ꞌEvereo 11 - Rapa Nui

Te haka moe iŋa o te manaꞌu ꞌi ruŋa i te ꞌAtua

¹ ¿Pē hē e ꞌite ena ko haka moe mau ꞌana a tātou i te manaꞌu ꞌi ruŋa i te ꞌAtua? Hai ꞌite e tātou pē nei ē: he parautiꞌa mau ꞌā e ai rō i a tātou te meꞌe e tiaki nei, ꞌe he parautiꞌa takoꞌa mo tātou e ai mau rō ꞌā te ŋā meꞌe ena ꞌina e tātou he takeꞌa.

² He haka moe o te tātou tupuna i te rāua manaꞌu ꞌi ruŋa i te ꞌAtua i tano ai ki tōꞌona mata.

³ He haka moe o tātou i te manaꞌu ꞌi ruŋa i te ꞌAtua e ꞌite nei: hai vānaŋa era ꞌāꞌana i aŋa ai i te ao. Te meꞌe taꞌatoꞌa e tātou e takeꞌa ena i aŋa ai mai te meꞌe taꞌe takeꞌa.

⁴ He haka moe o ⌊ꞌĀvere⌋ i te manaꞌu ꞌi ruŋa i te ꞌAtua i aŋa ai i te tūtia ꞌata hau rō atu ki te tūtia aŋa e tōꞌona taina ko ⌊Kāiŋa⌋. ꞌO ira te ꞌAtua i kī ai e tano rō ꞌā ki tōꞌona mata, ꞌe he koa mo tāꞌana tūtia. ꞌE hora nei, ka ai atu ko mate ꞌana a ꞌĀvere, ko te noho iŋa ꞌā te haꞌaauraꞌa ōꞌona: he hauhaꞌa o tōꞌona haka moe iŋa era i te manaꞌu ꞌi ruŋa i te ꞌAtua.

⁵ He haka moe o ꞌĒnoko i te manaꞌu ꞌi ruŋa i te ꞌAtua i toꞌo ora ai ki te raŋi, ꞌe ꞌina kai takeꞌa haka ꞌou. ꞌI ruŋa i te ⌊Pāpaꞌi Moꞌa⌋ e kī ena mo ꞌĒnoko hora era kai toꞌo ꞌā ki te raŋi: he kope tano ki te mata o te ꞌAtua.

⁶ ꞌIna e tahi taŋata taꞌe ⌊haka moe i te manaꞌu⌋ ꞌi ruŋa i te ꞌAtua mo tano ki tōꞌona mata. Mo hāhine ki a ia, e ai he parautiꞌa mau ꞌā mōꞌou e ai rō ꞌā te ꞌAtua ꞌe e ai rō ꞌana te meꞌe mo vaꞌai ki te nuꞌu kimi i a ia.

⁷ He haka moe o Nōē i te manaꞌu ꞌi ruŋa i te ꞌAtua i aŋa ai i te pahī ꞌo mate tāꞌana huaꞌai hora kī era e te ꞌAtua e topa rō te meꞌe kai takeꞌa hia ꞌā e te mata o te taŋata. ꞌE ꞌi tōꞌona haꞌatura ki te ꞌAtua i takeꞌa ai: te taŋata taꞌatoꞌa o rā hora e aŋa rō ꞌana i te meꞌe taꞌe tano, ꞌe e tano rō ꞌana mo haka ūtuꞌa e te ꞌAtua. ꞌE a Nōē i tano ai ki te mata o te ꞌAtua ꞌo te haka moe i tōꞌona manaꞌu ꞌi ruŋa i a ia.

⁸ He haka moe o ⌊ꞌAparahama⌋ i te manaꞌu ꞌi ruŋa i te ꞌAtua i haꞌatura ai, ꞌe i eꞌa i oho ai mai tōꞌona kāiŋa hora kī era e te ꞌAtua mo oho ki te henua vaꞌai mo rāua, ka ai atu ꞌina kai ꞌite hia ki hē a ia ka oho era.

