Mataio 24 - A Buk 1896 (Bible Portions)

20. PAKANA MA 4.

¹ Iesu i pari ko ra ruma‐na‐wetu lena in wan; ma ra nuna tara‐na‐wawera diat wan korom i lena diat a weai tana a kum ruma a nu ra ruma‐na‐lotu.

² Ma i piri ta diat: Muat boboi a kum lig rap kumi ni? iau piri ligtatuna ta muat, kura pa din madekta ta wat lena in tana wedaun un te bulug, kura din reg‐a‐pari‐rapuai.

³ Ma ba i ki u ra tagai na kum Olive, a kum disaipel diat wan korom i, ba diat ku, ma diat piri tana, Un wapua miat lena, U nagaian duk din pet a kum lig kuma?

⁴ Iesu i wapua diat uni lena, Muat katom ma koniku te in ben a raraua muat.

⁵ Kuma, kura ut ta kalina tara diat a wan urin u ra iag, ma diat a lena, Iau kumi, Karisito iau; ma diat a ben a raraua ta mogoro.

⁶ Ma kura muat a walogoro a wineum, ma ra wewapua u ra wineum: ma koni ku muat garā uni: kuma i ka ku ba in wan pat a kum lig kumi; ma pate utbai a tintinipina.

⁷ Kuma, rā un‐a‐tara kura diat a pet na wineum ma ra un‐a‐tara bulug, ma ra matanitu in pet na wineum ma ra matanitu bulug: kura kai a pupukai na minolo in wan pat, ma ra kuria kai u ra kum bual.

⁸ A kabi na gunugut ku a kum lig rap kumi.

⁹ Kura diat a taramaruai muat u ra gunugut ma diat a umdoko muat: ma ra tara u ra kum matanitu rap, kura diat a tebua akaka muat u ra iag.

¹⁰ Ta mogoro kura diat a tutukā, ma diat a taramaruai diat, ma diat a wetebua kai.

¹¹ Ta kalina parofita waruwaruka kai kura diat a wan pat, ma diat a ben a raraua diat a mogoro.

¹³ Ma ia ba in turu pătpătuantau in tuk u ra tintinipina, kura din walaun i.

¹⁴ Ma ra wewapua awakak kumi u ra matanitu, kura diat a wawera uni u ra kum wanua rap; ba a wakinilag ia korom diat a un‐a‐tara rap; ma na muru a tintinipina in wan pat marakam.

¹⁵ Ia kuma, ba muat boboi lena i tana u ra bual‐i‐tabu a lig kuma Daniel i a piratai, a milmiluan na lig, ia ba i wabap (ia ba i luki awakak ba in manana uni),

¹⁶ diat ba diat ki Iudaia, awakak ba diat a laun u ra kum tagai:

¹⁷ ma ia ba i ki na te u ra ruma, koniku in wan pari u ra balana lena in rakan a utna i tana u ra nuna ruma:

¹⁸ ma ia ba i tana ut u ra pinapam koniku in wan talili kup a nuna malu.

¹⁹ A kum peu ba diat kipbala, ma diat kai ba diat wagātu u ra pupukai kuma.

²⁰ Muat arig lena koniku in wan pat a numuat laun u ra pupukai na mudian, ba u ra bug tabu:

²¹ Ba lenkuma, in wan pat a gala na gunugut pa ta gunugut diara welara mai, tak u ra bug di pam‐kabinpa a vuravura uni, ma i tuk u ra bug kumi ma kura na muru pa ta gunugut diara welara mai.

²² Ba pa di pam a tiktikpa a pupukai kuma, pa in te in lalaun: ma u diat a tara wălwăliana kura din pam a tiktikanpa a pupukai kuma.

²³ Ba te in wapua muat lena, Le! Kuri Karisito, ba kuma ia; koniku muat nuru uni.

²⁴ Kăbi, kura a kum Karisito waruwaruka diat a wan pat, ma ra kum parofita waruwaruka kai, ma diat a weatai a kum wakinilag na wakaian, ma ra kum pinapam na kakaian; ba diat a ben‐a‐rara‐tama diat uni a tara na wălwăliana.

²⁵ Boboi, iau wapua‐mukata muat uni.

²⁷ Kuma, lenkuma a mămăme i papala tak u ra ist, ma i wan tuk u ra west; len kai kuma a winawan pat urin a nun na Tu‐ra‐muana.

