1 Corinti 1 - Bíblia Sagrada en Canela

Pê Pawrô me cumã amji jarẽ 1 Corinti 1.1-13

^1-2 Hàpà me ikwỳ pê Pahpãm na mehkwỳ, ca Corinti jõ krĩ kam me akrĩ atajê. Ipê Pawrô. Pê Jeju Crixtô pê Pahpãm kra amji mã harkwa na cumã iprar catê na ixãm. Na wa ite me amã ihhôc, ne ihkujahêc. Ne Jeju kam me pahkjê pê Xoten ita icahê na ihkrĩ. Ne Jeju Crixtô cukwa kam ri me apê Pahpãm na mehkwỳ, na ca ajtea mã me, ne ampeaj kam me apej. Pê Pahpãm ihkra kam ate me ajpẽn hônco xà ata kôt, pê me ato amji kwỳ xà na, me ana ahwỳ. Ne ihkàhhôc ita hanea ne, pjê cunea kam me cumã Jeju Crixtô pê me pajõ Pahhiti kam me hapac to me ipa atajê cunea mã wa ite ihhôc. Ne Jeju pê me pajõ Pahhiti, ne hanea ne cupê me hõ Pahhiti, na wa ite ahna me amã ihhôc.

³ Ne wa ijõtpê Pahpãm pê me pajõ Inxũ Cati me, me pajõ Pahhiti pê Jeju Crixtô mã, me acajrẽn to hane he: — Ỹhỹ, ca ha Corinti jõ krĩ kam me akwỳ mehkrĩ atajê caprĩ, ne me caxwỳn caxwãm pê me cumã me acarĩcti gõ, mãr quê nee ame amji mã ampo cupa nare — hane.

Cu ha Jeju cukwa kam, ampo pej cunea cwa

⁴ Pahpãm te Jeju Crixtô cukwa kam hàhcajrẽan kam me ato impej xà ata pyrên, wa ijõtpê hũrên ijakryti na cumã amji jarẽn to ipa.

⁵ Ne Jeju Crixtô kam ate me ajpẽn hônco xà ita kam ri, me akrã kre te amji jahkre pejti me, Pahpãm jarkwa kôt me gũjarẽn xà impejti to, ihcunea na me gakràj.

⁶ Ne ate me Jeju te amji kam hapac xà intuw pejti jarẽn xà ita na me amji caxàr, ne ihkôat atỳj me apa.

⁷ Cwỳrjapê, ca ate me pajõ Pahhiti pê Jeju Crixtô te amji jaxàr xà na me hikaj xà ita kam, Pahpãm Carõ Pejti te ihtỳj me amã ampo pejti jõr xà atajê, ne nee me apê hamre nare.

⁸ Ne Jeju to ate amji mã me ahimpej xà ata kam ame apec cupate ri, ihtỳj me atehcajpar to ipa, mãr ca nee ahna ame apec nare. Mãr quê me pajõ Pahhiti pê Jeju Crixtô te amji jaxàr xà ata kam, nee ampo na amji mã me acuhtom nare.

⁹ Ỹhỹ, cu pahtỳj Pahpãm to amji mã me pahhimpej xà ata na, amji mã me to hane. Ne cute hanea ne ihkra pê Jeju Crixtô kam pahte me ajpẽn hônco tu xà caxuw, cute me pahna hàhwỳr, ne nee cute harkwa ata to ipintuw, ne to hapac kêt nare.

Pê Corinti jõ krĩ kam Jeju na mehkwỳ picapôn pa

^10-11 Ỹhỹ Jeju kam me ikjêjê, he Crowkwỳj na mehkwỳ nõ te ri imã me akwỳ kwỳa cwỳrjapê ate me garkwa to me ajpẽn mãn na me garẽn, wa ite me garẽn par. Na wa ha me pajõ Pahhiti pê Jeju Crixtô japrỳa na me ana ahwỳ, ca nee hipêr ame ajpẽn mãn to me apa nare, ne nee hipêr ajpẽn to me apicapôn nare. Ne quêt catyt kam cama me ajpẽn par peaj ne, ne ajpẽn kam me ahônco, ne ate amji kam me gapac xà pyxit peaj kôt me apa.

¹² Ampo na? He ca ihhêj ne me gakrã cunea kam me amji jarẽn to me hane he: — Me ipê Pawrô kôt me ipa catêjê — hane. Ne me gakrã kwỳ me amji jarẽn to: — Me ipê Apôr kôt me ipa catêjê — hane. Ne me gakrã kwỳ me amji jarẽn to: — Me ipê Petrô kôt me ipa catêjê — hane. Ne me gakrã kwỳ me amji jarẽn to: — Me ipê Crixtô kôt me ipa catêjê — hane.

¹³ Pỳhàpà! Xà ajkĩ Crixtô picapôn? Hãpà! He xà ajkĩ pa wa me acwỳrjapê pĩ kam ityc? Hãpà! Xà ajkĩ Jeju japrỳ kaj na jũm te ijaprỳ na cô kam me anõ cumrãr? Hãpà! He xà me gõ pahhi cwỳrjapê ate amji to me apicapôn ita jũ na, nee me apahàm nare? Ampeaj kam ate amji to me apicapôn ita na, me gũ na ipahàm. Na wa ha me awỳ, ca hacpỹa mã me cuprõ, ne me ajpẽn hônco tu na me apa.