Iovani 4 - Rapa Nui

Ko Ietū ꞌe he viꞌe o ⌊Tāmāria⌋

¹ I ꞌite era ia a Ietū ko ꞌite ꞌana te ⌊fariseo⌋ ꞌata rahi tāꞌana nuꞌu hāpī ꞌe ꞌata rahi te nuꞌu papatito e ia ki a ⌊Iovani⌋

² (ka ai atu o tāꞌana nuꞌu hāpī mau era ꞌā te papatito, taꞌe ꞌa Ietū),

³ he eꞌa he oho mai Hūrea ki Karirea.

⁴ ꞌI tōꞌona oho iŋa i vari ai a Tāmāria.

⁵ He tuꞌu ia ki te kona e tahi o Tāmāria te ꞌīŋoa ko Tīkara hāhine ki te henua vaꞌai e ⌊Hākovo⌋, ꞌi muꞌa ꞌā, ki tāꞌana poki ko ⌊Kōsē⌋.

⁶ ꞌI rā kona te pū vai e tahi e kī era He Pū Vai ꞌa Hākovo. A Ietū, ꞌi te rohi-rohi ꞌi te roa o te ara, he noho ꞌi muri i tū pū vai era. Ko hāhine ꞌā rā hora ki te hora kai,

^7-8 ꞌe te nuꞌu hāpī ꞌāꞌana ko oho ko uꞌi ꞌā hai kona mo hoꞌo mai hai meꞌe mo kai. He tuꞌu ia ki rā kona pū vai era te viꞌe tāmāria e tahi, ꞌe he kī e Ietū: —Ka vaꞌai mai koe hai vai.

⁹ ꞌI te meꞌe era ꞌina he ⌊hūrio⌋ he vānaŋa ki te nuꞌu o Tāmāria, he pāhono e rā viꞌe: —¿Pē hē ia koe te hūrio e no-noꞌi mai ena ki a au ki te viꞌe tāmāria mo vaꞌai atu hai vai?

¹⁰ He pāhono e Ietū: —ꞌĀhani ꞌō e ꞌite rō ꞌā koe he aha te meꞌe haŋa o te ꞌAtua mo vaꞌai atu, ꞌe ꞌāhani takoꞌa e ꞌite rō ꞌā koe ko ai te meꞌe nei e no-noꞌi atu ena ki te vai, ko no-noꞌi ꞌana ia e koe ki a ia hai vai, ꞌe he vaꞌai atu i te vai vaꞌai i te ora ꞌāpī ꞌina he hopeꞌa raꞌa.

¹¹ He kī e rā viꞌe: —Raro nui rahi te pū nei ꞌe ꞌina e tahi aꞌa meꞌe mo ꞌu-ꞌutu mai. ¿Mai hē ia koe ka vaꞌai mai ena i te vai ora ena?

¹² Te mātou tupuna ko Hākovo ko haka rē mai ꞌana ki a mātou i te pū vai nei. ꞌI nei e unu era i te vai, pē ira takoꞌa ꞌana tāꞌana ŋā poki ꞌe tāꞌana ꞌanimare. ¿ꞌAta hau ꞌō koe ki a ia?

¹³ He pāhono e Ietū: —Te nuꞌu taꞌatoꞌa unu i te vai nei he pohe haka ꞌou ki te vai;

¹⁴ ꞌe, te kope unu i te vai vaꞌai e au, e ko pohe haka ꞌou. Te vai vaꞌai e au ꞌi roto i a ia pa he kona tehe vai ꞌina he oti ꞌe mai ira he ravaꞌa e ia i te ora ꞌāpī ꞌina he hopeꞌa raꞌa vaꞌai e te ꞌAtua.

¹⁵ He kī e rā viꞌe: —Ē, ka vaꞌai mai tāꞌaku o te vai ena ꞌo pohe haka ꞌou a au ki te vai ꞌe ꞌo hoki haka ꞌou mai au ki nei.

¹⁶ He kī e Ietū: —Ka oho ka uŋa mai taꞌu kenu.

¹⁷ He pāhono e rā viꞌe: —ꞌIna ꞌāꞌaku kenu. He kī e Ietū: —He aŋi ꞌā tāꞌau, ꞌina mau ꞌā aꞌu kenu.

¹⁸ E rima, paꞌi, aꞌu kenu ⌊hāipo-ipo⌋ i ai, ꞌe te kope ena ꞌi muri i a koe taꞌe he kenu ꞌāꞌau. He parautiꞌa mau ꞌā tāꞌau.

¹⁹ I ŋaroꞌa era e rā viꞌe i tū meꞌe era, he pāhono: —Ki tōꞌoku uꞌi he perofeta koe.