⁹ ꞌE he haka moe ōꞌona i te manaꞌu ꞌi ruŋa i te ꞌAtua, i noho ai pa he taŋata o te rua kona ꞌi te henua e ai rō mo rāua pe muꞌa ka oho era, henua hōrea era e te ꞌAtua mo vaꞌai. ꞌI roto i te karapā e noho era; pē ira ꞌana tāꞌana poki ko Itaꞌata ꞌe tōꞌona makupuna ko Hākovo, i a rāua takoꞌa rā hōrea era o te ꞌAtua.

¹⁰ A ꞌAparahama i aŋa ai i te meꞌe nei e tiaki e oho ꞌana ki te kona mau era mo noho ꞌina he hopeꞌa raꞌa, he kona manaꞌu ꞌe aŋa e te ꞌAtua.

¹¹ He haka moe i te manaꞌu ꞌi ruŋa i te ꞌAtua, a Tara, viꞌe ꞌa ꞌAparahama, ka ai atu he paꞌa ꞌe ko rūꞌau riva-riva ꞌā, i tupu nō te poki ꞌo te ꞌite e ko taꞌe haka tano e te ꞌAtua i tāꞌana meꞌe hōrea.

¹² Pē ira ꞌana a ꞌAparahama, ka ai atu ko korohuꞌa riva-riva ꞌana, i rahi nō tōꞌona hakaara pa he hetuꞌu ena ꞌā o te raŋi, ꞌe pa he ꞌone o te taha-taha tai e ko oti mo tataku.

¹³ Te nuꞌu taꞌatoꞌa nei i mā-mate ai e haka moe nō ꞌana i te manaꞌu ꞌi ruŋa i te ꞌAtua, ka ai atu ꞌina kai ai hia ꞌā i a rāua te meꞌe hōrea era e te ꞌAtua. A rāua, paꞌi, e ꞌite rō ꞌana: pe muꞌa ka oho ena i a rāua rā ŋā meꞌe taꞌatoꞌa, ꞌe e koa rō ꞌā o ruŋa. ꞌE e aŋi-aŋi rō ꞌana ꞌe e kī rō ꞌana: te ao nei taꞌe he kāiŋa mau o rāua.

¹⁴ Te nuꞌu kī era pē ira e haka ꞌite mai ꞌana ko te kimi ko te oho iŋa ꞌana i te kāiŋa mo rāua.

¹⁵ ꞌĀhani e manaꞌu rō ꞌā: te rāua kāiŋa mau he kona era mai ira i eꞌa ai, e ko taꞌe hoki ia ki ira.

¹⁶ Te meꞌe haŋa mau o rāua he kāiŋa ꞌata riva-riva, te auraꞌa, he kāiŋa era ꞌi te raŋi. ꞌO ira te ꞌAtua e taꞌe haꞌamā ena mo kī he ꞌAtua a ia o rāua; ko haka riva-riva ꞌana, paꞌi, e ia i te kona mo rāua mo noho.

¹⁷ He haka moe o ꞌAparahama i te manaꞌu ꞌi ruŋa i te ꞌAtua i maꞌu ai i tāꞌana poki ko Itaꞌata mo vaꞌai pa he tūtia hora haka ꞌatu era i a ia e te ꞌAtua. Te haŋa o ꞌAparahama he haka tano i te meꞌe uŋa era mo aŋa, ka ai atu e tahi mau nō ꞌāꞌana poki ꞌe ko hōrea ꞌana e te ꞌAtua:

¹⁸ «Hai Itaꞌata ka ai ena tuꞌu hakaara».

¹⁹ He ꞌite o ꞌAparahama e ko taꞌe haka tano e te ꞌAtua i tāꞌana meꞌe kī, ꞌe i te ꞌAtua te pūai mo haka ora i te taŋata mai te mate, i aŋa ai i te meꞌe kī era e te ꞌAtua. Mōꞌona, paꞌi, he ravaꞌa haka ꞌou e ia i rā poki era ꞌāꞌana mai te mate.

²⁰ He haka moe o Itaꞌata i te manaꞌu ꞌi ruŋa i te ꞌAtua i haꞌamaitai ai i a ⌊Hākovo⌋ ararua ko ⌊Etaū⌋, he ŋā poki ꞌāꞌana, ꞌo te ꞌite: pe muꞌa ka oho ena e ai rō te meꞌe riva-riva o te ꞌAtua mo rāua.

