Iovani 2 - Rapa Nui

He ŋoŋoro hāipo-ipo ꞌi Kānā

¹ ꞌI te toru mahana he ai e tahi ŋoŋoro hāipo-ipo ꞌi Kānā, he kona e tahi o Karirea. ꞌI rā ŋoŋoro te matuꞌa vahine o Ietū.

² ꞌI ira takoꞌa a Ietū ananake ko tāꞌana nuꞌu hāpī.

³ I oti era te vino, he kī e te matuꞌa vahine o Ietū: —E haŋu, ꞌina he ꞌava toe.

⁴ He pāhono e Ietū: —E nua, ¿he aha koe e kī mai ena i te meꞌe ena? Kai tano ꞌana, paꞌi, tōꞌoku hora.

⁵ He kī ia e te matuꞌa vahine o Ietū ki te tāvini o ira: «E aŋa kōrua i te meꞌe taꞌatoꞌa ka kī atu ena e ia».

⁶ ꞌI rā kona e ono pāria nu-nui aŋa hai māꞌea, pāria haꞌaputu vai o te ⌊hūrio⌋ mo ⌊haka maꞌitaki⌋ o rāua mo haka tano ki te rāua haka tere iŋa tupuna. Te rahi o te vai mo ꞌī o rā ŋā pāria mai te vaꞌu ꞌahuru ki te hoꞌe hānere ritoro ka tahi.

⁷ He kī e Ietū ki tū ŋā tāvini era: «Ka haꞌaꞌī te ŋā pāria ena hai vai». He haꞌaꞌī e tū nuꞌu era ki te ꞌī.

⁸ He kī haka ꞌou e Ietū: «Hora ena ka ꞌu-ꞌutu e tahi ꞌapa ꞌai ka maꞌu rō ki te taŋata ꞌāꞌana te ŋoŋoro i aŋa». Pē ira i aŋa ai.

⁹ He haka ꞌatu e tū taŋata era i rā vai ko riro ꞌā he vino, ꞌe ꞌina kai ꞌite mai hē rā ꞌava i eꞌa mai ai; he tāvini mau nō i ꞌite ꞌo te ai o rāua rā vai i ꞌu-ꞌutu. He raŋi mo oho o te taŋata era ōꞌona te hāipo-ipo

¹⁰ ꞌe he kī: «Taꞌatoꞌa taŋata ꞌi raꞌe e vaꞌai ena i te ꞌava riva-riva mo unu. Ki rahi te unu o te taŋata, e vaꞌai iho ena i te ꞌava taꞌe riva-riva rahi. ꞌE, a koe ko hāpaꞌo ꞌana i te ꞌava hopeꞌa o te riva-riva mo te hora nei».

¹¹ Te meꞌe aŋa nei e Ietū ꞌi Kānā o Karirea he mana raꞌe aŋa e ia. Pē ira i takeꞌa ai i tōꞌona nui-nui ꞌe he haka moe rō ꞌai tāꞌana nuꞌu hāpī i te manaꞌu ꞌi ruŋa i a ia.

¹² I oti era te meꞌe nei he eꞌa he oho a Ietū ki Kaperenāū koia ko tōꞌona matuꞌa vahine, ko tōꞌona ŋā poki taina ꞌe ko tāꞌana nuꞌu hāpī. ꞌIna kai rahi te rāua mahana i noho ai ꞌi ira.

He tū-tute iŋa o Ietū i te nuꞌu

¹³ ꞌI te meꞌe era ko hāhine ꞌana te ⌊ŋoŋoro o te hūrio he Pakate⌋, he eꞌa he oho a Ietū ki Hērutarema.

¹⁴ He takeꞌa ꞌi roto i te ⌊Kona Haꞌamuri ꞌAtua⌋ i te nuꞌu hoꞌo puaꞌa, māmoe ꞌe manu, ꞌe i te nuꞌu taui moni e no-noho rō ꞌana.

¹⁵ I takeꞌa era e Ietū, he toꞌo mai i te taura, he haka pā mo ꞌuaka, ꞌai ka tū-tute tahi i tū nuꞌu era mai roto koia ko te rāua puaꞌa ꞌe ko te rāua māmoe. He haka marere tahi e Ietū i te tara ꞌaurī o te nuꞌu taui moni koia ko huri-huri i te ꞌamuramaꞌa.

¹⁶ ꞌE ki te nuꞌu hoꞌo manu i kī ai: «¡Ka toꞌo te meꞌe ena mai nei! ¡ꞌIna ko haꞌariro te kona haꞌamuri ki tōꞌoku Matuꞌa he kona hoꞌo meꞌe o kōrua!».

¹⁷ He topa ia te manaꞌu o te nuꞌu hāpī ꞌāꞌana o ruŋa i te vānaŋa kī ꞌi ruŋa i te ⌊Pāpaꞌi Moꞌa⌋ pē nei ē: «Tōꞌoku haŋa mo te kona haꞌamuri atu pa he ahi hū ꞌi roto i tōꞌoku māhatu».

¹⁸ He kī e te nuꞌu hūrio ra-rahi: —Ka aŋa mai koe e tahi mana, ki ꞌite ai mātou i a koe ꞌō te parau mo aŋa i te ŋā meꞌe ena.

¹⁹ He pāhono e Ietū: —Ka haka marere rā te kona nei, ꞌe e toru nō mahana ko haka tuꞌu haka ꞌou ꞌā e au.

²⁰ He kī e te hūrio: —E maha ꞌahuru mā ono matahiti i aŋa ai te kona nei, ꞌe, ¿i a koe e toru nō mahana ko tuꞌu haka ꞌou ꞌā?

²¹ ꞌIna he aŋi-aŋi e rā nuꞌu pē nei ē: te kona kī era e Ietū ko tōꞌona hakari mau era ꞌā.

²² ꞌI te hora ia ko ora ꞌana a Ietū mai te mate, i topa iho ai te manaꞌu o tāꞌana nuꞌu hāpī ki tū vānaŋa era ꞌāꞌana ꞌe he ꞌite rā nuꞌu: te meꞌe hāꞌaki ꞌi ruŋa i te Pāpaꞌi Moꞌa ꞌe te meꞌe kī era e Ietū o ruŋa o tōꞌona ora iŋa mai te mate he parautiꞌa mau ꞌā.

A Ietū e ꞌite rō ꞌana i te huru o te taŋata

²³ ꞌI te hora o Ietū ꞌi Hērutarema mo te ŋoŋoro o te Pakate, nuꞌu rahi te nuꞌu i ⌊haka moe i te manaꞌu⌋ ꞌi ruŋa i a ia ꞌo te takeꞌa i te mana e aŋa era.

²⁴ ꞌE, a Ietū ꞌina he vaꞌai i a ia ki te manaꞌu o rā nuꞌu ꞌo te ai ko ꞌite ꞌā pē hē te huru o te taŋata taꞌatoꞌa.

²⁵ Mo Ietū e topa nō ꞌā te meꞌe ena he kī ōꞌou o ruŋa i te huru o te taŋata. Ko ꞌite riva-riva ꞌana, paꞌi, pē hē te rāua māhatu.