²⁸ A bual kuma a minat i tana uni, a kum ikeli kai diat a tolug ugai iai.

²⁹ Ba i rap a pupukai na gunugut kuma, a make in ria ma ut, ma ra kalag pa in pua ma, a kum nagnag bulug diat a manunu pari ko ra lagit, ma in takunakuna a kum dekdek na lig i ra maua:

³⁰ ma in pua ma ut u ra lagit a wakinilag a nun na Tu‐ra‐muana: ma ra kum un‐a‐tara rap u ra kum wanua rap kura diat a luan, ma diat a bobo na Tu‐ra‐muana ba in wan pat u ra kum bakut i ra lagit, ma ra dekdek ma ra măramăra kokoina akit.

³¹ Ma in tula weranua diat a nuna kum agelo ma ra tinagi na tauru pi, ma diat a ben ugai diat a nuna tara wălwăliana, tak u ra wat na matana dadaip, ma tak u ra kabina lagit, ma i tuk u ra kabina bulug.

³² Muat a wawera u ra pirapira welwelara ko ra fik: Ba a kakana i kalom kubai ma i taradono, muat nunurai uni lena i marawai ku a pupukai na uan;

³³ lenkuma kai, ba muat bobo a kum lig rap kumi, muat nunurai lena i matiti ku, na ra bonanaka.

³⁴ Iau piri ligtatuna ta muat, A tauntara kumi pa in wan igen un ta pupukai kuma in wewaot uni a kum lig rap kumi.

³⁵ Kura in wan igen a maua, ma ra vuravura kai, a nug pirapira pa in wan igen.

³⁶ Pa te i nunurai a bug ma ra pakan a bug kuma; pate a kum agelo, pate na Tunalik kai, a Tamana ku.

³⁷ Lenkuma a pupukai kuma ba Noa i lalaun uni, len kai kuma a winawan pat urin a nun na Tu‐ra‐muana.

³⁸ Lenkuma u ra kum bug kuma ba pa i wan pat utbai a tai kuku; diat wagan ma diat inim, diat taula ma diat petwebat u ra tinaula, ma i tuk u ra bug kuma ba Noa i ka uni u ra parau;

³⁹ ma pa diat manana ma i tuk u ra pakan a wanua kuma a tai kuku i wan tau u diat uni, ma i rakan‐igen‐rapua diat; len kai kuma a winawan pat urin a nun na Tu‐ra‐muana.

⁴⁰ Kura ma ru muana diara ki ugai u ra pinapam; di rakanpa ku rā, rā bulug kura in tana:

⁴¹ ru tebuan kura diara uba padi, di rakanpa ku rā, ma rā i tana ku.

⁴² Ia kuma muat ki lauma ku: kuma pa muat nunura ta bug in wan pat uni a numuat Tadaru.

⁴³ Kumi muat nunurai, Ba a pet palig i nunura a pakan a lauma kuma a tenaualog in wan pat uni, in ki lauma ku, ma pa in madekua i lena in regpa a nuna ruma.

⁴⁴ Ia kuma muat pam tokon: kuma na Tu‐ra‐muana in wan pat urin u ra pakan a bug pa muat nukpai.

⁴⁵ O oi duk a wetula, a tenaligtatuna ma ra tenamanana, ia ba a nuna tadaru i tuturata i lena in nakokon diat u ra manākina, ba in tari a diat utna ta diat u ra nilai na winagan?

⁴⁶ In dan akit a wetula kuma ba a nuna tadaru in wan pat ma in bobo i lena i petpeti ut lenkuma.

⁴⁷ Iau piri ligtatuna ta muat in tuturata i lena in nakakon a nuna utna rap.

⁴⁸ Ba a wetula pikoina kuma i nuki u ra balana lena, A nug tadaru pa i wan kaka urin,

⁴⁹ ma i rapu kabinpa diat a kum tepapana, ma i wagan ma i inim ugai ma diat a kum tenamatipa;

⁵⁰ kura a tadaru a nu ra wetula kuma in wan pat u ra bug ba pa i ki pa i uni, ma u ra pakan a bug ba pa i nunurai,

⁵¹ ma in rapudokopa i, ma in dok ugai ma diat a kum tenawaruwaruka: kura diat tagtagi, ma wakirit a lokodi iai.