Iovani 7 - Rapa Nui

He haka meꞌe-meꞌe i a Ietū

¹ I oti era he oho a Ietū ki kona era ki kona era o Karirea. Kai haŋa mo oho ki Hūrea ꞌi te meꞌe era te nuꞌu ⌊hūrio⌋ ra-rahi o ira e haŋa ꞌā mo tiŋaꞌi i a ia.

² ꞌE, ꞌi te meꞌe ko hāhine ꞌā te ⌊ŋoŋoro o te rāmā⌋,

³ he kī e tōꞌona ŋā poki taina: —ꞌIna koe ko noho mai ꞌi nei. Ka eꞌa koe ka oho ki Hūrea mo takeꞌa takoꞌa e te nuꞌu o ira haka moe i te manaꞌu ꞌi ruŋa i a koe i taꞌa meꞌe aŋa.

⁴ Te kope haŋa mo ꞌite e te nuꞌu o ruŋa i a ia ꞌina he naꞌa i tāꞌana meꞌe aŋa. ꞌO ira, ka oho koe ka aŋa taꞌa meꞌe ena koe e aŋa ena ꞌi muꞌa o te taŋata taꞌatoꞌa.

⁵ Te ŋā kope nei, ka ai atu he taina o Ietū, ꞌina he haka moe i te rāua manaꞌu ꞌi ruŋa.

⁶ He kī e Ietū: —Kai tano ꞌā tōꞌoku hora mo oho, ꞌe mo kōrua taꞌatoꞌa nō hora e tano rō ꞌā.

⁷ Te taŋata o te ao nei ꞌina he riri mo kōrua; mōꞌoku e riri ena ꞌo te haka takeꞌa e au: te rāua meꞌe aŋa meꞌe taꞌe tano.

⁸ Ka oho nō kōrua ki te ŋoŋoro. ꞌIna a au e ko oho vave atu; kai tano ꞌana tōꞌoku hora.

⁹ Pē ira a Ietū i kī ai ꞌe he noho ꞌi Karirea.

A Ietū ꞌi te ŋoŋoro o te rāmā

¹⁰ Ko oho atu ꞌā tū ŋā taina era i oho iho ai a Ietū hoko tahi nō ꞌo ꞌite e te taŋata.

¹¹ Te nuꞌu hūrio ra-rahi ia e kimi ꞌana i a Ietū a roto i te nuꞌu o tū kona ŋoŋoro era koia ko kī: «¿ꞌI hē ia tū taŋata era?».

¹² Te nuꞌu o ira e vānaŋa rahi rō ꞌana o ruŋa i a Ietū. Tētahi e kī era: «He taŋata riva»; e tētahi atu e kī era: «Taŋata taꞌe riva; e reo-reo ꞌana ki te taŋata».

¹³ Ka ai atu taꞌatoꞌa nō e vānaŋa era o ruŋa i a Ietū, te nuꞌu manaꞌu he taŋata riva ꞌina he haka ŋaroꞌa i te rāua vānaŋa era e kī era he riꞌa-riꞌa ꞌi te nuꞌu ra-rahi o te hūrio.

¹⁴ E hitu mahana o rā ŋoŋoro era he rāmā. ꞌI vāeŋa o rā ŋā mahana, he oho a Ietū he uru ki roto i te ⌊Kona Haꞌamuri ꞌAtua⌋ he haꞌamata he hāpī.

¹⁵ Te nuꞌu ra-rahi o te hūrio ko māere atu ꞌana e kī era: «¿Pē hē ia te kope ena, kai hāpī ia, i ꞌite rō ai i te ŋā meꞌe taꞌatoꞌa ena?».

¹⁶ He kī e Ietū: —Te meꞌe nei e au e hāpī nei taꞌe ꞌāꞌaku, o te kope uŋa mai i a au.

¹⁷ Te kope haŋa mo aŋa i te meꞌe haŋa o te ꞌAtua he aŋi-aŋi hoki tāꞌaku hāpī nei mai te ꞌAtua ꞌo he vānaŋa ꞌāꞌaku mau ꞌā.

¹⁸ Te kope vānaŋa hai meꞌe ꞌāꞌana mau ꞌā e haŋa ꞌana mo haka nui-nui i a ia; ꞌe te kope haŋa mo haka nui-nui i te kope uŋa i a ia, ko rā kope te meꞌe kī i te parautiꞌa ꞌe ꞌina he haꞌavare.

¹⁹ »¿Taꞌe ꞌō ko vaꞌai atu ꞌana a ⌊Mōtē⌋ i te haka tere iŋa o te hūrio? ꞌE, ꞌina e tahi o kōrua i haꞌatura. ¿He aha ia a kōrua e haŋa ena mo tiŋaꞌi mai i a au?

