Iovani 11 - Rapa Nui

He mate o Rātaro

¹ He taŋata māui-ui e tahi te ꞌīŋoa ko Rātaro. E noho era ꞌi Vētānia ananake ko tōꞌona taina ko ⌊Māria⌋ ꞌe ko Maratuka.

² Ko te Māria nei te Māria huri era i te vaꞌe o Ietū hai manoꞌi ꞌe ꞌai ka haroꞌi hai rauꞌoho.

³ I māui-ui era a Rātaro, he uŋa e te ŋā taina nei mo kī ki a Ietū: te repahoa haŋa rahi era ōꞌona ko Rātaro ko māui-ui ꞌā.

⁴ I ꞌite era e Ietū i tū parau ꞌāpī era he kī: «Te hopeꞌa o te māui-ui era taꞌe he mate; he meꞌe nō mo haka takeꞌa i te pūai o te ꞌAtua ꞌe, takoꞌa, i te pūai o te Poki o te ꞌAtua».

⁵ Ka ai atu e haŋa rahi rō ꞌana a Ietū ki a Maratuka, ki a Māria ꞌe ki a Rātaro,

⁶ i kī era ko māui-ui ꞌana, he noho e rua mahana haka ꞌou ꞌi te kona ꞌi ira a ia.

⁷ I oti era he kī ki tāꞌana nuꞌu hāpī: —Mai ki hoki haka ꞌou tātou ki Hūrea.

⁸ He kī e te nuꞌu hāpī era: —E te Maꞌori, ꞌi tū ŋā mahana era e haŋa ꞌā te ⌊hūrio⌋ ra-rahi o ira mo tamaꞌi i a koe hai māꞌea, ꞌe, ¿e haŋa nō ꞌā a koe mo hoki ki ira?

⁹ He kī e Ietū: —¿Taꞌe ꞌō e hoꞌe ꞌahuru mā piti hora o te ꞌōtea? Te taŋata haꞌere ꞌi te ꞌōtea ꞌina e ko tu-tuki ꞌo te ai e māꞌeha rō ꞌā.

¹⁰ ꞌE, mo haꞌere ꞌi te pō, he tu-tuki ꞌi te taꞌe māꞌeha.

¹¹ He kī haka ꞌou e Ietū: —Ko haꞌuru ꞌā te tātou repahoa ko Rātaro, ꞌe ꞌī e au he oho he haka ꞌara.

¹² He kī e tāꞌana nuꞌu hāpī: —E te Maꞌori, mo ai e haꞌuru ꞌana, ka kī ꞌō he ora tōꞌona māui-ui.

¹³ Te auraꞌa o tū vānaŋa era ꞌa Ietū: ko mate ꞌā a Rātaro. ꞌE, e manaꞌu era e rā nuꞌu e vānaŋa ꞌā o ruŋa i te haꞌuru mau ꞌana.

¹⁴ He haka aŋi-aŋi riva-riva ia e Ietū he kī pē nei ē: —Ko mate ꞌā a Rātaro.

¹⁵ ꞌE, ko koa ꞌana a au ꞌo tōꞌoku taꞌe ai ꞌi ira. He meꞌe riva-riva, paꞌi, mo kōrua ki ꞌata haka moe ai te kōrua manaꞌu ꞌi ruŋa i a au. Mai ki oho tātou ki uꞌi.

¹⁶ He kī ia e Tōmā, kī takoꞌa ko Hauā, ki te tētahi nuꞌu hāpī o rāua: «Mai ki oho takoꞌa a tātou ki mā-mate ꞌi muri i a Ietū».

I a Ietū te ora

¹⁷ I tuꞌu era a Ietū ki Vētānia he ꞌite ka hā mahana o te tanu o Rātaro.

¹⁸ Te kona nei e hāhine rō ꞌana ki Hērutarema: e toru ꞌahuru tūmaꞌa minuti mo haꞌere,

¹⁹ ꞌe nuꞌu rahi te nuꞌu hūrio i oho i uꞌi i a Māria ararua ko Maratuka mo ꞌaroha ꞌe mo hokorua ꞌi te rāua ꞌati.

²⁰ I ꞌite era a Maratuka ꞌī ko tuꞌu ꞌā a Ietū, he eꞌa he oho mo toꞌo mai; ko Māria i noho ꞌi te kona hare era.

²¹ He kī e Maratuka ki a Ietū: —E Ietū, ꞌāhani a koe ꞌi nei, e ko mate tōꞌoku taina.

²² ꞌE, ka ai atu pē ira, ko ꞌite ꞌana e au e vaꞌai nō atu e te ꞌAtua ꞌi te hora nei i taꞌa meꞌe nō era mo kī.

