2 Tētārōnika 3 - Rapa Nui

He ani iŋa ki te taina mo pure

¹ Te meꞌe hopeꞌa, e te taina ē, e pure kōrua mo mātou, ki tuꞌu ai te roŋo parautiꞌa o te tātou Pūꞌoko Haka Tere ki te kona taꞌatoꞌa, ꞌe, takoꞌa, mo toꞌo ꞌe mo haꞌatura e te nuꞌu hai koa pē kōrua.

² E pure takoꞌa kōrua mo hāpaꞌo mai i a mātou e te ꞌAtua, ꞌo raveꞌino mai e te nuꞌu taꞌe haŋa ki a ia; taꞌe, paꞌi, taꞌatoꞌa taŋata ŋaroꞌa i te ⌊roŋo riva-riva o ruŋa i a Ietū⌋ e haka moe ena i te manaꞌu ꞌi ruŋa i a ia.

³ Ka ai atu pē ira, te tātou Pūꞌoko Haka Tere ko Ietū e ko taꞌe haka tano i tāꞌana meꞌe kī, ꞌe māꞌana e haka pūai ꞌe e hāpaꞌo atu ꞌo haka hara i a kōrua e Rukifero.

⁴ ꞌO ira mātou e ꞌite riva-riva nei pē nei ē: hai hāꞌūꞌū ōꞌona e aŋa e oho mai ena kōrua i te meꞌe hāpī atu era e mātou ꞌe pē ira ka aŋa ka oho ena.

⁵ ꞌE mo te tātou Pūꞌoko Haka Tere ko Ietū e hāꞌūꞌū atu mo aŋi-aŋi i te rahi o te haŋa o te ꞌAtua ki a kōrua ꞌe mo ꞌite o kōrua mo haꞌaoromaꞌi hai pūai ꞌi te hora o te ꞌati, pa he oho iŋa era ōꞌona.

ꞌIna ko hupe-hupe

⁶ E te taina, he kī atu a mātou hai ꞌīŋoa o te tātou Pūꞌoko Haka Tere ko Ietū Kiritō: mo ai ꞌi roto i a kōrua e tahi taina hupe-hupe taꞌe haka tere i a ia hai meꞌe hāpī atu era e mātou, e haka tapa kōrua mai muri.

⁷ Ko ꞌite ꞌana a kōrua pē hē kōrua ana haka tere, mo tano o te kōrua noho iŋa ki te mātou noho iŋa. ꞌIna, paꞌi, mātou kai hupe-hupe ꞌi te hora era ꞌi muri i a kōrua,

⁸ ꞌe ꞌina mātou kai kai i te haraoa i taꞌe ꞌauhau e mātou. Te meꞌe nō, ka pō ka ꞌōtea e aŋa era mo ravaꞌa moni, ꞌo ai mātou he meꞌe paŋahaꞌa e tahi mo ꞌamo e kōrua,

⁹ ka ai atu e tano rō ꞌā a mātou mo kī atu mo hāꞌūꞌū mai. ꞌE i aŋa a mātou mo haka takeꞌa atu ki a kōrua pē hē kōrua ana haka tere i a kōrua.

¹⁰ Hora era o mātou ꞌi muri i a kōrua i haka rē rō atu i te roŋo nei: Te kope taꞌe haŋa mo aŋa, ꞌina ko kai.

¹¹ ꞌE, hora nei, ko ŋaroꞌa ꞌana e mātou pē nei ē: tētahi o kōrua e hupe-hupe rō ꞌā; te rāua meꞌe aŋa nō he haka mira-mira i te aŋa o te tētahi.

¹² Te roŋo o mātou mo te ŋā nuꞌu nei hai ꞌīŋoa o te tātou Pūꞌoko Haka Tere ko Ietū Kiritō: ꞌina ko haka mira-mira haka ꞌou i te aŋa o te tētahi, ꞌe e aŋa mo ai o te rāua rāveꞌa.

¹³ ꞌE a kōrua, e te taina ē, ꞌina ko haꞌumani ꞌi te aŋa iŋa i te meꞌe riva-riva.

¹⁴ ꞌE mo ai e tahi taina taꞌe haꞌatura ki te meꞌe kī atu e mātou ꞌi ruŋa i te parau nei, e uꞌi ko ai, ꞌe ꞌai ka haka tapa rō kōrua mai muri, ki haꞌamā ai.

¹⁵ ꞌIna kōrua ko tāpūfētī i a ia. Te meꞌe o kōrua mo aŋa, he ture, pa he taina, mo haka tī-tika ōꞌona i tōꞌona ara.

He ꞌaroha

¹⁶ ꞌE mo te tātou Pūꞌoko Haka Tere, i a ia te haumārū, e vaꞌai atu ki a kōrua i te haumārū ꞌi te taꞌatoꞌa nō hora. Ka ai a ia ꞌi muri i a kōrua taꞌatoꞌa.

¹⁷ A au, a Pauro, e pāpaꞌi atu ena i te ꞌaroha nei hai rima mau nei ꞌā ōꞌoku. Pē ira a au e tāpaꞌo tahi nei i tāꞌaku parau pāpaꞌi.

¹⁸ Ka ai ꞌi ruŋa i a kōrua taꞌatoꞌa te riva rahi o te tātou Pūꞌoko Haka Tere ko Ietū Kiritō.