Iovani 12 - Rapa Nui

He huri iŋa hai manoꞌi i te vaꞌe o Ietū

¹ E ono mahana toe mo te ⌊Pakate⌋, he oho a Ietū ki Vētānia, he kona noho o Rātaro, he kope haka ora e ia.

² ꞌI ira i aŋa ai e tahi kai nui-nui mā Ietū. A Maratuka e tuhaꞌa ꞌā i te kai, ꞌe a Rātaro ꞌi ruŋa i te ꞌamuramaꞌa e kai ꞌā ananake ko kuā Ietū.

³ He maꞌu ia e ⌊Māria⌋ e tahi ꞌapa o te manoꞌi he nardo, manoꞌi hopeꞌa o te karo, he huri a ruŋa i te vaꞌe o Ietū ꞌe ꞌai ka haroꞌi hai rauꞌoho ōꞌona. He puneki rō atu ꞌai te ꞌeo o tū hare era.

⁴ He kī ia e Hura Ikariote, he kope māꞌana e hoꞌo i a Ietū:

⁵ —¿He aha te manoꞌi i taꞌe hoꞌo ai mo hāꞌūꞌū ki te veve? Te moni, paꞌi, o te manoꞌi era, ꞌāhani i hoꞌo, ko te tara ena mo ꞌauhau e toru hānere mahana aŋa.

⁶ I kī ai i te meꞌe nei e Hura taꞌe ꞌo te haka ꞌaroha ꞌi te veve, he toke-toke. ꞌĀꞌana, paꞌi, te hāpaꞌo i te rāua pūtē moni, ꞌe he toke nō te aŋa.

⁷ He kī e Ietū: —¡Ka haka rē koe i a Māria! E hāpaꞌo era i te manoꞌi ena mo paru i tōꞌoku hakari ꞌi te mahana o tōꞌoku mate.

⁸ Te nuꞌu veve e ko ŋaro mai muri i a kōrua ki te hora hopeꞌa; ꞌe, a au e ko noho e ko oho nō atu ꞌi muri i a kōrua.

He haꞌaꞌau iŋa mo tiŋaꞌi i a Rātaro

⁹ Meꞌe rahi nō atu nuꞌu i ꞌite: ꞌi Vētānia a Ietū, ꞌe he eꞌa he oho ki ira, taꞌe nō ki a Ietū uꞌi, ki a Rātaro takoꞌa, kope haka ora era e Ietū mai te mate.

¹⁰ He haꞌaꞌau ia e te nuꞌu ⌊oromatuꞌa ra-rahi⌋ mo tiŋaꞌi mo haka mate takoꞌa i a Rātaro

¹¹ ꞌo te ai meꞌe rahi nuꞌu ꞌina he haka roŋo haka ꞌou ki a rāua, ꞌe ko haka moe ꞌā i te rāua manaꞌu ꞌi ruŋa i a Ietū hai tū meꞌe topa era ki a Rātaro.

He tuꞌu iŋa o Ietū ki Hērutarema

¹² Meꞌe rahi taŋata i oho ki Hērutarema ki te ⌊ŋoŋoro he Pakate⌋ ꞌe, ꞌi te rua mahana, i ꞌite ai he tuꞌu a Ietū.

¹³ He ha-hati ia i te raupā niu ꞌe he eꞌa he oho ki a Ietū mo hokorua mo oho mai koia ko ꞌeha e ohu era: «¡⌊Osana⌋!» «¡Taŋata haꞌamaitai e te ꞌAtua te taŋata oho mai nei hai ꞌīŋoa ōꞌona, he ꞌAriki o Itaraera!».

¹⁴ He ravaꞌa e Ietū e tahi muni ꞌe he eke ki ruŋa, pa he meꞌe kī ꞌi ruŋa i te ⌊Pāpaꞌi Moꞌa⌋:

¹⁵ «ꞌIna ko riꞌa-riꞌa, e te nuꞌu o ⌊Tione⌋ ē. Ka uꞌi, nā ka pū rō mai te kōrua ꞌAriki e eke rō ꞌana ꞌi ruŋa i te muni».

¹⁶ ꞌI rā hora, ꞌina kai aŋi-aŋi e tāꞌana nuꞌu hāpī i te auraꞌa o rā ŋā meꞌe. Ki ora haka ꞌou a Ietū mai te mate, ꞌe ki hoki ki te raŋi, i haka topa iho ai te manaꞌu: te meꞌe taꞌatoꞌa topa era ki a Ietū he meꞌe ko hāꞌaki era ꞌā ꞌi ruŋa i te Pāpaꞌi Moꞌa.

¹⁷ Te nuꞌu o muri i a Ietū ꞌi te hora haka ora i a Rātaro, te aŋa he ꞌaꞌamu nō i tū meꞌe takeꞌa era e rāua.

¹⁸ ꞌO ira te taŋata i eꞌa ai ki a Ietū, he ꞌite o ruŋa i rā mana aŋa era e ia.

