1 Kōrinto 14 - Rapa Nui

He haka tere iŋa tano mo te taꞌatoꞌa

¹ ꞌO ira, te meꞌe raꞌe mo ai i a kōrua he haŋa ki te rua; ꞌe, takoꞌa, e haŋa ki te meꞌe vaꞌai e te ⌊Vārua Maitai⌋ mo aŋa i te aŋa o te ꞌAtua. ꞌE, o te ŋā meꞌe vaꞌai ena e te Vārua Maitai, te meꞌe ꞌata hauhaꞌa he vānaŋa i te meꞌe haka ꞌite e te ꞌAtua hai ꞌarero aŋi-aŋi e te nuꞌu.

² Te kope ki a ia te meꞌe i vaꞌai ai he vānaŋa hai ꞌarero kē taꞌe ꞌite e ia taꞌe ki te taŋata e vānaŋa ena; e vānaŋa ꞌā ki te ꞌAtua, ꞌe ꞌina he nuꞌu he aŋi-aŋi i tāꞌana meꞌe kī.

³ ꞌE te kope ki a ia i vaꞌai ai i te meꞌe he vānaŋa i te meꞌe haka ꞌite e te ꞌAtua e vānaŋa ꞌana ki te nuꞌu mo haka pūai i te rāua haka moe iŋa i te manaꞌu ꞌi ruŋa i a Ietū, mo haka haŋu ꞌe mo haka koa i a rāua.

⁴ Te kope vānaŋa i te ꞌarero kē taꞌe ꞌite e ia mōꞌona mau nō te riva-riva, ꞌe te kope vānaŋa i te meꞌe haka ꞌite e te ꞌAtua, mo te nūnaꞌa taꞌatoꞌa o te taŋata ⌊haka moe i te manaꞌu⌋ ꞌi ruŋa i a Ietū te riva-riva.

⁵ Mo vānaŋa o kōrua taꞌatoꞌa i te ꞌarero kē taꞌe ꞌite e kōrua, he koa a au. Te meꞌe nō, mo te riva-riva o te taꞌatoꞌa, i hau rō atu ꞌi te tano te vānaŋa o kōrua i te meꞌe haka ꞌite e te ꞌAtua hai ꞌarero mo aŋi-aŋi e te nuꞌu ki te vānaŋa i te ꞌarero kē taꞌe ꞌite e kōrua, mo kore o te kope mo haꞌaauraꞌa i rā vānaŋa. ꞌO ira ꞌata hau rō atu tōꞌoku koa mo vānaŋa o kōrua i te meꞌe haka ꞌite atu e te ꞌAtua.

⁶ E te taina: ꞌina, paꞌi, e tahi hauhaꞌa mo oho atu ōꞌoku mo uꞌi i a kōrua ꞌe he vānaŋa atu hai ꞌarero kē taꞌe ꞌite e au ꞌe taꞌe aŋi-aŋi e kōrua. I hau rō atu, paꞌi, i te tano mo vānaŋa atu i te meꞌe haka aŋi-aŋi mai e te ꞌAtua, i te parautiꞌa ōꞌona, i te vānaŋa haka ꞌite mai e ia, ꞌe i te hāpī mo te kōrua riva-riva hai ꞌarero aŋi-aŋi e kōrua.

⁷ Pē ira takoꞌa te meꞌe haka taŋi e te taŋata pa he puhi ꞌe pa he arpa: mo taꞌe tano o te rei iŋa, e ko aŋi-aŋi e te nuꞌu i te peho ka haka taŋi era.

⁸ ꞌE mo taꞌe puhi riva-riva i te koneta ꞌi te hora o te tamaꞌi, ꞌina e tahi vaꞌehau mo haka rito i a ia mo te tamaꞌi.

⁹ Pē ira takoꞌa a kōrua: mo taꞌe vānaŋa hai ꞌarero ꞌite e te taŋata, ¿pē hē ia ana aŋi-aŋi i te kōrua meꞌe kī? ¡E vānaŋa ꞌana ia a kōrua ki te tokerau!