²⁰ Te mātou tupuna ꞌi ruŋa o te maꞌuŋa nei i haꞌamuri ai ki te ꞌAtua, ꞌe a kōrua te hūrio e kī ena: ꞌi Hērutarema te kona tano mo haꞌamuri ki te ꞌAtua.

²¹ He pāhono e Ietū: —Ka haka roŋo mai. Nā ko hāhine ꞌā te mahana e ko tātake haka ꞌou ꞌi hē te kona tano mo haꞌamuri ki te ꞌAtua, hoki ꞌi nei ꞌo ꞌi Hērutarema.

²² A kōrua, te nuꞌu o Tāmāria, ꞌina he ꞌite ki a ai e haꞌamuri ena. ꞌE, a mātou e ꞌite rō ꞌana ki a ai; mai i a mātou, paꞌi, mai te hūrio, ka ai ena te rāveꞌa mo te taŋata mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.

²³ E tuꞌu rō te hora, ko te hora mau nei ꞌā, te nuꞌu haꞌamuri parautiꞌa ki te ꞌAtua e haꞌamuri rō hai māhatu ꞌe hai hāꞌūꞌū o te ⌊Vārua Maitai⌋. Pē ira te haꞌamuri haŋa mau o te ꞌAtua Matuꞌa.

²⁴ Te ꞌAtua he Vārua mau nō, ꞌina ōꞌona hakari; te nuꞌu haꞌamuri ki a ia e haꞌamuri hai pūai o te Vārua Maitai ꞌe tano ki te parautiꞌa o ruŋa i a ia.

²⁵ He kī e rā viꞌe: —Ko ꞌite ꞌana a au nā e tuꞌu rō mai te ⌊Mētia⌋ (te auraꞌa, te ⌊Kiritō⌋); ki tuꞌu mai, māꞌana e haka aŋi-aŋi tahi mai.

²⁶ He kī e Ietū: —Ko au rā kope, ko te kope nei e vānaŋa atu ena.

²⁷ E vānaŋa nō ꞌana ararua i tuꞌu rō atu ai te nuꞌu hāpī ꞌāꞌana. He māere ꞌo te ai e vānaŋa ꞌana a Ietū ararua ko te viꞌe e tahi. ꞌE, ꞌina e tahi i haŋa mo ꞌui he aha tāꞌana meꞌe haŋa, ꞌe he aha e vānaŋa era ki rā viꞌe.

²⁸ He haka rē ia rā viꞌe i tāꞌana karo, he eꞌa he oho ki te kona noho ōꞌona, he kī ki te taŋata o ira:

²⁹ «Ka oho mai kōrua ka uꞌi i te taŋata e tahi ko kī tahi mai ꞌana i tāꞌaku meꞌe aŋa ki ꞌaŋarīnā. He Kiritō ꞌō pēaha».

³⁰ He eꞌa tahi te taŋata mai te rāua kona noho he oho ki te kona era ꞌi ira a Ietū.

³¹ ꞌI rā kona, te nuꞌu hāpī ꞌāꞌana e haka koni ꞌā: —E te Maꞌori, ka kai tāꞌau o te meꞌe.

³² He pāhono e Ietū: —E ai rō ꞌana tāꞌaku kai taꞌe ꞌite e kōrua.

³³ He haꞌamata tū nuꞌu hāpī era he kī ki a rāua ꞌana: «¿Ko maꞌu mai ꞌana ꞌō pēaha e te nuꞌu hai meꞌe māꞌana mo kai?».

³⁴ He kī e Ietū: «Tāꞌaku kai he aŋa ꞌe he haka oti i te meꞌe kī mai e te kope uŋa mai i a au.

³⁵ »A kōrua e kī ena: “E hā ꞌāvaꞌe toe mo kato iho o te kai”. Tāꞌaku kī: “Ko tano ꞌana mo kato”. Ka uꞌi rā kōrua i te nuꞌu e pae mai ena: a rāua pa he kai ꞌoka ena ꞌā ko tano riva-riva ꞌana te rāua hora mo kato.

³⁶ »Te nuꞌu kato i te kai e ꞌauhau rō ꞌā, ꞌe te kai kato era he ravaꞌa e rāua i te ora ꞌāpī ꞌina he hopeꞌa raꞌa. Pē ira te nuꞌu ꞌoka (te auraꞌa, te nuꞌu haka ꞌite i te vānaŋa o te ꞌAtua) ka koa ena ananake ko te nuꞌu o rāua i kato i te nuꞌu ⌊haka moe i te manaꞌu⌋ ꞌi ruŋa i a au.

³⁷ »Pa he meꞌe kī: “O te tētahi te ꞌoka, ꞌe o te tētahi atu te kato”.