²³ He pāhono e Ietū: —He ora tuꞌu taina.

²⁴ He kī e Maratuka: —ꞌĒ-ē, ko ꞌite ꞌana e au e ora haka ꞌou rō ꞌi te hora haka ora i te nuꞌu mate ꞌi te mahana o te ture hopeꞌa.

²⁵ He kī ia e Ietū: —Ko au te meꞌe haka ora i te taŋata mai te mate. ꞌE ko au te meꞌe vaꞌai i te ora. Te taŋata ⌊haka moe i te manaꞌu⌋ ꞌi ruŋa i a au, ka mate atu, e ora haka ꞌou nō.

²⁶ ꞌE te taŋata ora haka moe i te manaꞌu ꞌi ruŋa i a au, ki te hora hopeꞌa e ko haka tapa mai muri i te ꞌAtua. ¿E haka moe rō ꞌana koe i tuꞌu manaꞌu ꞌi ruŋa i te meꞌe nei?

²⁷ He pāhono e Maratuka: —ꞌĒ-ē. Mōꞌoku, a koe he ⌊Kiritō⌋, he Poki o te ꞌAtua mo oho mai ki te ao nei.

He taŋi iŋa o Ietū

²⁸ I oti era a Maratuka i te kī i te meꞌe nei, he hoki ki muri i tū taina era ōꞌona ko Māria ꞌe he hāꞌumu-ꞌumu: «ꞌĪ te Maꞌori ꞌi nei. Ko kī mai ꞌana mo oho ōꞌou».

²⁹ I ŋaroꞌa era e Māria i tū vānaŋa era, he eꞌa he oho ki te kona era ꞌi ira a Ietū.

³⁰ A Ietū ia kai oꞌo ꞌana ki Vētānia; ko te noho iŋa ꞌā ꞌi tū kona piri era ki a Maratuka.

³¹ I takeꞌa era e te nuꞌu hūrio o ira e hōrou rō ꞌā a Māria i eꞌa ai, he eꞌa he oho ꞌi tuꞌa ꞌi te manaꞌu he oho he taŋi ꞌi te kona tanu o Rātaro.

³² I tuꞌu era a Māria ki tū kona era ꞌi ira a Ietū, he tū-turi he kī: —E te Maꞌori, ꞌāhani koe ꞌi nei, e ko mate tōꞌoku taina.

³³ I takeꞌa era e Ietū i te rahi o te taŋi o Māria ananake ko te nuꞌu hūrio o muri, he oꞌo te māui-ui ki roto i te māhatu ꞌe he haka ꞌaroha rō atu ꞌai.

³⁴ He ꞌui ia: —¿ꞌI hē tōꞌona hakari? He pāhono e kuā Māria: —Mai ki oho ki haka takeꞌa atu.

³⁵ He pariŋi te matavai o Ietū.

³⁶ He kī ia e te hūrio: «¡Ka uꞌi rā kōrua: e haŋa rahi rō ꞌā ki rā kope!».

³⁷ He kī e te tētahi o rā nuꞌu: «O te taŋata era i haka ora i te mata o te taŋata matapō. ¿Kai ai hō tāꞌana rāveꞌa mo taꞌe mate o Rātaro?».

He haka ora iŋa i a Rātaro

³⁸ He haka hāhine ia a Ietū ki te kona era ꞌi ira te hakari o Rātaro koia ko haka ꞌaroha. Te kona nei he ꞌana e puru rō ꞌā hai māꞌea nui-nui e tahi.

³⁹ He kī e Ietū: —Ka ketu te māꞌea ena. He pāhono e Maratuka: —E Ietū, ka hā mahana o te mate; ko piro atu ꞌā e noho mai ena.

⁴⁰ He kī haka ꞌou e Ietū: —¿Kai kī atu ꞌō e au, mo haka moe mai ōꞌou i tuꞌu manaꞌu ꞌi ruŋa i a au, he takeꞌa e koe i te pūai o te ꞌAtua?

⁴¹ He ketu ia e te nuꞌu i rā māꞌea. He uꞌi a Ietū a te raŋi ꞌe he kī: «E Koro ōꞌoku ē, he māuru-uru atu a au ꞌo tuꞌu haka roŋo mai.

⁴² E ꞌite rō ꞌana e au e haka roŋo rō mai ꞌā koe i tāꞌaku vānaŋa. E kī atu ena a au i te meꞌe nei mo te riva-riva o te nuꞌu nei, mo aŋi-aŋi e rāua: ꞌāꞌau a au i uŋa mai».

