrua, ꞌe te kōrua meꞌe haŋa mo aŋa he meꞌe haŋa ꞌāꞌana. A ia he taparahi-taꞌata tiŋaꞌi i te taŋata mai muꞌa ꞌā. ꞌIna he noho ꞌi roto i te parautiꞌa, ꞌe ꞌina e tahi parautiꞌa kī. E reo-reo ena, e vānaŋa ꞌā i tāꞌana meꞌe i ꞌite. A ia he reo-reo ꞌe he matuꞌa o te reo-reo.

⁴⁵ »A kōrua e taꞌe haka roŋo mai ena he kī ōꞌoku i te parautiꞌa.

⁴⁶ ¿Ko ai o roto i a kōrua mo haka takeꞌa mai e hara rō ꞌana a au? Mo ai he parautiꞌa tāꞌaku meꞌe kī, ¿he aha ia kōrua e taꞌe haka roŋo mai ena?

⁴⁷ Te ŋā poki o te ꞌAtua e haka roŋo rō ꞌana ki te vānaŋa o te ꞌAtua. ꞌE, ꞌi te meꞌe era taꞌe a kōrua o te ꞌAtua, ꞌina he haka roŋo mai.

Te Kiritō ko ai era ꞌana ki a ꞌAparahama

⁴⁸ He kī ia e te hūrio ra-rahi: —¿Ko takeꞌa ꞌā? He aŋi mau ꞌā te mātou meꞌe kī: o ⌊Tāmāria⌋ koe ꞌe ꞌi roto i a koe te tātane.

⁴⁹ He pāhono e Ietū: —ꞌIna e tahi tātane o roto i a au. He moꞌa mau nō tāꞌaku aŋa i tōꞌoku Matuꞌa, ꞌe te aŋa o kōrua he vānaŋa taꞌe tano nō mōꞌoku.

⁵⁰ ꞌIna a au he kimi mo haka nui-nui i a au e te taŋata. Ka ai atu pē ira, e ai rō ꞌana te kope haŋa ki rā meꞌe mōꞌoku, ꞌe ꞌāꞌana te kī i te meꞌe tano ꞌe i te meꞌe taꞌe tano o te taŋata.

⁵¹ ꞌĪ a au he kī atu: te kope haka roŋo i tāꞌaku vānaŋa e ko mate ki te hora hopeꞌa.

⁵² He pāhono e te hūrio: —Ko tano mau ꞌā te manaꞌu o mātou: nā ꞌi roto i a koe te tātane. A ꞌAparahama, paꞌi, ananake ko te perofeta taꞌatoꞌa ko mā-mate tahi ꞌana, ꞌe, ¿nā koe e kī ꞌā te kope haka roŋo i taꞌa vānaŋa, ꞌina e ko mate?

⁵³ ¿ꞌAta hau ꞌō koe ki te mātou matuꞌa ko ꞌAparahama? A ia, paꞌi, ko mate ꞌana; pē ira takoꞌa ꞌana te perofeta. ¿Ko ai ia koe e kī ena i te meꞌe tuꞌu pē nā?

⁵⁴ He pāhono e Ietū: —Mo haka nui-nui ōꞌoku i a au mau ꞌā, ꞌina e tahi hauhaꞌa. ꞌE te kope haka nui-nui i a au he Matuꞌa ōꞌoku, he kope kī e kōrua he ꞌAtua o kōrua.

⁵⁵ ꞌE, ꞌina kai māhani a kōrua i a ia. Ko au te meꞌe i māhani. Mo kī atu ōꞌoku kai māhani a au i a ia, pē kōrua ꞌā tōꞌoku reo-reo. Te parautiꞌa, paꞌi, ko māhani ꞌana e au i a ia; e haka roŋo ꞌe e haꞌatura rō ꞌana a au ki tāꞌana vānaŋa.

⁵⁶ Te tupuna era o kōrua ko ꞌAparahama ko ꞌite ꞌā e uŋa rō mai i a au ki te ao nei ꞌe e tiaki era ki rā mahana hai koa.

⁵⁷ He kī e te hūrio ki a Ietū: —Kai tano ꞌā tuꞌu pae ꞌahuru matahiti, ꞌe, ¿nā koe e kī mai ena ko takeꞌa ꞌana e koe a ꞌAparahama?

⁵⁸ He pāhono e Ietū: —ꞌĪ a au he kī atu i te parautiꞌa: ko ai era ꞌana a au i poreko mai ai a ꞌAparahama.

⁵⁹ He toꞌo ia e rā nuꞌu i te māꞌea mo tamaꞌi ki a Ietū. ꞌE, kai takeꞌa ia e rā nuꞌu i eꞌa i oho rō ai mai te Kona Haꞌamuri ꞌAtua.