ꞌEvereo 4 - Rapa Nui

¹ ꞌE hora nei, hora e ai nō ꞌā mo tātou te meꞌe hōrea mai e te ꞌAtua pē nei ē: he oꞌo ki te kona haka riva-riva e ia mo haka ora, e uꞌi ꞌo taꞌe ravaꞌa rō mo oꞌo e tahi o tātou.

² Te roŋo riva-riva nei ko haka ꞌite mai ꞌana ki a tātou ꞌe pē ira takoꞌa ꞌana ki te tātou tupuna. I hopeꞌa ai kai ai pa he meꞌe riva-riva mo rāua, he taꞌe ⌊haka moe i te manaꞌu⌋ ꞌi ruŋa i te ꞌAtua ꞌe ꞌi ruŋa i tāꞌana roŋo.

³ ꞌE a tātou, te nuꞌu haka moe i te manaꞌu ꞌi ruŋa i a ia, e oꞌo rō ki roto i te haka ora o te ꞌAtua. ꞌE mo te nuꞌu taꞌe haka moe i te manaꞌu ꞌi ruŋa i a ia i kī ai e te ꞌAtua: «ꞌI roto i tōꞌoku riri a au i hōrea ai: “Ki te hora hopeꞌa ꞌina a rāua e ko oꞌo ki te kona haka riva-riva era e au mo haka ora o rāua”». Te haka ora nei o te ꞌAtua ko haka riva-riva era ꞌā mai te aŋa iŋa era ōꞌona i te ao.

⁴ ꞌE ꞌi ruŋa i te ⌊Pāpaꞌi Moꞌa⌋ e kī ena o ruŋa i te hitu mahana: «Te ꞌAtua i haka ora ai mai tāꞌana aŋa ꞌi te hitu mahana».

⁵ E kī takoꞌa rō ꞌana pē nei ē: «ꞌIna e ko oꞌo ki tōꞌoku haka ora nei».

⁶ ꞌE e ai nō ꞌana te nuꞌu mo oꞌo ki roto i te haka ora nei; te nuꞌu ꞌite raꞌe era, paꞌi, o ruŋa, ꞌina kai oꞌo he taꞌe haꞌatura ki te ꞌAtua.

⁷ ꞌO ira te ꞌAtua i vaꞌai haka ꞌou mai ai i te mahana mo oꞌo ki roto, ꞌe rā mahana ko ꞌaŋarīnā. I haka ꞌite mai ai hai meꞌe kī e ⌊Tāvita⌋ ꞌi ruŋa i te Pāpaꞌi Moꞌa ko rahi atu ꞌā te matahiti mai te noho iŋa o rā nuꞌu ꞌite raꞌe era, he meꞌe haka ꞌite atu era e au pē nei ē: «Mo ŋaroꞌa e kōrua ꞌi ꞌaŋarīnā i te meꞌe kī atu e te ꞌAtua, ꞌina ko haka hio-hio te manaꞌu».

⁸ ꞌĀhani te haka ora vaꞌai e ⌊Kosuē⌋ ki te itaraera he haka ora hōrea e te ꞌAtua mo tōꞌona taŋata, e ko vānaŋa mai ia e te ꞌAtua o ruŋa i te mahana haka ꞌou e tahi mo oꞌo ki roto i tōꞌona haka ora.

⁹ Pē ira a tātou e ꞌite nei e ai nō ꞌana te haka ora haka riva-riva e te ꞌAtua mo tōꞌona taŋata.

¹⁰ Te kope oꞌo ki roto i te haka ora nei, he haka ora mai tāꞌana aŋa, pa he haka ora iŋa era o te ꞌAtua mai tāꞌana aŋa.

¹¹ ꞌO ira, ki vaꞌai tahi tātou i a tātou mo oꞌo ki roto i tōꞌona haka ora, ꞌo taꞌe oꞌo rō e tahi o tātou, pa he nuꞌu taꞌe haꞌatura era ki te ꞌAtua.

¹² Te vānaŋa o te ꞌAtua vānaŋa ora ꞌe vānaŋa pūai. ꞌAta hau rō atu ꞌi te kaꞌi-kaꞌi ki te hoe kaꞌi-kaꞌi ararua pāꞌiŋa. E oꞌo ena ki roto nui atu era o te māhatu ꞌe o te vārua, ꞌe ꞌātā ki te kona hopeꞌa mau era o te manaꞌu taŋata, ꞌe ꞌāꞌana te haka ꞌite i te manaꞌu ꞌe i te meꞌe haŋa mau o te māhatu.

¹³ ꞌIna e tahi meꞌe o te meꞌe aŋa e te ꞌAtua mo taꞌe takeꞌa e ia; tōꞌona mata ꞌi ruŋa i te meꞌe taꞌatoꞌa, ꞌe ki a ia tātou ka kī ena i te tātou meꞌe i aŋa.

A Ietū he ⌊oromatuꞌa⌋ māhatu ꞌaroha

¹⁴ A Ietū, Poki o te ꞌAtua, he oromatuꞌa hopeꞌa o te ra-rahi o tātou ꞌi te raŋi. ꞌO ira, e haka moe e oho tātou i te manaꞌu ꞌi ruŋa i a ia.

¹⁵ Te tātou oromatuꞌa hopeꞌa nei o te nui-nui e aŋi-aŋi rō ꞌā i te huru taꞌe pūai nei o tātou o te taŋata. ꞌI muꞌa ꞌana, paꞌi, i haka ꞌatu takoꞌa rō i a ia mo hara e Rukifero, pa he haka ꞌatu iŋa mai nei i a tātou. Te meꞌe nō, ꞌina a ia kai hara ki te hora hopeꞌa.

¹⁶ ꞌO ira, ꞌina tātou ko riꞌa-riꞌa mo haka hāhine hai pure ki te ꞌAtua, ki haka ꞌaroha mai ai i a tātou ꞌe, ꞌi tōꞌona riva rahi, e hāꞌūꞌū rō mai ꞌi te hora o te ꞌati.