ꞌEvereo 3 - Rapa Nui

I hau rō atu a Ietū ki a ⌊Mōtē⌋

¹ ꞌO ira, e te taina ē, a kōrua, te nuꞌu haꞌataꞌa ꞌe haŋa e te ꞌAtua mo tuꞌu ki muri i a ia ꞌi te raŋi, e manaꞌu riva-riva o ruŋa i a Ietū, he kope ꞌi ruŋa i a ia a tātou e haka moe ena i te manaꞌu. A ia he kope uŋa mai e te ꞌAtua mo ⌊oromatuꞌa hopeꞌa o te ra-rahi⌋ o tātou.

² ꞌE ꞌa Ietū, kope haꞌataꞌa e te ꞌAtua mo rā aŋa, i aŋa tahi rō i te meꞌe kī e te ꞌAtua mo aŋa. Pē ira ꞌana a Mōtē, i aŋa tahi rō i te meꞌe kī e te ꞌAtua mo aŋa hora haka tere era e ia i tōꞌona taŋata.

³ Ka ai atu pē ira, mo te ꞌAtua, ꞌata hau rō atu a Ietū ki a Mōtē, pa he oho iŋa ena i hau rō atu te kope ꞌāꞌana te hare i aŋa, ki rā hare mau ꞌā.

⁴ Taꞌatoꞌa hare i ai rō te taŋata ꞌāꞌana i aŋa, ꞌe te meꞌe taꞌatoꞌa e ai ena o te ꞌAtua i aŋa.

⁵ A Mōtē, pa he tāvini o te ꞌAtua, kai taꞌe aŋa i te meꞌe taꞌatoꞌa kī e te ꞌAtua mo aŋa hora haka tere era e ia i tōꞌona taŋata, ꞌe rā aŋa era ꞌāꞌana he haꞌaauraꞌa o te meꞌe ka haka ꞌite era e te ꞌAtua pe muꞌa ka oho era.

⁶ Pē ira ꞌā te ⌊Kiritō⌋, ꞌina e ko taꞌe aŋa i te meꞌe taꞌatoꞌa kī e te ꞌAtua mo aŋa. Te meꞌe topa kē ōꞌona, a ia he Poki o te ꞌAtua, ꞌe pa he Poki o te ꞌAtua e haka tere ꞌe e hāpaꞌo ena i te nuꞌu taꞌatoꞌa o te ꞌAtua, ꞌe rā nuꞌu ko tātou ana maꞌu hio-hio ana oho nō tātou i te manaꞌu ꞌi ruŋa i a ia, ꞌe ana tiaki hai koa i te meꞌe taꞌatoꞌa hōrea mai e ia.

ꞌIna ko haka hio-hio te kōrua māhatu

⁷ ꞌO ira, pa he meꞌe kī e te ⌊Vārua Maitai⌋ ꞌi ruŋa i te ⌊Pāpaꞌi Moꞌa⌋: «Mo ŋaroꞌa e kōrua ꞌi ꞌaŋarīnā i te meꞌe kī atu e te ꞌAtua,

⁸ ꞌina ko haka hio-hio te kōrua manaꞌu, pa he nuꞌu era ꞌi te kona ꞌone taꞌe noho taŋata taꞌe haꞌatura era ki te ꞌAtua, aŋa era i te meꞌe taꞌe tano mo uꞌi ꞌātā ki hē te roa ka haꞌaoromaꞌi era e ia.

⁹ ꞌI ira te kōrua tupuna i haka ꞌatu mai ai i a au, ka ai atu i takeꞌa rō i te mana aŋa e au ꞌi roto i te matahiti e maha ꞌahuru.

¹⁰ ꞌO ira a au i riri ai ꞌe i kī ai mo te nuꞌu era: “Taꞌe te rāua māhatu ꞌi ruŋa i a au, ꞌe ꞌina he haŋa mo haꞌatura mai”.

¹¹ ꞌE ꞌi roto i tōꞌoku riri a au i hōrea ai: “Ki te hora hopeꞌa ꞌina a rāua e ko oꞌo ki te kona haka riva-riva era e au mo haka ora o rāua”».

¹² E te taina, e uꞌi ꞌo ai te kōrua māhatu taꞌe tano taꞌe ⌊haka moe i te manaꞌu⌋ ꞌi ruŋa i te ꞌAtua ora, ꞌo haꞌataꞌa rō kōrua mai muri i a ia.

¹³ Te meꞌe mo aŋa paurō te mahana mai ora ꞌā kōrua, he hatu ki te rua mo haka noho mo oho i te manaꞌu ꞌi ruŋa i te ꞌAtua, ꞌo reo-reo atu e te hara, ꞌo hio-hio te māhatu, ꞌo taꞌe haŋa haka ꞌou mo haꞌatura ki a ia.

¹⁴ E te taina, mo haka moe mo oho nō tātou i te manaꞌu ꞌi ruŋa i a Ietū ki te hora hopeꞌa pa he hora raꞌe era ꞌā, mo tātou takoꞌa te meꞌe taꞌatoꞌa ꞌa Ietū Kiritō.

¹⁵ ꞌO ira e kī ena: «Mo ŋaroꞌa e kōrua ꞌi ꞌaŋarīnā i te meꞌe kī atu e te ꞌAtua, ꞌina ko haka hio-hio te kōrua manaꞌu pa he nuꞌu taꞌe haꞌatura era ki a ia».

¹⁶ ¿Ko ai tū nuꞌu taꞌe haꞌatura era ki te ꞌAtua hora ŋaroꞌa era i tōꞌona reꞌo? He nuꞌu taꞌatoꞌa haka eꞌa era e Mōtē mai Ehipto.

¹⁷ ¿Mo kuā ai te ꞌAtua i riri ai ꞌi te ŋā matahiti era e maha ꞌahuru? Mo te nuꞌu hara mā-mate era ꞌi te kona ꞌone taꞌe noho taŋata.

¹⁸ ꞌE ¿ki a ai i kī ai e te ꞌAtua e ko oꞌo a rāua ki te kona haka riva-riva e ia mo haka ora? Ki te nuꞌu taꞌe haꞌatura era ki a ia.

¹⁹ ꞌE, he aŋi ꞌā, ꞌina mau ꞌā a rāua kai oꞌo, he taꞌe haka moe i te manaꞌu ꞌi ruŋa i te ꞌAtua.