²⁰ He pāhono e te taŋata: —¡Ko oꞌo ꞌana koe e te tātane! ¿Ko ai te meꞌe haŋa mo tiŋaꞌi atu i a koe?

²¹ He kī e Ietū: —A kōrua taꞌatoꞌa e taꞌe au ena ꞌi te meꞌe nō e tahi aŋa e au ꞌi te ⌊mahana haka ora⌋.

²² ꞌE, a kōrua, ka ai atu he mahana haka ora, ko te hore iŋa ꞌana i te kiri o te kinoŋa mo haꞌatura ki te roŋo ꞌa Mōtē (ka ai atu rā roŋo taꞌe mai i a Mōtē i oho mai ai, mai te nuꞌu era o muꞌa ꞌana).

²³ Mo hore ia o kōrua i te kiri o te kinoŋa o te poki ꞌi te mahana haka ora ꞌo hape ki te ⌊haka tere iŋa ꞌa Mōtē⌋, ¿he aha ia kōrua e riri ena mōꞌoku ꞌo te haka ora i te māui-ui o te taŋata ꞌi te mahana haka ora?

²⁴ ꞌIna kōrua ko kī i te tano ꞌe i te taꞌe tano o te meꞌe e tahi hai meꞌe nō ena e kōrua e takeꞌa ena. A kōrua ana ture hai parautiꞌa.

He haka ꞌite iŋa o Ietū o hē a ia

²⁵ Tētahi o te nuꞌu noho o Hērutarema he haꞌamata he ꞌui: «¿Taꞌe ꞌō rā ko tū kope era e kimi mai ena mo tiŋaꞌi?

²⁶ ¡ꞌAi ꞌō e vānaŋa ꞌā ꞌi te kona era ai, ꞌe ꞌina e tahi kope kī e tahi meꞌe! ¿Ka kī ꞌō te nuꞌu ra-rahi e manaꞌu ena he ⌊Kiritō⌋ mau ꞌana a ia?

²⁷ ¿Pē hē te meꞌe tuꞌu pē rā? Ko ꞌite ꞌana, paꞌi, e tātou o hē a ia; ꞌe, hora ena mo oho mai o te Kiritō, ꞌina e tahi kope mo ꞌite o hē a ia».

²⁸ A Ietū e hāpī ꞌana ꞌi te Kona Haꞌamuri ꞌAtua. I ŋaroꞌa era i tū meꞌe era, he haka pūai i te reꞌo ꞌai ka kī: «¿Ko ꞌite mau ꞌana ꞌō kōrua ko ai a au ꞌe mai hē a au i oho mai ai? Taꞌe hai manaꞌu ōꞌoku au i oho mai ai, hai manaꞌu o te kope uŋa mai i a au, kope aŋa i tāꞌana meꞌe kī, ꞌe ꞌina kōrua kai māhani i a ia.

²⁹ Ko au te meꞌe i māhani; mai i a ia, paꞌi, a au i oho mai ai, ꞌe ꞌāꞌana a au i uŋa mai».

³⁰ He haŋa ia tū nuꞌu era mo ꞌa-ꞌaru i a Ietū, ꞌe, ꞌina e tahi o rāua i rao i ꞌa-ꞌaru ꞌo te ai kai tano ꞌana tōꞌona hora.

³¹ Ka ai atu pē ira, meꞌe rahi nuꞌu i haka moe i te manaꞌu ꞌi ruŋa i a ia, ꞌe e kī era: «Ka oho mai ena te Kiritō, ¿e aŋa rō hō i te meꞌe ꞌata hau rō atu ki te meꞌe aŋa e ia?».

He nuꞌu ra-rahi e haŋa ꞌā mo ꞌa-ꞌaru i a Ietū

³² He ŋaroꞌa e te fariseo i te vānaŋa o tū nuꞌu era o ruŋa i a Ietū. He uŋa ia e rā ŋā fariseo ananake ko te ⌊oromatuꞌa ra-rahi⌋ i te mūtoꞌi o te Kona Haꞌamuri ꞌAtua mo ꞌa-ꞌaru i a Ietū.

³³ ꞌE a Ietū ko te vānaŋa iŋa ꞌā ki te nuꞌu e kī era: «E ko roa a au ka noho atu ena ꞌi muri i a kōrua. Ki oti he hoki a au ki muri i te kope uŋa mai i a au.

³⁴ E kimi rō mai kōrua i a au, ꞌe ꞌina e ko ravaꞌa; e ko tuꞌu atu, paꞌi, kōrua ki te kona era ōꞌoku ka oho nei».

³⁵ He haꞌamata ia te hūrio he ꞌui ki a rāua ꞌana: «¿Ki hē te kope nei ka oho ena ka taꞌe ravaꞌa ena e tātou? ¿He oho hō he noho ꞌi muri i te hūrio ꞌi te henua kē, ꞌe he hāpī i te nuꞌu taꞌe ꞌite ko ai te ꞌAtua parautiꞌa?

