Iovani 18 - Rapa Nui

He ꞌa-ꞌaru iŋa i a Ietū

¹ I oti era te kī i te meꞌe nei, he eꞌa a Ietū ananake ko tāꞌana nuꞌu hāpī he oho ki te rua pāꞌiŋa o te vai era te ꞌīŋoa ko Tererone. ꞌI ira e tahi kona e rahi rō ꞌana te tumu ꞌōrivo ꞌe he oho a kuā Ietū ki rā kona.

² A Hura, kope hoꞌo era i a Ietū, ko ꞌite ꞌana i rā kona; i rahi rō, paꞌi, te mahana i taka-taka ꞌi ira ananake ko kuā Ietū.

³ He tuꞌu ia a Hura e uŋa rō ꞌana ꞌi muri i a ia i te nūnaꞌa vaꞌehau rōmano ꞌe i te tētahi ꞌauario o te ⌊Kona Haꞌamuri ꞌAtua⌋ uŋa e te nuꞌu ⌊oromatuꞌa ra-rahi⌋ ꞌe e te fariseo. Te nuꞌu nei e maꞌu-maꞌu rō ꞌana i te hoe ꞌe i te tētahi atu meꞌe mo moto koia ko hakariꞌi ꞌe ko rama.

⁴ ꞌI te ꞌite o Ietū i te meꞌe ka topa era ki a ia, i takeꞌa era i rā nuꞌu he haka hāhine he ꞌui: —¿Ki a ai rā kōrua e kimi ena?

⁵ He pāhono e rā nuꞌu: —Ki a Ietū era o Nātāreta. He kī e Ietū: —Ko au nā kope. ꞌI muri i rā nuꞌu e māroa rō ꞌā a Hura, hoꞌo era i a Ietū.

⁶ I kī era e Ietū: «Ko au nā kope», he neke tahi a tuꞌa ꞌe he hī-hiŋa rō atu ꞌai.

⁷ He ꞌui haka ꞌou e Ietū: —¿Ki a ai rā kōrua e kimi ena? He kī haka ꞌou e rā nuꞌu: —Ki a Ietū era o Nātāreta.

⁸ He pāhono haka ꞌou e Ietū: —Ko kī atu ꞌana a au ko au nā kope. ꞌE mo ai o kōrua ki a au e kimi mai ena, ka haka rē te nuꞌu nei ki oho.

⁹ Te meꞌe nei i topa ai mo haka tano o te meꞌe kī e Ietū: «E Koro, te nuꞌu vaꞌai mai era e koe, ꞌina a rāua kai haꞌataꞌa mai muri i a koe».

¹⁰ A Pētero e maꞌu rō ꞌana e tahi hoe. He toꞌo mai he paꞌo i te tariŋa mataꞌu o te kope e tahi te ꞌīŋoa ko Marko, he tāvini o te oromatuꞌa hopeꞌa o te ra-rahi.

¹¹ He kī e Ietū ki a Pētero: —Ka haka hoki koe i te hoe ena ki tōꞌona kona. Mo vaꞌai mai e te Matuꞌa i te ꞌati nei mo ꞌamo, ki taꞌa kī, ¿ꞌina a au ko ꞌamo?

ꞌI muꞌa o ꞌĀnā a Ietū

¹² Te vaꞌehau ananake ko tōꞌona kape ꞌe te ꞌauario ⌊hūrio⌋ o te Kona Haꞌamuri ꞌAtua he ꞌa-ꞌaru he here-here i a Ietū.

¹³ ꞌI raꞌe i maꞌu ai ki te hare o ꞌĀnā, huŋavai o Kaifā. A Kaifā he oromatuꞌa hopeꞌa o te ra-rahi o rā matahiti.

¹⁴ Te Kaifā nei ko te Kaifā kī era ki te hūrio ra-rahi i hau rō atu ꞌi te tano mo mate o te taŋata e tahi ki te mate o te taꞌatoꞌa.