²¹ He haka moe o Hākovo i te manaꞌu ꞌi ruŋa i te ꞌAtua, hora oho era mo mate, e toŋa rō ꞌana hai toko-toko, i haꞌamaitai ai i te ŋā poki ꞌa ⌊Kōsē⌋ ꞌe i haꞌamuri ai ki te ꞌAtua.

²² He haka moe o Kōsē i te manaꞌu ꞌi ruŋa i te ꞌAtua i haka ꞌite ai ki te itaraera, ꞌi te hora era he mate, e eꞌa rō a rāua pe muꞌa ka oho ena mai te henua era ko Ehipto, ꞌe he aha te rāua meꞌe mo aŋa ki tōꞌona hakari.

²³ He haka moe i te manaꞌu ꞌi ruŋa i te ꞌAtua te ŋā matuꞌa era o ⌊Mōtē⌋, ka ai atu ko kī ꞌā e te ꞌariki: te ŋā poki tane itaraera taꞌatoꞌa e tiŋaꞌi e haka mate, i naꞌa nō e toru ꞌāvaꞌe i te poki nehe-nehe poreko iho era o rāua ko Mōtē.

²⁴ He haka moe o Mōtē i te manaꞌu ꞌi ruŋa i te ꞌAtua i taꞌe haŋa haka ꞌou ai, ko paꞌari ꞌā, mo kī: he poki a ia o te poki vahine o te ꞌariki.

²⁵ ꞌAta hau rō atu, paꞌi, te haŋa mo tōtōā i a ia e te ehipto ꞌi muri i tōꞌona taŋata he itaraera ki te noho ki te oho e koa rō ꞌā ꞌi roto i te hara.

²⁶ Tōꞌona manaꞌu: i hau rō atu mōꞌona te ꞌamo i te ꞌati topa ꞌi ruŋa i te nuꞌu ŋatu i te haŋu ki te ⌊Mētia⌋ mo uŋa mai e te ꞌAtua ki te ai i a ia te hauhaꞌa o Ehipto; a ia, paꞌi, e tiaki ꞌana ki te meꞌe hopeꞌa o te riva-riva mo vaꞌai e te ꞌAtua.

²⁷ He haka moe o Mōtē i te manaꞌu ꞌi ruŋa i te ꞌAtua i eꞌa i oho ai mai te henua era ko Ehipto ꞌina kai riꞌa-riꞌa ꞌo riri te ꞌariki. He oho mau rō ꞌai ꞌe ꞌina kai hārui haka ꞌou a tuꞌa; e tuꞌu rō ꞌā pa he meꞌe ena ē: tōꞌona mata ꞌi ruŋa i te ꞌAtua ꞌā.

²⁸ He haka moe o Mōtē i te manaꞌu ꞌi ruŋa i te ꞌAtua i aŋa ai i te ⌊ŋoŋoro o te Pakate⌋, pa he meꞌe kī e te ꞌAtua. He uŋa he haka paru hai toto i te ꞌōpani o te hare o te hakaara taꞌatoꞌa o ⌊Itaraera⌋, mo vari roa-roa o te merahi o te mate, ꞌo tiŋaꞌi i te ŋā poki ꞌatariki tane o te itaraera hora tiŋaꞌi era i te ŋā poki ꞌatariki tane o te ehipto.

²⁹ He haka moe i te manaꞌu ꞌi ruŋa i te ꞌAtua i haꞌere i oho ai te itaraera a vāeŋa tini o Vaikava Mea-mea ki te rua pāꞌiŋa pa he meꞌe: e haꞌere ꞌana a te ara paka-paka hora ꞌāvahi era e te ꞌAtua i te vaikava. ꞌE i oho era te ehipto ꞌi tuꞌa, he emu tahi rō atu ꞌai.

³⁰ He haka moe o te itaraera i te manaꞌu ꞌi ruŋa i te ꞌAtua i haka teka i haka vari ai e hitu mahana a te kona era ko Herikō, ꞌe he marua tahi rō ꞌai te ꞌāua ruŋa nui puru o ira.