³⁶ ¿He aha te auraꞌa o te meꞌe ena e kī mai ena: “e kimi rō mai kōrua i a au ꞌe ꞌina e ko ravaꞌa”, ꞌe, “a kōrua e ko tuꞌu atu ki te kona ꞌi ira a au ka noho era”?».

He vānaŋa iŋa o Ietū o ruŋa i te ⌊Vārua Maitai⌋

^37-38 Te mahana hopeꞌa o tū ŋoŋoro era, he mahana ꞌata hau o te nui-nui. ꞌI rā mahana he māroa a Ietū he kī pūai: «Te kope pohe ki te vai e oho mai ki a au, ꞌe te kope haka moe i tōꞌona manaꞌu ꞌi ruŋa i a au e unu. Pa he meꞌe kī ꞌi ruŋa i te ⌊Pāpaꞌi Moꞌa⌋: mai roto i rā kope ka tehe ena pa he rio te vai vaꞌai i te ora ꞌāpī ꞌina he hopeꞌa raꞌa o te ꞌAtua».

³⁹ Hai meꞌe nei i haka ꞌite ai e Ietū e tuꞌu e noho rō te Vārua Maitai ꞌi roto i te nuꞌu haka moe i te manaꞌu ꞌi ruŋa i a ia; te meꞌe nō, ꞌi rā hora kai uŋa hia ꞌana e te ꞌAtua i te Vārua Maitai ꞌi te meꞌe era kai hoki ꞌana a Ietū ki te raŋi.

He manaꞌu iŋa kē-kē o ruŋa i a Ietū

⁴⁰ E ai rō ꞌana te taŋata, i ŋaroꞌa era i te vānaŋa nei, he kī: «Te taŋata era he perofeta mau era ꞌā mo tuꞌu mai».

⁴¹ Tētahi e kī era: «Te kope era he Kiritō». ꞌE tētahi atu e kī era: «ꞌIna. Taꞌe, paꞌi, o te kona era ko Karirea te Kiritō.

⁴² Pē nei e kī ena ꞌi ruŋa i te Pāpaꞌi Moꞌa: te Kiritō he hakaara o te ꞌariki ko ⌊Tāvita⌋, ꞌe ka oho mai ena mai Vērene, he kona o Tāvita».

⁴³ Pē ira i manaꞌu kē ai te taŋata o ruŋa o Ietū.

⁴⁴ Tētahi e haŋa rō ꞌana mo ꞌa-ꞌaru mo maꞌu mo puru, ꞌe, ꞌina e tahi o rāua i rao i ꞌa-ꞌaru.

Te nuꞌu ra-rahi ꞌina he haka moe i te rāua manaꞌu ꞌi ruŋa i a Ietū

⁴⁵ Tū ŋā mūtoꞌi era o te Kona Haꞌamuri ꞌAtua he hoki he oho ki te kona era ꞌi ira te oromatuꞌa ra-rahi ꞌe te fariseo. He ꞌui e rā nuꞌu: —¿He aha kōrua i taꞌe maꞌu mai ai i a Ietū?

⁴⁶ He pāhono e tū ŋā mūtoꞌi era: —¡Kai ai ꞌā e tahi taŋata vānaŋa pē ia!

⁴⁷ He kī ia e te fariseo: —¿Ko haka roŋo takoꞌa ꞌana kōrua ki tāꞌana reo-reo?

⁴⁸ ¿E ai rō ꞌana ꞌō e tahi o te nuꞌu ra-rahi ꞌe o te fariseo i haka moe i te manaꞌu ꞌi ruŋa i a ia?

⁴⁹ Te nuꞌu haka moe i te rāua manaꞌu ꞌi ruŋa i a ia he nuꞌu taꞌe aŋi-aŋi i te haka tere hūrio, ꞌe pe muꞌa ka oho ena he haka ūtuꞌa e te ꞌAtua.

⁵⁰ He kī e Nikoremo, he fariseo oho uꞌi i a Ietū ꞌi te mahana e tahi:

⁵¹ —Ki te tātou haka tere iŋa, e ko tano mo haka ūtuꞌa i te taŋata ꞌina kai haka roŋo hia ki tāꞌana vānaŋa ꞌe ꞌina kai ꞌite hia he aha tāꞌana meꞌe i aŋa.

⁵² He pāhono e rā nuꞌu: —¿A koe takoꞌa o Karirea? Ka hāpī i te meꞌe hāꞌaki ꞌi ruŋa i te Pāpaꞌi Moꞌa ꞌe he takeꞌa e koe mau ꞌā ꞌina he perofeta o Karirea. [

⁵³ He eꞌa ia tū nuꞌu taꞌatoꞌa era he oho ki te rāua hare.