¹⁹ He kī e te ⌊fariseo⌋ ki a rāua ꞌana: «Ko ꞌati ꞌana a tātou. ꞌIna he meꞌe toe o tātou mo aŋa ꞌo oho tahi te taŋata ꞌi muri i a ia».

He ⌊kirieko⌋ e haŋa ꞌā mo māhani i a Ietū

²⁰ ꞌI roto o te nuꞌu oho ki Hērutarema mo haꞌamuri ki te ꞌAtua ꞌi te Pakate te nuꞌu kirieko.

²¹ He haka hāhine rā nuꞌu ki a Feripe, he kope o Vetetaira, kona o Karirea, he ani: «Ē, e haŋa rō ꞌana a mātou mo māhani ki a Ietū».

²² He oho a Feripe he kī ki a Antarea, ꞌe ararua i oho i kī ai ki a Ietū.

²³ He kī ia e Ietū: «Ko tano ꞌā te hora mo haka takeꞌa i te pūai ꞌe i te nui-nui o te ⌊Poki o te taŋata⌋.

²⁴ ꞌĪ a au he kī atu: te karu tariko mo taꞌe tanu ꞌi roto i te ꞌōꞌone, ꞌina e ko tupu, he topa he karu mau nō e tahi. ꞌE mo tanu ꞌi roto i te ꞌōꞌone, he tupu, ꞌe he rahi mai te kai.

²⁵ »Te kope haŋa mo aŋa i tāꞌana meꞌe nō era i haŋa taꞌe tapa i te ꞌAtua e ko ravaꞌa i te ora ꞌāpī ꞌina he hopeꞌa raꞌa, ꞌe te kope haka rē i tāꞌana meꞌe haŋa mo haꞌatura ki te ꞌAtua he ravaꞌa.

²⁶ Te kope haŋa mo aŋa mai ki a au ka oho mai ꞌi muri i a au. ꞌE ꞌi te kona era ꞌi ira a au, ꞌi ira takoꞌa a ia. Te kope aŋa mai ki a au he haka nui-nui e tōꞌoku Matuꞌa.

He haka ꞌite iŋa o Ietū i tōꞌona mate

²⁷ »¡Ko ŋaroꞌa mai ꞌana ꞌō e au i te māui-ui hopeꞌa o te nui-nui ꞌi roto i tōꞌoku māhatu! ¿Pē hē ia a au ana kī: “E Koro, ka haka kore atu koe i te ꞌati ena ꞌo topa mai ki ruŋa i a au”? E ko tano a au mo kī pē ira. I oho mai ai, paꞌi, a au mo te meꞌe mau nei ꞌā.

²⁸ Te meꞌe mau ꞌāꞌaku mo kī: “E Koro, ka haka takeꞌa tuꞌu pūai ki te taŋata ki haꞌamuri atu ai ki a koe”». He ŋaroꞌa ia i te reꞌo e tahi mai te raŋi e kī ꞌana: «Ko haka takeꞌa era ꞌana e au, ꞌe ꞌī a au he haka takeꞌa haka ꞌou».

²⁹ Te nuꞌu ŋaroꞌa ꞌi rā meꞌe he kī he pātiri. ꞌE o te tētahi te kī: «He merahi e vānaŋa ꞌā ki a ia».

³⁰ He kī e Ietū: «Taꞌe ki a au te reꞌo era; e haka ŋaroꞌa atu ꞌā ki a kōrua.

³¹ He hora era nei mo kī i te ūtuꞌa mo te taŋata taꞌatoꞌa o te ao ꞌe mo rē o te ꞌAtua ki te kope ꞌāꞌana te haka tere i te ao nei ko Rukifero.

³² Ka veo ena i a au ꞌi ruŋa i te tātaurō, he uto tahi mai e au i te taŋata taꞌatoꞌa».

³³ Hai meꞌe nei i haka aŋi-aŋi ai e Ietū pē hē a ia ka mate era.

³⁴ He kī e te taŋata: —E hāꞌaki ena ꞌi ruŋa i te Pāpaꞌi Moꞌa: te ⌊Kiritō⌋ e ko mate ki te hora hopeꞌa. ¿Pē hē ia a koe e kī mai ena e veo rō i te Poki o te taŋata ꞌi ruŋa i te tātaurō? ¿Ko ai ia nā Poki ena o te taŋata?

³⁵ He kī e Ietū: —Mahana taꞌe rahi te mahana toe ka noho atu ena ꞌi roto i a kōrua te mōrī haka māꞌeha i te kōrua manaꞌu. ꞌO ira, ka hāꞌere ꞌi roto i te māꞌeha mai ai atu ꞌana te mōrī, ꞌo ravaꞌa a kōrua e te pōhāhā. Te kope haꞌere, paꞌi, a roto i te pōhāhā, ꞌina he takeꞌa a hē a ia e oho ena.

