Mataio 1 - Buk Taabu Matakin

A niluluk na wuna taara anun Iesu Kaarisito

¹ Bi ia a iaa ra wuna taara taanga namuga baa Iesu Kaarisito, a natun Dewid, a natun Aabaraam i waan paat kon diat.

² Aabaraam a tamaan Aaisaak, Aaisaak a tamaan Iaakob, ma Iaakob a tamaan Iuda ma ra kum tatena liklik.

³ Iuda a tamaan Peres ma Seraa, ma a naandiaar Taamaar. Peres a tamaan Esrom, Esrom a tamaan Aaraam,

⁴ ma Aaraam a tamaan Aaminadaab, Aaminadaab a tamaan Naason, ma Naason a tamaan Saalmon,

⁵ Saalmon a tamaan Boaas, ma naana a iaana Raab. Boaas a tamaan Obed, ma naana a iaana Rut. Obed a tamaan Iese,

⁶ ma Iese a tamaan Dewid, baa a king. Dewid a tamaan Solomon, ma naana a tabuan baa i taulaa paa ma Uraia.

⁷ Solomon a tamaan Roboaam, Roboaam a tamaan Aabia, Aabia a tamaan Aasa,

⁸ Aasa a tamaan Iosapaat, Iosapaat a tamaan Ioraam, ma Ioraam a tamaan Usia,

⁹ Usia a tamaan Iotaam, Iotaam a tamaan Aakaas, ma Aakaas a tamaan Esekia,

¹⁰ Esekia a tamaan Maanaase, Maanaase a tamaan Aamon, ma Aamon a tamaan Iosia,

¹¹ Iosia i wangaala Iekonia ma ra kum tatena liklik. Namur taana a taara Israael diat waan na karabus irong Baabilon.

¹² Namur taa ra winawaan urong Baabilon: Iekonia i wangaala Salaatiel, Salaatiel a tamaan Serubaabel,

¹³ Serubaabel a tamaan Aabiuda, Aabiuda a tamaan Eliaakim, ma Eliaakim a tamaan Aasor,

¹⁴ Aasor a tamaan Saadok, Saadok a tamaan Aakim, ma Aakim a tamaan Eliud,

¹⁵ Eliud a tamaan Eleaser, Eleaser a tamaan Maataan, ma Maataan a tamaan Iaakob,

¹⁶ Iaakob a tamaan Iosep, ia baa i taulaa ma Maaria. Maaria i buta Iesu, baa di waatungi naa Kaarisito, ia baa God i tula wai.

¹⁷ A kum taaun taara turpaai kon Aabaraam tuk un Dewid welaar ma 14 diat, ma kon Dewid tuk u ra winawaan na karabus urong Baabilon 14 kaai diat, ma ko ra winawaan na karabus urong Baabilon tuk un Kaarisito 14 a taautaaun taara diat kaai.

Maaria i buta Iesu Kaarisito

¹⁸ Di buta paa Iesu Kaarisito lenbi: Naana Maaria, di aa pet baat taai karom Iosep, iaku namuga taa ra nundiaar tinaulaa Maaria ia nunurai naa i kipbaala u ra Takado na Nion.

¹⁹ Iosep baa di aa pet baat taa Maaria karomi, ia a tena takado, ma pa i nemi naa in baana wawirwir Maaria naa ra taara. Io, i nuki naa in kutu ino wa anundiaar weweliman kup a tinaulaa.

²⁰ Baa i nuknuk utbaai u ra utnaa mi, a aangelo anu ra Tadaaru i waan paat karomi u ra beberon ma i piri naa, “Iosep, natun Dewid, koku u aalawur nuknuk un Maaria, un ben paai kupi anum tabuan. Maa a naat baa i kipbaala paai i waan paat ko ra Takado na Nion.

²¹ In buta paa a naat muaana ma un taar taa iaana baa Iesu, kabina maa in walaaun paa anuna taara ko ra nundiat kum aakaina mangamangaan.”

²² A kum utnaa raap mi i waan paat kupi din paam ot paa a kum pirpir anu ra Tadaaru baa anuna propet ia wapuaana taai naa,

²³ “Baboi, a tauraara na tabuan in kipbaala ma in buta paa a naat muaana ma din waatungi naa Emaanuel,” Aais 7:14 a kukuraaina naa, “God i ki ungaai ma daat.”

²⁴ Io, baa Iosep i tawaangun i paami lenutmaa a aangelo anu ra Tadaaru ia wapua taai uni, ma i ben paa Maaria kupi anuna tabuan.

²⁵ Iaku pa diaar inep ungaai paa tuk baa Maaria i buta paa a naat muaana. Ma Iosep i taar taa a iaana baa Iesu.