He kī iŋa o Pētero kai ꞌite a ia ko ai a Ietū

¹⁵ A Pētero ararua ko te kope hāpī haka ꞌou e tahi ꞌi tuꞌa ꞌā o Ietū i oho ai. Tū rua kope era e māhani rō ꞌana ki te oromatuꞌa hopeꞌa o te ra-rahi, pē ira i oꞌo ai ꞌi muri i a Ietū ki rā hare,

¹⁶ ꞌe ko Pētero i noho ꞌi te ara. He eꞌa rā kope māhani era ki rā oromatuꞌa he vānaŋa ki te viꞌe hāpaꞌo ꞌōpani, ꞌe he haka uru i a Pētero.

¹⁷ He ꞌui e rā viꞌe ki a Pētero: —¿Taꞌe ꞌō koe takoꞌa o roto o te nuꞌu hāpī e te taŋata era? He pāhono e Pētero: —Ē, taꞌe a au o roto.

¹⁸ ꞌI te takeꞌo, te nuꞌu tāvini o rā hare ꞌe te ꞌauario o te Kona Haꞌamuri ꞌAtua ko haka hū ꞌana i te ahi ꞌi haho mo haka mahana o rāua. A Pētero ꞌi muri i rā nuꞌu takoꞌa e haka mahana ꞌā i a ia.

Ko Ietū ꞌe he oromatuꞌa hopeꞌa o te ra-rahi

¹⁹ He haꞌamata ia te oromatuꞌa hopeꞌa o te ra-rahi he haka ꞌui-ꞌui ki a Ietū o ruŋa i tāꞌana nuꞌu ꞌe o ruŋa o tāꞌana meꞌe hāpī.

²⁰ He kī e Ietū: —I vānaŋa ai a au ꞌi muꞌa o te nuꞌu taꞌatoꞌa: he hāpī tāꞌaku aŋa ꞌi roto i te ⌊hare pure hūrio⌋ ꞌe ꞌi te Kona Haꞌamuri ꞌAtua, he kona ꞌi ira e taka-taka ena te hūrio taꞌatoꞌa. ꞌIna e tahi ꞌāꞌaku vānaŋa i taꞌe kī ꞌi muꞌa o te taŋata.

²¹ ¿He aha koe e ꞌui mai ena ki a au? Ka haka ꞌui ki te nuꞌu haka roŋo mai era; mo rāua e kī atu he aha tāꞌaku meꞌe i vānaŋa.

²² I kī era a Ietū i te meꞌe nei, he toꞌo mai e te ꞌauario e tahi he haka eke hai rima ki te ꞌāriŋa koia ko kī: —¿Pē nā mau koe ana pāhono ki te oromatuꞌa hopeꞌa o te ra-rahi?

²³ He pāhono e Ietū: —Mo ai ko kī ꞌana a au i te meꞌe taꞌe tano, ka kī mai he aha rā meꞌe. ꞌE mo ai e tano rō ꞌā tāꞌaku meꞌe kī atu, ¿he aha ia koe i puꞌa mai ai?

²⁴ He toꞌo mai ia e ꞌĀnā, he haka maꞌu i a Ietū e here-here rō ꞌā ki a Kaifā, he oromatuꞌa hopeꞌa o te ra-rahi.

He kī iŋa haka ꞌou o Pētero kai ꞌite a ia ko ai a Ietū

²⁵ ꞌĪ ia a Pētero ꞌi tū kona era ꞌā e haka mahana ꞌana ki te ahi. He ꞌui e te nuꞌu o rā kona: —¿Taꞌe ꞌō he kope hāpī takoꞌa koe o tū taŋata era? He kī e Pētero: —Ē, taꞌe ko au.

²⁶ I hini ꞌiti era he ꞌui ki a Pētero e te tāvini e tahi o te oromatuꞌa hopeꞌa o te ra-rahi, huaꞌai o te taŋata paꞌo era e Pētero i te tariŋa: —¿Taꞌe ꞌō ko takeꞌa ꞌana koe e au ꞌi muri i a ia ꞌi tū kona era e rahi rō ꞌā te tumu ꞌōrivo?

²⁷ Taꞌe ko ia rā meꞌe i kī haka ꞌou ai e Pētero. ꞌE ꞌi rā hora mau ꞌā i ꞌoꞌoa ai te moa.