¹⁰ Te parautiꞌa, meꞌe rahi ꞌarero e vānaŋa ena ꞌi te ao, ꞌe e ai rō ꞌā te nuꞌu aŋi-aŋi i rā ŋā ꞌarero.

¹¹ Mo taꞌe aŋi-aŋi e au i te ꞌarero vānaŋa e te kope e tahi, he tuꞌu a au pa he taŋata o te rua henua mo rā kope ꞌe a ia takoꞌa mōꞌoku.

¹² E tano rō ꞌā, e te taina ē, te haŋa mo ai i a kōrua te meꞌe vaꞌai e te Vārua Maitai mo aŋa i te aŋa o te ꞌAtua. Te meꞌe nō, e ani ki a ia mo vaꞌai atu hai ŋā meꞌe ena mo hāꞌūꞌū ki te nuꞌu taꞌatoꞌa haka moe i te manaꞌu ꞌi ruŋa i a Ietū mo pūai o te rāua manaꞌu ꞌi ruŋa i a ia.

¹³ Te kope ki a ia te meꞌe i vaꞌai ai he vānaŋa i te ꞌarero kē taꞌe ꞌite e ia e ani ki te ꞌAtua mo vaꞌai i te pūai mo haꞌaauraꞌa i tāꞌana vānaŋa era.

¹⁴ Mo pure ōꞌoku hai ꞌarero kē taꞌe ꞌite e au, e pure ꞌana a au i te meꞌe i haka pure mai e te Vārua Maitai, taꞌe ꞌō hai meꞌe i manaꞌu e au.

¹⁵ ¿He aha ia te tātou meꞌe mo aŋa? He pure hai pūai o te Vārua Maitai, ꞌe he pure takoꞌa mo aŋi-aŋi e te taꞌatoꞌa. He hīmene hai pūai o te Vārua Maitai, ꞌe he hīmene takoꞌa hai hīmene mo aŋi-aŋi e te taꞌatoꞌa.

¹⁶ Mo haꞌahana-hana ōꞌou ki te ꞌAtua hai ꞌarero vaꞌai atu e te Vārua Maitai, ꞌe he ŋaroꞌa e te kope e tahi, e ko riva te kope era mo hokorua atu ꞌi taꞌa pure ꞌi te meꞌe era ꞌina he aŋi-aŋi i taꞌu vānaŋa.

¹⁷ Ka ai atu e riva rō ꞌā taꞌa pure mo māuru-uru ki te ꞌAtua, mo te rua ꞌina e tahi hauhaꞌa.

¹⁸ E māuru-uru rō ꞌana a au ki te ꞌAtua ꞌo te ai ꞌata rahi tōꞌoku vānaŋa ꞌi te ꞌarero kē taꞌe ꞌite e au ki a kōrua taꞌatoꞌa.

¹⁹ Ka ai atu pē ira, ꞌi roto i te nuꞌu haka moe i te manaꞌu ꞌi ruŋa i a Ietū, i hau rō atu tōꞌoku haŋa mo kī e rima vānaŋa aŋi-aŋi e te nuꞌu mo hāpī i a rāua ki te kī e hoꞌe ꞌahuru taꞌutini vānaŋa hai ꞌarero kē.

²⁰ E te taina, ka haka rē te manaꞌu ŋā poki o ruŋa i te ŋā meꞌe nei. Mo haŋa o kōrua mo manaꞌu pa he ŋā poki, e manaꞌu ia pa he ŋā poki poreko iho mo te meꞌe taꞌe tano.

²¹ E kī rō ꞌā e te ꞌAtua ꞌi ruŋa i te ⌊Pāpaꞌi Moꞌa⌋: «E vānaŋa rō a au ki te nuꞌu o te henua nei a roto i te haha o te nuꞌu o te rua henua ꞌe hai ꞌarero kē, ꞌe, ka ai atu pē ira, ꞌina e ko haka roŋo mai».