³¹ He haka moe i te manaꞌu ꞌi ruŋa i te ꞌAtua te taiꞌo era ko Rāhava i taꞌe mate ai ꞌi muri i te nuꞌu taꞌatoꞌa o Herikō taꞌe haꞌatura ki te ꞌAtua, ꞌo te hāꞌūꞌū ki te ŋāŋata itaraera oho piko uꞌi i rā kona.

³² ¿He aha tāꞌaku meꞌe haka ꞌou mo kī atu? ꞌIna he hora mo ꞌaꞌamu tahi atu o ruŋa i a Kereone, o Vāraka, o Tamatona, o Hefetē, o ⌊Tāvita⌋, o ⌊Tamuere⌋ ꞌe o te perofeta taꞌatoꞌa.

³³ He haka moe i te manaꞌu ꞌi ruŋa i te ꞌAtua te ŋā nuꞌu nei ꞌe te tētahi atu i rē ai i te tamaꞌi ꞌe i ravaꞌa henua ai, i haka tere ai i te taŋata hai tī-tika, i ai ai i a rāua te meꞌe hōrea e te ꞌAtua, i puru ai i te haha o te reone,

³⁴ i tiŋaꞌi ai i te ahi taparahi-taꞌata, i taꞌe mate ai ꞌi te hoe, i ai ai te pūai ka ai atu ꞌina he haŋu o rāua, i riro ai he ꞌaito o te tamaꞌi ꞌe i rē ai ki te vaꞌehau o te rua henua.

³⁵ He haka moe i te manaꞌu ꞌi ruŋa i te ꞌAtua te tētahi ŋā viꞌe i ravaꞌa haka ꞌou ai i te rāua huaꞌai mai te mate ꞌe te tētahi nuꞌu i mā-mate ai i tōtōā he taꞌe haŋa mo hārui i te ꞌAtua hai tuaꞌivi ꞌi te tiaki ki te noho iŋa riva-riva ꞌi te raŋi ki ora haka ꞌou rāua mai te mate.

³⁶ Tētahi atu i haka meꞌe-meꞌe ꞌe i tiŋaꞌi hai ꞌuaka, ꞌe ꞌātā i here-here hai vivi ꞌe i puru ꞌi roto i te hare maꞌuꞌaurī.

³⁷ ꞌE tētahi i mate ai i tamaꞌi hai māꞌea, i hore hai hia-hia a vāeŋa ꞌe i ꞌo-ꞌoka hai hoe. Ki kona era ki e kona era i hāꞌere i oho ai e uru rō ꞌana i te kahu aŋa hai kiri o te māmoe ꞌe o te vato-vato. A rāua nuꞌu veve, ꞌamo i te ꞌati ꞌe tōtōā e te rua.

³⁸ A te kona taꞌatoꞌa nō i oho ai: a te kona ꞌone taꞌe noho taŋata ꞌe a ruŋa i te maꞌuŋa; ꞌe e noho era ꞌi roto i te ꞌana ꞌe ꞌi roto i te pū. Te parautiꞌa, te nuꞌu hara o te ao nei nuꞌu taꞌe tano mo hokorua i te nuꞌu tuꞌu pē nei.

³⁹ Ka ai atu te nuꞌu taꞌatoꞌa nei e tano rō ꞌana ki te mata o te ꞌAtua ꞌo te haka moe i te manaꞌu ꞌi ruŋa i a ia, kai takeꞌa i te haka tano iŋa o te ꞌAtua i tāꞌana meꞌe hōrea era i mā-mate rō ai.

⁴⁰ I aŋa ai e te ꞌAtua pē ira he manaꞌu ki a tātou ꞌe ki te meꞌe ꞌata hau rō atu o te riva-riva: ꞌi te hora ka haka tano ena e ia i tāꞌana hōrea, te auraꞌa, ꞌi te hora ka maꞌu ena i tāꞌana nuꞌu ki te raŋi mo noho ꞌi muri i a ia, a tātou taꞌatoꞌa ananake ko rā ŋā nuꞌu.