A Ietū ꞌi muꞌa o Pirato

²⁸ He maꞌu ia i a Ietū mai te hare o Kaifā ki te hare o Pirato, he suerekao rōmano. I tuꞌu era ko hāhine ꞌana mo ꞌōtea. Te nuꞌu hūrio, ꞌo hape ki te rāua haka tere iŋa o ruŋa i te haka maꞌitaki ꞌe ꞌo taꞌe tano mo kai i te kai o te Pakate, kai uru ki roto.

²⁹ ꞌO ira a Pirato i eꞌa i vānaŋa ai ꞌi haho ki rā nuꞌu. He ꞌui: —¿He aha te hape o te taŋata nei?

³⁰ He pāhono e rā nuꞌu: —ꞌĀhani a ia taꞌe he taŋata taparahi-taꞌata, e ko maꞌu mai e mātou ki a koe.

³¹ He kī e Pirato: —Ka maꞌu e kōrua, ꞌai ka ture rō hai haka tere iŋa mau ena ꞌā o kōrua. He pāhono e te nuꞌu ra-rahi hūrio: —A mātou te hūrio ꞌina he parau mo tiŋaꞌi mo haka mate i te taŋata.

³² Te meꞌe nei i topa ai ki tano ai te meꞌe kī e Ietū pē hē a ia ka mate era.

³³ He uru ia a Pirato ki roto i te hare, he kī ki te vaꞌehau mo maꞌu i a Ietū ki muꞌa i a ia, ꞌe he ꞌui: —¿He ꞌAriki koe o te hūrio?

³⁴ He pāhono e Ietū: —Te meꞌe ena ꞌāꞌau e ꞌui mai ena, ¿he manaꞌu ōꞌou, ꞌo he manaꞌu o te rua?

³⁵ He pāhono e Pirato: —Taꞌe a au he hūrio ki manaꞌu ai i te meꞌe tuꞌu pē nei. O tuꞌu hau mau ena ꞌā koia ko te kōrua oromatuꞌa ra-rahi i maꞌu mai i a koe ki muꞌa i a au mo ture atu. ¿He aha taꞌa meꞌe i aŋa?

³⁶ He pāhono e Ietū: —Tōꞌoku haka tere iŋa taꞌe o te ao nei. ꞌĀhani o te ao nei, ko ai ꞌana tāꞌaku taŋata mo moto ki te ŋā hūrio ra-rahi ena mōꞌoku, ꞌo topa a au ꞌi te rāua rima. Tōꞌoku haka tere iŋa, e kī atu ena, taꞌe o te ao nei.

³⁷ He ꞌui ia e Pirato: —¿Ka kī ꞌō he ꞌariki mau ꞌā a koe? He pāhono e Ietū: —Nā e koe ko kī ꞌā: he ꞌariki au. I oho mai ai ꞌe i poreko ai a au ꞌi te ao nei mo haka ꞌite i te parautiꞌa. Te nuꞌu taꞌatoꞌa o te parautiꞌa he haka roŋo mai.

³⁸ He ꞌui e Pirato: —¿He aha te meꞌe he parautiꞌa? I oti era te ꞌui i te meꞌe nei, he eꞌa haka ꞌou a Pirato he vānaŋa ki te hūrio, he kī: —Kai ravaꞌa e au e tahi hape o te taŋata nei mo haka ūtuꞌa i a ia.

Te ūtuꞌa mo Ietū he mate

³⁹ ꞌE, nā e ai rō ꞌā te haka tere iŋa o kōrua: he haka eꞌa i te taŋata puru e tahi ꞌi te ⌊ŋoŋoro o te Pakate⌋. ¿E haŋa rō ꞌā kōrua mo haka eꞌa atu ōꞌoku i te ꞌAriki nei o kōrua o te hūrio?

⁴⁰ He ohu atu e te taꞌatoꞌa: —¡Ko Varavā te meꞌe mo haka eꞌa mai, taꞌe ko ia! A Varavā he taŋata taparahi-taꞌata e tahi.