1 Timoteo 4 - Rapa Nui

Te hāpī taꞌe parautiꞌa

¹ Ko haka ꞌite riva-riva ꞌā e te ⌊Vārua Maitai⌋ pē nei ē: ka hāhine ena te ŋā mahana hopeꞌa era, tētahi taŋata e ko haŋa haka ꞌou mo haka roŋo ki te hāpī parautiꞌa o te ꞌAtua. Ka haka roŋo ena ki te hāpī reo-reo o te tātane

² hāpī e te nuꞌu reo-reo riva a te haho ꞌā ꞌe taꞌe ŋaroꞌa haka ꞌou i te mamae ꞌi roto i a rāua ꞌo te aŋa i te meꞌe taꞌe tano.

³ Te nuꞌu nei ꞌina he haꞌatiꞌa i te taŋata mo ⌊hāipo-ipo⌋ ꞌe mo kai i te tētahi kai aŋa e te ꞌAtua. Te nuꞌu ꞌite i te parautiꞌa ⌊haka moe i te manaꞌu⌋ ꞌi ruŋa i a Ietū ko aŋi-aŋi ꞌana pē nei ē: taꞌatoꞌa kai māuru-uru ki te ꞌAtua e tano nō mo kai.

⁴ Taꞌatoꞌa meꞌe aŋa e te ꞌAtua meꞌe riva-riva; mo māuru-uru ki a ia, ꞌina e tahi kai mo taꞌe kai.

⁵ ꞌĀꞌana, paꞌi, i kī, ꞌe o tātou te māuru-uru ki a ia.

⁶ E Timoteo, mo hāpī ōꞌou ki te taina i te ŋā meꞌe nei, he tāvini riva-riva ia koe o Ietū Kiritō. ꞌE te roŋo parautiꞌa o te ꞌAtua ꞌe te maꞌu ōꞌou i te hāpī riva-riva haka ꞌite atu he haka haŋu he oho i a koe.

⁷ ꞌIna koe ko haka roŋo ki te ꞌaꞌamu maꞌa-maꞌa o te taŋata. Ka aŋa ka oho nō koe mo ꞌata pūai ōꞌou pa he taŋata moꞌa ꞌe haꞌatura ki te ꞌAtua.

⁸ Te haka aŋa i te hakari mo haka hio-hio e hauhaꞌa rō ꞌā, ꞌe te ꞌite mo moꞌa ꞌe mo haꞌatura ki te ꞌAtua ꞌata hau rō atu i te hauhaꞌa, ꞌe taꞌe mo te noho iŋa ꞌi te ao nō nei, pē ira ꞌana mo te noho iŋa ka oho mai ena.

⁹ He parautiꞌa te meꞌe nei; e haka roŋo te taŋata taꞌatoꞌa.

¹⁰ Mo ira, e Timoteo ē, e aŋa ꞌe e haka ꞌuhu e oho nei a tātou ꞌi te aŋa o te ꞌAtua ora, ꞌo te ꞌite e tātou e haka tano tahi rō i tāꞌana meꞌe kī. ꞌĀꞌana, paꞌi, te haka eꞌa i te taŋata taꞌatoꞌa mai roto i te ūtuꞌa o te hara ꞌe te vaꞌai i te ora ꞌāpī ꞌina he hopeꞌa raꞌa ana haka moe i te manaꞌu ꞌi ruŋa i a Ietū.

¹¹ He ŋā meꞌe nei te meꞌe ꞌāꞌau mo hāpī ꞌe mo kī mo aŋa e te taina.

¹² E uꞌi ꞌo taꞌe haka au rō atu ꞌo te ai ōꞌou he taŋata ꞌāpī. Hai huru o tuꞌu vānaŋa ꞌe o tuꞌu noho iŋa, hai haŋa ōꞌou ki te rua, hai huru o tuꞌu haka moe iŋa i te manaꞌu ꞌi ruŋa i te ꞌAtua ꞌe hai noho iŋa hara kore ana haka takeꞌa ki te tētahi nuꞌu haka moe i te manaꞌu ꞌi ruŋa i a Ietū pē hē takoꞌa a rāua ana ai.

¹³ ꞌI tuꞌu tiaki iŋa mai, e taiꞌo koe ki te taŋata i te ⌊Pāpaꞌi Moꞌa⌋, e hāpī ꞌe e haka haŋu koe i te taina.

¹⁴ E Timoteo, e haka hio-hio e oho koe ꞌi te aŋa o te ꞌAtua hai meꞌe hauhaꞌa vaꞌai atu era e ia ꞌi te hora haka topa atu era i te rima a ruŋa i tuꞌu pūꞌoko e te ŋā kope pūꞌoko haka tere era koia ko kī atu i tāꞌana roŋo hai Vārua Maitai.

¹⁵ E uꞌi e aŋa riva-riva te ŋā meꞌe kī atu ena e au, ki takeꞌa ai e te nuꞌu taꞌatoꞌa pē hē e aŋa e oho ena koe i te meꞌe haŋa o te ꞌAtua.

¹⁶ E uꞌi riva-riva te huru o tuꞌu noho iŋa ꞌe te huru o tuꞌu hāpī iŋa i te rua; e haka hio-hio e oho nō koe i te ŋā meꞌe taꞌatoꞌa ena. Mo aŋa ōꞌou pē ira, taꞌe ko koe nō te meꞌe ka eꞌa ena mai roto i te ūtuꞌa o te hara, pē ira ꞌana te nuꞌu haka roŋo atu.