Mataio 28 - A Buk 1896 (Bible Portions)

20. PAKANA MA 8.

¹ Ma ba i rap a bug tabu, ma i keke kabin pat u ra mukana bug u ra wik, diara Maria taka Makdala, ma Maria kai diara wan pat lena diara bobo a ruma na minat.

² Ma boboi, a kuria i lig; kuma ra agelo a nu ra Tadaru i wan pari tak u ra maua ma i buliruai a wat pi, ma i ki tau uni.

³ I bobo welara ma ra mămăme, ma ra nuna kum malu i kabag akit i welara ma ra kabag na bata:

⁴ ma diat a kum tenawarua, i dedera a panidiat, kuma diat burut akit i, ma diat welara ma ra kum minat.

⁵ Ma ra agelo i piri ta diara ru tebuan, Koniku muru burut: kuma iau nunurai lena muru auarekup Iesu, ia ba di akwata i u ra kabai.

⁶ Pa i ki kumin; i a turu balet, lenkuma i a pira tai, Muru wan urin, muru bobo a bual a Tadaru i inep pa uni.

⁷ Ma muru wan kaka wapua diat a nuna tara‐na‐wawera lena i ā lalaun balet ko ra mat; ma i muka ta muat u Kalilaia; kura muat a bobo i iai: boboi, iau piratai ta muru.

⁸ Ma diara pari kaka ma ut ko ra ruma na minat, kuma diara burut, ma diara kaia akit kai, ma diara kala lena diara wapua diat uni a tara‐na‐wawera.

⁹ Ma boboi, Iesu i wan baratapa diara, ma i lena, Muru toka kaia ku. Ma diara wan tutuga i, diara pam a ru kakina, ma diara tutudug korom i.

¹⁰ Ma Iesu i piri ta diara lena, Koniku muru burut: muru wan, muru wapua, diat a kum tetegliklik lena diat a wan u Kalilaia, ma kura diat a bobo iau iai.

¹¹ Ma ba diara wan kubai, boboi ta magan ko diat a kum tenawarua diat wan u ra taman, ma diat wapua diat a kum tadaru na pinapet u ra kum lig rap di petai.

¹² Ma ba diat tolug ugai ma diat a kum takana, ma diat wepakpa, diat tari mogoro na măni ta diat a kum tenawineum, ma diat lena,

¹³ Muat a piri lenkumi, Ba miat inep u ra marum, diat a nuna tara‐na‐wawera diat wan pat ma diat rakanua i.

¹⁴ Ma ba a kovana i walogoro a lig kumi, kura miat a wamaram i, ma miat a wamalmal un muat.

¹⁵ Ma diat rakanpa a măni, ma diat peti lenkuma di wera diat uni: ma i winarag a pakan a pirapira kumi korom diat a Iudaia ma i tuk u ra bug kumi.

¹⁶ Ma diat a winunu ma rā a tara‐na‐wawera diat wan u Kalilaia, u ra tagai kuma Iesu i waputa diat uni:

¹⁷ ma ba diat bobo i, diat tutudug korom i: ma ta magan ko diat pa diat nuru un i.

¹⁸ Ma Iesu i wan korom diat ma i wapua diat lena, Di tari tag a nakokon rap u ra maua ma u vuravura kai.

¹⁹ Ia kuma muat a wan uni, muat a lotu ma diat a un‐a‐tara rap, ma muat a bapitaisota diat u ra ya ra Tamamuat ma na Tunalik ma ra Niono Tabu:

²⁰ muat a wera diat kai lena diat a taram u ra lig rap iau a piratai ta muat: ma boboi, Ăg weuru takum ma muat u ra bugbug na wanua rap, ma i tuk u ra tintinip na bug.