1 Timoteo 2 - Rapa Nui

Te pure mo te taŋata taꞌatoꞌa

¹ ꞌĪ a au he kī atu: e no-noꞌi, e ani, e pure ꞌe e māuru-uru ki te ꞌAtua mo te taŋata taꞌatoꞌa o te ao.

² E pure mo te nuꞌu haka tere i te henua ꞌe mo te nuꞌu ra-rahi taꞌatoꞌa, ki noho riva-riva ai a tātou ꞌina e tahi ture, ki moꞌa ai ꞌe ki haꞌatura ai ki te ꞌAtua.

³ Te meꞌe nei he meꞌe riva-riva ꞌe he meꞌe haŋa o te ꞌAtua, kope toꞌo i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa.

⁴ A ia e haŋa rō ꞌana mo eꞌa o te taŋata taꞌatoꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. E haŋa takoꞌa rō ꞌana te ꞌAtua mo ꞌite o te taŋata i te hāpī parautiꞌa pē nei ē:

⁵ Te ꞌAtua e tahi nō, ꞌe e tahi nō kope haka riva-riva i te taŋata ki te ꞌAtua, ko Ietū Kiritō.

⁶ ꞌO haka ūtuꞌa e te ꞌAtua i te taŋata, i vaꞌai ai a Ietū i a ia mo mate mo ꞌamo e ia i te ūtuꞌa o te hara. Te meꞌe nei i topa ai ꞌi te hora kī e te ꞌAtua, ꞌe i haka ꞌite rō mai ki a tātou: a ia e haŋa rō ꞌana mo eꞌa o te taŋata taꞌatoꞌa mai roto i te ūtuꞌa o te hara.

⁷ Mo haka ꞌite mo oho i te roŋo nei i uŋa ai i a au e te ꞌAtua, pa he taŋata maꞌuroŋo ꞌe pa he ⌊ꞌāpōtoro⌋, ꞌe i kī rō mai mo hāpī ki te nuꞌu taꞌe he hūrio o ruŋa i te haka moe iŋa i te manaꞌu ꞌi ruŋa i a Ietū ꞌe o ruŋa i te hāpī parautiꞌa o te ꞌAtua. Te meꞌe nei ꞌāꞌaku e kī atu ena he parautiꞌa, taꞌe he reo-reo.

Te noho iŋa tano mo te taŋata ꞌe mo te viꞌe

⁸ Te meꞌe haŋa ꞌāꞌaku: e pure te ŋāŋata ꞌi te kona taꞌatoꞌa, e maꞌu te rima a ruŋa mo pure ki te ꞌAtua hai māhatu maꞌitaki, taꞌe hai riri ꞌe taꞌe hai ꞌaka-ꞌaka o te manaꞌu.

⁹ ꞌE tāꞌaku meꞌe haŋa mo te ŋā viꞌe: e hāito e haka tano te uru iŋa o te kahu, te ha-hari iŋa o te rauꞌoho, ꞌe te huki iŋa o te piru ana vati-vati i a rāua, ꞌo taꞌe moꞌa rō e te taŋata.

¹⁰ Te haka tau iŋa mau hai huru o te meꞌe riva-riva aŋa, he meꞌe tano o te ŋā viꞌe haŋa mo moꞌa ꞌe mo haꞌamuri ki te ꞌAtua.

¹¹ Te ŋā viꞌe e haka roŋo kiva-kiva i te hāpī o ruŋa i te vānaŋa o te ꞌAtua hai haŋa mo haꞌatura.

¹² ꞌE ꞌina e au he haꞌatiꞌa i a rāua mo hāpī ꞌe mo haka tere i te ŋāŋata ꞌi roto i te nūnaꞌa taŋata haka moe i te manaꞌu ꞌi ruŋa i a Ietū. Te meꞌe haŋa he haka roŋo kiva-kiva nō o rāua.

¹³ ꞌI raꞌe, paꞌi, a ⌊ꞌĀtamu⌋ i aŋa ai e te ꞌAtua ki a ⌊Eva⌋.

¹⁴ ꞌE taꞌe ko ꞌĀtamu te meꞌe i haka roŋo ki te reo-reo ꞌa Rukifero, ko Eva; ꞌe, ꞌi te haka roŋo ki rā reo-reo, he hara rō ꞌai.

¹⁵ Te tano mau: e haka tere te ŋā viꞌe hai manaꞌu o te ꞌAtua ki moꞌa ai e te taŋata. E noho e hāpaꞌo i te rāua ŋā poki, e haka moe e oho i te rāua manaꞌu ꞌi ruŋa i a Ietū, e haŋa e oho ki te rua, ꞌe e haꞌatura e oho ki te ꞌAtua. Pē ira he haka eꞌa e te ꞌAtua mai roto i te ūtuꞌa o te hara.