1 Timoteo 3 - Rapa Nui

Te nuꞌu mo pūꞌoko haka tere

¹ He parautiꞌa te meꞌe nei: Mo haŋa o te kope e tahi mo riro ōꞌona he pūꞌoko haka tere o te nūnaꞌa taŋata ⌊haka moe i te manaꞌu⌋ ꞌi ruŋa i a Ietū, e haŋa ꞌā ki te aŋa riva-riva.

² Te kope mo pūꞌoko haka tere ꞌina ko ai ōꞌona hape. E ai he kope kai oho ki te rua viꞌe ꞌi tōꞌona hāipo-ipo, ꞌite i te hāito i tāꞌana meꞌe kī ꞌe i tāꞌana meꞌe aŋa, ꞌite mo ture hai meꞌe tano, ꞌe e moꞌa rō ꞌana e te taŋata. E ai he kope toꞌo i te nuꞌu kē ki tōꞌona hare mo hāpaꞌo, ꞌe e ꞌite riva-riva rō ꞌana mo hāpī i te nuꞌu.

³ ꞌIna ko ai he kope taꞌero ꞌava ꞌe rava moto. E ai he taŋata māhatu riva ꞌe haumārū, taꞌe nou-nou moni,

⁴ ꞌite mo haka tere riva-riva i tōꞌona hare, ki haꞌatura ai ꞌe ki moꞌa ai e tāꞌana ŋā poki, ꞌe rā ŋā poki ꞌina ko ai e tahi hape.

⁵ Mo taꞌe ꞌite, paꞌi, i te haka tere riva-riva i tōꞌona hare, ¿pē hē ia ana ꞌite mo haka tere i te nūnaꞌa taŋata haka moe i te manaꞌu ꞌi ruŋa i a Ietū?

⁶ ꞌO ira, te taŋata mo pūꞌoko haka tere ꞌina ko ai e haka moe iho ꞌana i te manaꞌu ꞌi ruŋa i a Ietū, ꞌo haka paka rō ꞌe he topa ꞌi ruŋa i a ia te ūtuꞌa vaꞌai era ki a Rukifero.

⁷ E ai takoꞌa he taŋata e moꞌa rō ꞌana e te nuꞌu taꞌe haka moe i te manaꞌu ꞌi ruŋa i a Ietū. Pē ira e ko vānaŋa taꞌe tano o ruŋa i rā kope ꞌe e ko ravaꞌa e Rukifero.

Te ŋāŋata mo ⌊taina hāꞌūꞌū⌋

⁸ Te ŋāŋata toꞌo mo taina hāꞌūꞌū o te nūnaꞌa taŋata haka moe i te manaꞌu ꞌi ruŋa i a Ietū e ai takoꞌa he ŋāŋata e moꞌa rō ꞌā e te nuꞌu, ŋāŋata haka tano i te rāua meꞌe kī, taꞌe he taꞌero, ꞌe taꞌe nou-nou moni.

⁹ Te nuꞌu nei e haka hio-hio i te rāua manaꞌu ki te roŋo parautiꞌa o te ꞌAtua haka ꞌite mai era e ia, ꞌe e ai e maꞌitaki rō ꞌā te rāua māhatu.

¹⁰ Te meꞌe raꞌe, e uꞌi ana ai te rāua hape, ꞌe mo ai ꞌina, he toꞌo mo taina hāꞌūꞌū o te nūnaꞌa taŋata haka moe i te manaꞌu ꞌi ruŋa i a Ietū.

¹¹ ꞌE te rāua ŋā viꞌe, e ai e moꞌa takoꞌa rō ꞌana e te taŋata, he ŋā viꞌe taꞌe haꞌaꞌino, hāito i te rāua meꞌe kī ꞌe i te rāua meꞌe aŋa, ꞌe he ŋā viꞌe haka tano i te rāua meꞌe kī.

¹² Te kope mo taina hāꞌūꞌū e ai takoꞌa he kope kai oho ki te rua viꞌe ꞌi tōꞌona hāipo-ipo, haka tere riva-riva i tōꞌona hare ꞌe i tāꞌana ŋā poki.

¹³ ꞌE mo aŋa riva-riva o te taina hāꞌūꞌū i tāꞌana aŋa, he ꞌata moꞌa e te taŋata, ꞌe he ꞌata pūai mo haka ꞌite mo oho o ruŋa i te haka moe iŋa i te manaꞌu ꞌi ruŋa i a Ietū Kiritō.

He parautiꞌa haka ꞌite mai e te ꞌAtua

^14-15 E Timoteo, ko haŋa ꞌana a au ꞌina ko roa hia mo oho atu mo uꞌi i a koe. ꞌO ŋeꞌi tāꞌue, e pāpaꞌi atu ena au i te meꞌe nei, mo ꞌite ōꞌou pē hē te noho iŋa tano o te huaꞌai o te ꞌAtua ora, he nūnaꞌa taŋata haꞌataꞌa e ia māꞌana. O te nuꞌu nei te maꞌu ꞌe te hāpaꞌo i te parautiꞌa.

¹⁶ He meꞌe nui-nui mau ꞌana te parautiꞌa haka ꞌite mai era e te ꞌAtua pē nei ē: Te Kiritō i tuꞌu mai ai pa he taŋata, i haka ꞌite rō mai e te ⌊Vārua Maitai⌋ he Poki o te ꞌAtua, ꞌe he merahi te mataꞌite. Te roŋo riva-riva o ruŋa i a ia i haka ꞌite rō ki te hau taꞌatoꞌa, i haka moe rō te manaꞌu o te taŋata ꞌi ruŋa i a ia, ꞌe i toꞌo rō e te ꞌAtua ki muri i a ia.