ꞌEvereo 1 - Rapa Nui

Te Poki o te ꞌAtua

¹ ꞌI muꞌa ꞌā, i rahi rō te mahana ꞌe hai rauhuru nō atu rāveꞌa i vānaŋa ai te ꞌAtua ki te tātou tupuna hai tāꞌana ŋā perofeta era.

² ꞌE hora nei, ꞌi te ŋā hora hopeꞌa nei, ko vānaŋa mai ꞌā hai Poki era ꞌāꞌana, kope hai ia i aŋa ai i te ao ꞌe ki a ia i vaꞌai tahi ai i te parau o te meꞌe taꞌatoꞌa.

³ Te ꞌana-ꞌana ꞌe te pūai nui-nui o te ꞌAtua e takeꞌa ena ꞌi ruŋa i tāꞌana Poki; a ia he ꞌāriŋa mau ꞌā o te ꞌAtua, ꞌe ꞌāꞌana te haka noho i te meꞌe taꞌatoꞌa o te ao ꞌi tōꞌona kona hai kī mau nō e ia. I tuꞌu mai era ki te ao nei, he aŋa tahi i tāꞌana meꞌe taꞌatoꞌa mo aŋa mo haka kore e te ꞌAtua i te tātou hara. I oti tahi era nei aŋa, he hoki ki te raŋi ꞌe he noho ꞌi te pāꞌiŋa mataꞌu o te ꞌAtua.

⁴ Hai meꞌe nei i haka takeꞌa mai ai e te ꞌAtua i hau rō atu tāꞌana Poki ki te merahi. I a ia, paꞌi, te tōroꞌa ꞌata hau rō atu ki te tōroꞌa o te merahi.

Te Poki o te ꞌAtua i hau rō atu ki te merahi

⁵ Te ꞌAtua ꞌina kai kī ki te merahi pē nei ē: «He Poki koe ꞌāꞌaku, ꞌe ꞌi ꞌaŋarīnā he haka takeꞌa e au: a au he Matuꞌa ōꞌou». ꞌE ꞌina kai kī takoꞌa mo te merahi: «He ai a au he matuꞌa mōꞌona, ꞌe a ia mo poki ꞌāꞌaku».

⁶ ꞌE ꞌi te rua kona, hora haka ꞌite era i tāꞌana ꞌAtariki ki te ao, i kī ai: «E haꞌamuri ki a ia te merahi taꞌatoꞌa o te ꞌAtua».

⁷ Te meꞌe i kī e te ꞌAtua mo te merahi: «He maꞌuroŋo hōrou pa he tokerau, ꞌe he tāvini pa he ura ahi ena ꞌā».

⁸ ꞌE ki te Poki i kī ai: «Tuꞌu haka tere iŋa, e te ꞌAtua ē, ꞌina he hopeꞌa raꞌa, ꞌe hai tī-tika koe e haka tere ena.

⁹ Taꞌa meꞌe haŋa he meꞌe riva-riva ꞌe taꞌa meꞌe taꞌe haŋa he meꞌe taꞌe tano; ꞌo ira a au, tuꞌu ꞌAtua, i haka nui-nui ai i a koe, ꞌe i vaꞌai atu ai i te koa ꞌata hau rō atu ki tuꞌu ŋā hokorua ena».

¹⁰ E kī takoꞌa rō ꞌana ꞌi ruŋa i te Pāpaꞌi Moꞌa: «ꞌI te haꞌamata iŋa ꞌā, e te Pūꞌoko Haka Tere ē, i aŋa ai koe i te henua ꞌe ꞌāꞌau i aŋa takoꞌa i te raŋi.

¹¹ Te ŋā meꞌe ena e ŋaro rō, ꞌe ko koe te meꞌe ka taꞌe ŋaro ena ki te hora hopeꞌa. Te ŋā meꞌe ena e pau tahi rō pa he kahu;

¹² ¡e hā-hatu rō e koe pa he hā-hatu iŋa ena i te kahu, ꞌe e mono rō pa he mono iŋa ena ꞌā o te kahu! ꞌE a koe he noho mau rō ꞌai pē nā, ꞌe ꞌina he hopeꞌa raꞌa o tuꞌu ora».

¹³ ꞌIna te ꞌAtua kai kī ki te merahi: «Ka noho koe i tōꞌoku pāꞌiŋa mataꞌu, ꞌātā ka haka riro rō a au i te nuꞌu taꞌe haŋa atu he meꞌe mo raŋo o tuꞌu vaꞌe».

¹⁴ Te merahi taꞌatoꞌa, paꞌi, he vārua aŋa ki te ꞌAtua uŋa mo hāꞌūꞌū ki te nuꞌu eꞌa mai roto i te ūtuꞌa o te hara ꞌe ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.