³⁸ Ko uŋa ꞌana a au i a kōrua mo kato i te kai mai te kona taꞌe o kōrua i ꞌoka, o te tētahi. O rāua i haꞌamata te aŋa he haka ꞌite i te vānaŋa o te ꞌAtua, ꞌe o kōrua i haka mao i te aŋa he kato i te nuꞌu haka moe i te manaꞌu ꞌi ruŋa i a au».

³⁹ I rahi rō te nuꞌu o rā kona o Tāmāria i haka moe i te manaꞌu ꞌi ruŋa i a Ietū ꞌo tū meꞌe kī era e rā viꞌe pē nei ē: «Ko kī tahi mai ꞌana i tāꞌaku meꞌe i aŋa ki ꞌaŋarīnā».

⁴⁰ I tuꞌu era rā nuꞌu, he ani ki a Ietū mo noho ꞌi muri i a rāua, ꞌe he noho ꞌi ira e rua mahana.

⁴¹ I ŋaroꞌa era mai i a ia mau ꞌā i tāꞌana meꞌe kī, ko ꞌata rahi atu ꞌana te nuꞌu haka moe i te manaꞌu ꞌi ruŋa i a ia.

⁴² ꞌE he kī e te nuꞌu ki rā viꞌe: «Hora nei ko haka moe ꞌana a mātou i te manaꞌu ꞌi ruŋa i a ia, taꞌe nō ꞌō ꞌo tū meꞌe kī mai era e koe, ꞌo te ai takoꞌa ko ŋaroꞌa ꞌana e mātou mau ꞌana i a ia, ꞌe ko ꞌite ꞌā e mātou ko ia mau ꞌā te kope mo haka eꞌa i a tātou i te taŋata mai roto i te ūtuꞌa o te hara ꞌe mo vaꞌai mai i te ora ꞌāpī ꞌina he hopeꞌa raꞌa».

He haka ora iŋa o Ietū i te poki o te kape vaꞌehau

⁴³ I oti era tū mahana era e rua, he eꞌa a Ietū mai Tāmāria he oho ki Karirea,

⁴⁴ ka ai atu ko kī era ꞌā e ia mau ꞌā: ꞌina e ko moꞌa te perofeta e te nuꞌu o tōꞌona kāiŋa.

⁴⁵ I tuꞌu era ki Karirea, he koa e te nuꞌu o ira ꞌo te ai i oho takoꞌa rō a rāua ki Hērutarema mo te ⌊ŋoŋoro o te Pakate⌋ ꞌe ꞌi ira i takeꞌa ai i te meꞌe taꞌatoꞌa aŋa e Ietū.

⁴⁶ He hoki ia a Ietū ki Kānā era o Karirea, kona haka riro era i te vai he ꞌava. ꞌI ira te taŋata hōnui e tahi aŋa ki te ꞌariki rōmano ko māui-ui ꞌana tāꞌana poki ꞌi Kaperenāū.

⁴⁷ I ꞌite era e rā taŋata ko tuꞌu ꞌana a Ietū ki Karirea mai Hūrea, he oho he uꞌi ꞌe he ani mo oho ki tōꞌona hare mo haka ora i te māui-ui o tāꞌana poki ko hāhine ꞌā mo mate.

⁴⁸ He kī a Ietū: —A kōrua, mo taꞌe takeꞌa i te mana, e ko haka moe i te manaꞌu ꞌi ruŋa i te ꞌAtua.

⁴⁹ He kī e tū taŋata hōnui era: —E Ietū, ka hōrou koe mai taꞌe mate tāꞌaku poki.

⁵⁰ He kī ia e Ietū: —Ka hoki koe ki tuꞌu hare; taꞌa poki ko ora ꞌana. He haka moe rā taŋata i tōꞌona manaꞌu ki tū vānaŋa kī era e Ietū ꞌe he eꞌa he oho rō ꞌai.

⁵¹ E oho nō ꞌana ki tōꞌona hare he piri tāꞌana nuꞌu tāvini ꞌi te ara ꞌe he kī: «¡Ko ora ꞌana te māui-ui o te poki!».

⁵² He ꞌui e tū taŋata era: «¿Hora aha i haꞌamata i ora ai te māui-ui?». He pāhono e rā nuꞌu: «ꞌI ꞌaŋataiahi pe te hora hoꞌe o te ahi-ahi i kore ai te vera o te hakari».

⁵³ He aŋi-aŋi ia e rā taŋata ko tū hora kī mau era ꞌā e Ietū: «Ko ora ꞌana te māui-ui o taꞌa poki». ꞌE he haka moe rō ꞌai te manaꞌu ꞌi ruŋa i a Ietū, ꞌe pē ira ꞌā te nuꞌu taꞌatoꞌa o tōꞌona hare.

⁵⁴ He rua aŋa iŋa nei o Ietū i te mana ꞌi Karirea mai tōꞌona hoki iŋa mai mai Hūrea.