²² Te vānaŋa hai ꞌarero kē taꞌe ꞌite he meꞌe mo haka takeꞌa ki te nuꞌu taꞌe haka moe i te manaꞌu ꞌi ruŋa i a Ietū i te pūai o te ꞌAtua. ꞌE te vānaŋa i te meꞌe haka ꞌite e te ꞌAtua hai ꞌarero aŋi-aŋi e te taŋata he meꞌe mo te riva-riva o te nuꞌu haka moe i te manaꞌu ꞌi ruŋa i a Ietū, taꞌe mo te nuꞌu taꞌe haka moe i te manaꞌu ꞌi ruŋa i a ia.

²³ Pē nei te auraꞌa: mo ai ko taka-taka ꞌā a kōrua mo haꞌamuri i te ꞌAtua, ꞌe he tuꞌu atu ki roto i a kōrua te nuꞌu taꞌe haka moe i te manaꞌu ꞌi ruŋa i a Ietū ꞌe te nuꞌu taꞌe aŋi-aŋi o ruŋa i te ŋā meꞌe nei, ꞌe he ŋaroꞌa i a kōrua taꞌatoꞌa e vānaŋa ꞌā ꞌi te ꞌarero huru kē huru kē, he manaꞌu ko maꞌa-maꞌa tahi ꞌana kōrua.

²⁴ ꞌE mo vānaŋa tahi o kōrua i te vānaŋa haka ꞌite atu e te ꞌAtua hai ꞌarero aŋi-aŋi e te taŋata ꞌe he tuꞌu atu ki muri i a kōrua te nuꞌu taꞌe haka moe i te manaꞌu ꞌi ruŋa i a Ietū ꞌe te nuꞌu taꞌe aŋi-aŋi o ruŋa i te ŋā meꞌe nei, ka ŋaroꞌa era i te kōrua vānaŋa, he haka topa riva-riva i te manaꞌu: a rāua he nuꞌu hara ꞌe e ai rō ꞌā te ūtuꞌa mo rāua mo taꞌe huri o te manaꞌu ki te ꞌAtua,

²⁵ ꞌe, takoꞌa, te meꞌe taꞌatoꞌa taꞌe tano o roto i te rāua māhatu taꞌe ꞌite e te nuꞌu e ꞌite tahi rō ꞌā e te ꞌAtua. ꞌI rā hora he ⌊huri te manaꞌu ki te ꞌAtua⌋, he tū-turi ꞌe he haꞌamuri ki a ia koia ko aŋi-aŋi: he parautiꞌa mau ꞌā te ꞌAtua ꞌi roto i a kōrua.

Hai tī-tika ana haꞌamuri ki te ꞌAtua

²⁶ Tāꞌaku kī, e te taina ē: ꞌi te hora taka-taka o kōrua mo haꞌamuri ki te ꞌAtua, e tano nō te tētahi nuꞌu mo hīmene i te hīmene haꞌahana-hana, ꞌe te tētahi atu mo hāpī ꞌo mo haka ꞌite i te meꞌe haka aŋi-aŋi e te ꞌAtua, ꞌo mo vānaŋa hai ꞌarero kē taꞌe ꞌite e ia, ꞌo mo kī i te haꞌaauraꞌa o rā vānaŋa. Te meꞌe taꞌatoꞌa nei e aŋa mo te riva-riva o te nūnaꞌa taꞌatoꞌa o te taŋata haka moe i te manaꞌu ꞌi ruŋa i a Ietū.

²⁷ Hora era mo vānaŋa i te ꞌarero kē taꞌe ꞌite, hoko rua ꞌo hoko toru mau nō ana vānaŋa ꞌe e tahi e tahi, ꞌe e ai takoꞌa te kope mo haꞌaauraꞌa i rā vānaŋa.