⁴³ I oti era te kī i tū meꞌe era, he ohu: «¡E Rātaro, ka eꞌa mai koe mai nā!».

⁴⁴ He eꞌa ia a Rātaro ko ora haka ꞌou ꞌā, ko te viri iŋa ꞌana te hakari ꞌe te ꞌāriŋa hai kahu viri o te nuꞌu mate. He kī ia e Ietū: «Ka kume-kume te kahu ꞌai ka haka rē rō i a ia ki haꞌere».

He haꞌaꞌau iŋa mo ꞌa-ꞌaru i a Ietū

⁴⁵ Meꞌe rahi o tū nuꞌu hūrio oho era ꞌi muri i a kuā Māria, i takeꞌa era i tū meꞌe aŋa era e Ietū, he haka moe rō ꞌai i te manaꞌu ꞌi ruŋa i a ia.

⁴⁶ Ka ai atu pē ira, he eꞌa he oho te tētahi o rā nuꞌu he ꞌaꞌamu i rā meꞌe ki te ⌊fariseo⌋.

⁴⁷ Te fariseo ꞌe te ⌊oromatuꞌa⌋ ra-rahi he haka taka-taka tahi i te ⌊nūnaꞌa taŋata i a rāua te kī iŋa hopeꞌa o te haka tere hūrio⌋ ꞌe he kī: —¿He aha te tātou meꞌe ka aŋa nei? Ko rahi ꞌā te mana aŋa e te taŋata era.

⁴⁸ Mo haka rē nō o tātou mo aŋa mo oho i tāꞌana meꞌe ena e aŋa mai ena, te taŋata taꞌatoꞌa he haka moe i te manaꞌu ꞌi ruŋa i a ia, ꞌe te nuꞌu ra-rahi o te rōmano he oho mai he haka marere i te tātou ⌊Kona Haꞌamuri ꞌAtua⌋ ꞌe he haka kore i te tātou haka tere iŋa.

⁴⁹ E tahi o rā nuꞌu ko Kaifā, he oromatuꞌa hopeꞌa o te ra-rahi o rā matahiti, he kī: —A kōrua e vānaŋa tahaŋa nō ꞌā.

⁵⁰ ¿Kai aŋi-aŋi ꞌana ꞌō i hau rō atu ꞌi te tano mo mate o te taŋata e tahi mo te taꞌatoꞌa ki te haka kore e te rōmano i a tātou ꞌe i te tātou haka tere iŋa?

⁵¹ I kī ai i rā meꞌe e Kaifā taꞌe hai manaꞌu ōꞌona. ꞌO te ai he oromatuꞌa hopeꞌa o te ra-rahi o rā matahiti, i haka vānaŋa ai e te ꞌAtua pa he perofeta mo haka ꞌite pē nei ē: e mate rō a Ietū mo te hūrio taꞌatoꞌa.

⁵² ꞌE taꞌe mo te hūrio nō ka mate era, takoꞌa mo haka taka-taka tahi i te ŋā poki o te ꞌAtua ꞌi te henua taꞌatoꞌa.

⁵³ Mai rā mahana te nuꞌu ra-rahi o te hūrio i haꞌamata i kī ai mo tiŋaꞌi mo haka mate i a Ietū.

⁵⁴ ꞌO ira a Ietū i taꞌe haꞌere haka ꞌou ai a te kona rahi o te taŋata o Hūrea. He oho ki te kona e tahi hāhine ki te kona ꞌone taꞌe noho taŋata te ꞌīŋoa ko Efaraine. ꞌI ira i noho ai ananake ko tāꞌana nuꞌu hāpī.

⁵⁵ Mahana taꞌe rahi nō te mahana toe mo te ⌊ŋoŋoro o te Pakate⌋, ꞌe meꞌe rahi taŋata e oho era ki Hērutarema mo ⌊haka maꞌitaki⌋ i a rāua pa he meꞌe kī e te rāua haka tere iŋa, he meꞌe raꞌe o rāua mo aŋa ki te tuꞌu iŋa mai o rā ŋoŋoro.

⁵⁶ Te nuꞌu ia e kimi ꞌana i a Ietū, ꞌe ꞌi te Kona Haꞌamuri ꞌAtua e ꞌui era ki a rāua ꞌā: «¿Pē hē ki te kōrua kī? ¿E tuꞌu rō mai ki te ŋoŋoro nei ꞌo ꞌina?».

⁵⁷ Ko kī era ꞌana, paꞌi, e te fariseo ꞌe e te ŋā oromatuꞌa ra-rahi era: kope nō era mo takeꞌa i a Ietū e haka ꞌite ki a rāua mo haka ꞌa-ꞌaru mo haka puru.