Ebraaio 1 - Buk Taabu Matakin

Natun God i ngaala aakit taa ra kum aangelo

¹ Namuga utbaai God i pirpir ma ra waa ra kum propet karom a kum taptabundaat. I pirpir lenmaa un mongoro na pakaan u ra aalawur mangaana aakapi.

² Iaku u ra kum tintinip na bung mi, i pirpir ma ra waan Natuna karom daat. A Natuna baa i pilak paai kupi in kale a kum utnaa raap. Ma u ra limaan Natuna, God i waki a rakrakaan buaal raap.

³ Natuna i baarabaara aakit ma ra minamaar anun God, ma i welaar mulu ut ma God. I baboura a rakrakaan buaal raap ma ra nuna pirpir baa i mawaat aakit. I taar taa nuna lalaaun, kupi in wagomgom daat ko ra kum aakaina mangamangaan raap. Ma baa ia paam araap taa a pinapaam mi, i ki u ra papaara ot na limaan God, a ngaala na king aakit, inaanga u ra maawa.

⁴ U ra pinapaam maa God i wangaala paa Natuna kupi in ngaala aakit taa ra kum aangelo. I ngaala aakit welaar ma ra iaana, baa Tamaana i taar taai taana, i ngaala aakit taa ra iaa ra kum aangelo.

⁵ Maa God wakir i piri karom ta aangelo lenbi, “Ui a Natunglik, ma mi iaau Tamaam.” Kele 2:7 ma wakir i piri kaai un ta aangelo naa, “Iaau Tamaana, ma ia natunglik.” 2 Saam 7:14

⁶ Ma baa God i tula wa mugaana Natuna urin u ra rakrakaan buaal, i piri uni lenbi, “I koina baa a kum aangelo raap anun God diat a lotu karomi”. Naag 32:43

⁷ Ma i piri lenbi u ra nuna kum aangelo, “I puku anuna kum aangelo kupi diat a welaar ma ra dadaip, a kum aangelo maa diat anuna kum tultul, ma i puku diat kupi diat a welaar kaai ma ra kupkup i ra nguan.” Kele 104:4

⁸ Iaku i piri lenbi un Natuna, “God, anum kiki na king in ki takum ma pa in raap. U laana naagagon anum mataanitu ma ra takado na mangamangaan.

⁹ U nem aakit a takado na mangamangaan, ma u milikuaana aakaina mangamangaan. Bi ia kabina baa God, anum God, i pilak pa ui ma i taar taa a gaaia ma ra urur taam, baa i ngaala aakit taa ra nuna wetabaar karom a kum teptepaam.” Kele 45:6-7

¹⁰ Ma God i piri kaai karom Natuna lenbi, “Tadaaru, u ra turpaaina, ui u waki taa a kabi ra rakrakaan buaal, ma u waki a baakut ma ra limaam.

¹¹ Diaar a panaai raap, iaku ui un ki takum. Diaar a maulaana waanwaan welaar ma ra ina maalu.

¹² Un pipin diaar welaar ma ina maalu na buburung, un kiaana diaar welaar ma raa baa i kiaana wa in maulaana maalu. Iaku ui, pa un wekiaa, ma num kum kilakilaala pa in raap.” Kele 102:25-27

¹³ God wakir i piri kaai karom ta aangelo lenbi, “Un ki u ra papaara ot na limaang, tuk baa ang uwia paa anum kum ebaar kupi diat a ki natudaangi ra num naagagon.” Kele 110:1

¹⁴ A kum aangelo raap diat a kum nion, baa diat papaam karom God, naka? I tula wa diat kupi diat a waraaut a taara, diat baa diat a lo a warwalaaun.