²⁸ ꞌE mo kore o te kope mo haꞌaauraꞌa, ꞌina ko vānaŋa hai ꞌarero kē taꞌe ꞌite ꞌi muꞌa o te nūnaꞌa taŋata taꞌatoꞌa haka moe i te manaꞌu ꞌi ruŋa i a Ietū. Hoko tahi nō ana vānaŋa i rā vānaŋa ꞌe mo te ꞌAtua nō.

²⁹ Pē ira takoꞌa ꞌana, mo ai o te nuꞌu vānaŋa i te meꞌe haka ꞌite e te ꞌAtua, hoko rua ꞌo hoko toru ana vānaŋa, ꞌe mo te tētahi e uꞌi hoki rā vānaŋa o te ꞌAtua mau ꞌā.

³⁰ ꞌE mo haka ꞌite e te ꞌAtua e tahi meꞌe ki te kope e noho rō ꞌā ꞌi rā kona, te kope vānaŋa he mou mo vānaŋa o rā rua kope era.

³¹ Mo aŋa o kōrua pē ira, taꞌatoꞌa nō ka ai era te hora mo vānaŋa i te meꞌe haka aŋi-aŋi e te ꞌAtua, he ꞌite te taꞌatoꞌa ꞌe he ꞌata pūai te manaꞌu ꞌi ruŋa i a Ietū.

³² Te kope vānaŋa i te meꞌe haka ꞌite e te ꞌAtua e ꞌite mo tiaki ki tōꞌona hora, ꞌo vānaŋa hoko rua ꞌi tū hora ꞌā.

^33-34 Te ꞌAtua, paꞌi, taꞌe he ꞌAtua o te meꞌe mira-mira; tāꞌana meꞌe haŋa he meꞌe tī-tika ꞌe he haumārū. ꞌI te hora taka-taka mo haꞌamuri ki te ꞌAtua, ꞌina ko haꞌatiꞌa i te ŋā viꞌe mo vānaŋa. Pē ira te haka tere iŋa o te nūnaꞌa taŋata taꞌatoꞌa haka moe i te manaꞌu ꞌi ruŋa i a Ietū. Te ŋā viꞌe e haꞌatura ki te rāua kenu, pa he meꞌe hāꞌaki ꞌi ruŋa i te ⌊haka tere iŋa ꞌa Mōtē⌋.

³⁵ Mo haŋa mo ꞌite e tahi meꞌe, ꞌi te hare ana ꞌui ki te kenu; ꞌina, paꞌi, he ŋā viꞌe e ko tano mo vānaŋa ꞌi te hora e taka-taka rō ꞌana mo haꞌamuri ki te ꞌAtua.

³⁶ Te vānaŋa o te ꞌAtua taꞌe mai i a kōrua i ꞌite raꞌe ai, ꞌe taꞌe ko kōrua mau nō te meꞌe i ꞌite o ruŋa.

³⁷ Mo manaꞌu o te kope e tahi e vānaŋa ꞌana a ia i te meꞌe haka ꞌite e te ꞌAtua, ꞌe he kope haka tere a ia e te Vārua Maitai, e ꞌite pē nei ē: tāꞌaku meꞌe nei e pāpaꞌi atu ena he roŋo o te tātou Pūꞌoko Haka Tere ko Ietū Kiritō.

³⁸ ꞌE mo taꞌe moꞌa i te roŋo nei, ꞌina takoꞌa ia kōrua ko haka roŋo ki tāꞌana meꞌe haka ꞌite atu.

³⁹ E te taina ōꞌoku ē, e haŋa kōrua ki te meꞌe he vānaŋa i te meꞌe haka ꞌite atu e te ꞌAtua vaꞌai e te Vārua Maitai mo aŋa i te aŋa o te ꞌAtua. ꞌE ꞌina ko taꞌe haꞌatiꞌa i te nuꞌu mo vānaŋa hai ꞌarero kē taꞌe ꞌite e rāua haka vānaŋa e te Vārua Maitai.

⁴⁰ Te meꞌe haŋa mau nō: te ŋā meꞌe nei ana aŋa a roto i te haumārū ꞌe a roto i te tī-tika.