³⁶ Ka haka moe kōrua i te manaꞌu ꞌi ruŋa i te mōrī nei mai taꞌe ŋaro, ki ai ai a kōrua o nei mōrī. I oti era a Ietū i te kī i te ŋā meꞌe nei, he oho he haka ŋaro ꞌo takeꞌa e rā nuꞌu.

He aha e taꞌe haka moe era i te manaꞌu ꞌi ruŋa i a Ietū

³⁷ A Ietū i aŋa rō i te mana hopeꞌa o te nui-nui ꞌi muꞌa i te taŋata ꞌe, ka ai atu pē ira, meꞌe rahi nō atu nuꞌu ꞌina he haka moe i te rāua manaꞌu ꞌi ruŋa i a ia.

³⁸ Hai meꞌe nei i tano ai te meꞌe pāpaꞌi e te perofeta era ko ꞌItaia pē nei ē: «E te ꞌAtua, ¿e ai rō ꞌana hō te nuꞌu haka roŋo ꞌe haꞌatura ki te tāua roŋo? ¿E ai rō ꞌana hō te nuꞌu haŋa mo aŋi-aŋi: he pūai ōꞌou te meꞌe takeꞌa ena e rāua?».

³⁹ ꞌI te taꞌe haka moe i te rāua manaꞌu ꞌi ruŋa i a Ietū i tano takoꞌa ai te meꞌe pāpaꞌi era e ꞌItaia pē nei ē:

⁴⁰ «Te nuꞌu hārui i te ꞌAtua hai tuaꞌivi ko haka keva ꞌā e ia i te mata ꞌo takeꞌa, ꞌe ko haka mira-mira ꞌana i te manaꞌu ꞌo aŋi-aŋi; ꞌo huri mai te rāua manaꞌu a ruŋa i a au ꞌe ꞌo haka ora e au».

⁴¹ I kī ai a ꞌItaia i te vānaŋa nei ꞌi te meꞌe era ko haka takeꞌa era ꞌā e te ꞌAtua ki a ia ꞌi muꞌa ꞌā i te pūai o Ietū; ꞌo ira i vānaŋa ai o ruŋa.

⁴² Ka ai atu pē ira, meꞌe rahi hūrio ra-rahi i ⌊haka moe i te manaꞌu⌋ ꞌi ruŋa i a Ietū, ꞌātā te tētahi nuꞌu hopeꞌa o te ra-rahi. Te meꞌe nō, ꞌina he haka ꞌite ꞌi muꞌa o te taŋata he riꞌa-riꞌa ꞌi te fariseo, ꞌo haka eꞌa mau rō ꞌāvai i a rāua mai roto i te ⌊hare pure hūrio⌋.

⁴³ I hau rō atu, paꞌi, te haŋa mo vānaŋa riva-riva o te taŋata o ruŋa i a rāua ki te ai o te manaꞌu riva-riva o te ꞌAtua mo rāua.

A Ietū i oho mai ai mo vaꞌai i te ora ꞌāpī

⁴⁴ He kī pūai e Ietū: «Te kope haka moe mai i tōꞌona manaꞌu e haka moe takoꞌa ꞌana i te manaꞌu ꞌi ruŋa i te Kope uŋa mai i a au.

⁴⁵ ꞌE te kope takeꞌa i a au te meꞌe takeꞌa he kope uŋa mai i a au.

⁴⁶ I oho mai ai a au ki te ao nei pa he mōrī haka māꞌeha i te manaꞌu o te taŋata ꞌo noho te nuꞌu haka moe i te manaꞌu ꞌi ruŋa i a au ꞌi roto i te pōhāhā.

⁴⁷ »Te kope ŋaroꞌa i tāꞌaku vānaŋa ꞌe ꞌina he haꞌatura, taꞌe māꞌaku e haka ūtuꞌa. Taꞌe, paꞌi, a au i oho mai ai mo haka ūtuꞌa i te taŋata o te ao; i oho mai ai mo haka eꞌa mai roto i te ūtuꞌa o te hara ꞌe mo vaꞌai i te ora ꞌāpī ꞌina he hopeꞌa raꞌa.

⁴⁸ Te kope taꞌe haŋa mai ꞌe taꞌe haꞌatura ki tāꞌaku vānaŋa ko ai era ꞌana te meꞌe mo haka ūtuꞌa i a ia: he vānaŋa kī era e au. Hai rā vānaŋa ka haka ūtuꞌa ena ꞌi te mahana o te ture hopeꞌa.

⁴⁹ »E vānaŋa atu era, paꞌi, a au taꞌe hai manaꞌu ōꞌoku ꞌā; o te Matuꞌa uŋa mai i a au i kī mai i tāꞌaku meꞌe mo haka ꞌite ꞌe mo hāpī.

⁵⁰ ꞌE ko ꞌite ꞌana e au: o tāꞌana roŋo te vaꞌai i te ora ꞌāpī ꞌina he hopeꞌa raꞌa. ꞌO ira, tāꞌaku meꞌe kī atu he meꞌe kī mau mai era ꞌā e tōꞌoku Matuꞌa mo haka ꞌite atu».