2 Timoteo 3 - Rapa Nui

Te huru o te nuꞌu ꞌi te ŋā mahana hopeꞌa era

¹ E ꞌite takoꞌa koe: ꞌi te ŋā mahana hopeꞌa ena e ai rō te mahana taparahi-taꞌata.

² He ꞌino te taŋata, he haŋa ki te moni nō, he haka meꞌe i a rāua, he manaꞌu i a rāua mau nō te tano, he vānaŋa taꞌe tano mo te ꞌAtua, e ko haꞌatura ki te rāua matuꞌa, e ko ꞌite mo māuru-uru ꞌe ꞌina takoꞌa e ko moꞌa i te hāpī o te ꞌAtua.

³ E ko haka ꞌaroha ꞌe e ko haŋa ki te rua taŋata. He riro nuꞌu haꞌaꞌino, taꞌe hāito i te meꞌe kī ꞌe i te meꞌe aŋa, tōtōā i te rua ꞌe taꞌe haŋa ki te meꞌe tano.

⁴ E riro takoꞌa rō a rāua he taŋata hoꞌo i te rua, aŋa i te meꞌe ꞌina he manaꞌu hia, ꞌe haka paka i a rāua. ꞌE te meꞌe mau nō ka kimi era he reka, taꞌe he ꞌAtua.

⁵ E haka tuꞌu rō i a rāua pa he taŋata moꞌa ꞌe haꞌatura ki te ꞌAtua; ꞌe, hai haka tere iŋa o rāua, ka takeꞌa era ꞌina mau ꞌā he haꞌatura. ꞌIna e tahi aꞌa meꞌe mo aŋa ꞌi muri i te nuꞌu tuꞌu pē rā, e Timoteo ē.

⁶ O rāua, paꞌi, te nuꞌu oho ki hare era ki hare era ꞌe hai reo-reo e ravaꞌa ena mo haka tere i te ŋā viꞌe ꞌina he pūai o te manaꞌu, ꞌamo meꞌe rahi hara, ꞌe pohe ki te meꞌe taꞌe tano.

⁷ He haka roŋo nō te aŋa o te ŋā viꞌe nei ki nuꞌu era ki nuꞌu era, ꞌe ꞌina he aŋi-aŋi, ki te hora hopeꞌa, ꞌi hē mau te hāpī parautiꞌa o te ꞌAtua.

⁸ Te nuꞌu hāpī era i te ŋā viꞌe hai reo-reo he nuꞌu manaꞌu taꞌe tano, haka tapa i te rāua manaꞌu mai ruŋa i te ꞌAtua. Pa he taꞌe haka roŋo iŋa era ꞌā o Hane ararua ko Hampere ki a ⌊Mōtē⌋ te taꞌe haka roŋo o rā nuꞌu i te hāpī parautiꞌa o te ꞌAtua.

⁹ Te nuꞌu nei e ko ravaꞌa mo haka roŋo mo oho nō e te nuꞌu ki a rāua ka ꞌite rō ena e te taꞌatoꞌa pē nei ē: he nuꞌu maꞌa-maꞌa. He meꞌe nei te meꞌe i topa takoꞌa ki a Hane ararua ko Hampere.

He hatu iŋa ki a Timoteo

¹⁰ ꞌE a koe, e Timoteo ē, ko ꞌite riva-riva ꞌana i tāꞌaku meꞌe hāpī, i te huru o tōꞌoku noho iŋa, i tāꞌaku meꞌe haŋa mo aŋa, i tōꞌoku haka moe iŋa i te manaꞌu ꞌi ruŋa i a Ietū, i tōꞌoku haumārū, i tōꞌoku haŋa ki te rua ꞌe i tōꞌoku haꞌaoromaꞌi iŋa i te ꞌati hai pūai

¹¹ e tute mai era i a au mo tōtōā ꞌi te ŋā kona era ko Antiokia, ko Īkōnio ꞌe ko Rītara. ¡Meꞌe huru kē te rahi o te ꞌati a au i haꞌaoromaꞌi ai! ꞌE o te ꞌAtua au i hāꞌūꞌū mai mo eꞌa mai roto i rā ŋā ꞌati.

¹² ꞌĪ a au he kī atu: te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū Kiritō, haŋa mo riro o rāua he nuꞌu moꞌa ꞌe haꞌatura ki a ia, e ꞌite: he tute i a rāua e te nuꞌu taꞌe haŋa ki te ꞌAtua mo tōtōā.

¹³ ꞌE te ŋāŋata aŋa i te meꞌe taꞌe tano ꞌe te nuꞌu haka tuꞌu i a rāua pa he nuꞌu haka moe i te manaꞌu ꞌi ruŋa i a Ietū pe te ꞌata taꞌe riva-riva ka oho ena; te aŋa he reo-reo he oho nō ki te taŋata ꞌe, ꞌina he aŋi-aŋi, e reo-reo takoꞌa rō ꞌana ki a rāua.

¹⁴ ꞌE a koe, e maꞌu hio-hio te ŋā meꞌe hāpī atu era. Ko ꞌite ꞌana, paꞌi, e koe he parautiꞌa ꞌe ꞌa ꞌai i hāpī atu.

¹⁵ Mai tuꞌu ꞌiti-ꞌiti haŋa ꞌā i ꞌite rō ai a koe i te meꞌe o ruŋa i te ⌊Pāpaꞌi Moꞌa⌋, he meꞌe haka ꞌite ꞌe haka aŋi-aŋi atu pē nei ē: mo eꞌa mai roto i te ūtuꞌa o te hara e haka moe i te manaꞌu ꞌi ruŋa i a Ietū Kiritō.

¹⁶ Te meꞌe taꞌatoꞌa kī ꞌi ruŋa i te Pāpaꞌi Moꞌa he meꞌe haka ꞌite mai e te ꞌAtua. Tōꞌona hauhaꞌa: he hāpī mai, he ture mai, he haka tī-tika mai i te manaꞌu ꞌe he hāpī mai i te noho iŋa tano ki te mata o te ꞌAtua,

¹⁷ ki ai ai te nuꞌu aŋa ki a ia e tano riva-riva rō ꞌana mo aŋa rauhuru meꞌe riva-riva haŋa ꞌāꞌana.