Mataio 15 - A Buk 1896 (Bible Portions)

10. PAKANA MA 5.

¹ A kum te Faresaio ma ra kum tenatimtimu diat wan taka Ierusalem korom Iesu, ma diat tiri lena,

² Lelawai a num tara‐na‐wawera diat pet a mampa a wawera a nu ra takana? kuma ba diat wagan pa diat ki a mukapa a limadiat.

³ Ma i piri ta diat, Lelawai muat kai muat pet a mampa a pirawebat a nun Nara u ra numuat wawera?

⁴ Kuma Nara i piri lena, Un ururu u diara tamam ma nam; ma ia ba i piri ululi u diara tamana ma nana, auakak ba din umua i.

⁵ Muat kai muat piri lena, Ia ba i piri tan tamana, ba nana lena, A nug lig kuma i ka korom ui di tari tan Nara;

⁶ koniku in ururu un tamana. Muat pet a mampa a pirapira a nun Nara u ra numuat wawera.

⁷ A kum tenawaruwaruka muat, Isaia i a parofisai na kuru un muat lena,

⁸ A tara kumi diat ururu un iau ma ra buli na wadiat; ma ra nuknukidiat i welwelik kon iau:

⁹ pa i ka a nudiat ararig korom iau, kuma a nudiat wawera diat wawera uni a onawa ra tara ku.

¹⁰ Ma i wata diat a tara‐na‐kaiya korom i, ma i wapua diat lena, Muat a walogoroi, muat a manana uni:

¹¹ A muana pa i kăpnaduru u ra lig kuma i ruk u ra wana, i kăpnaduru ku u ra lig ba i pari ko ra wana.

¹² A kum disaipel diat wan korom i ma diat tiri lena, Pa u nunurai duk lena, i pikoina a baladiat a kum te Faresaio ba diat walogoro a pakan a pirapira kuma?

¹³ I piri ta diat, A kum diwai rap ba Tamag pa i marutai, kura din katuai.

¹⁴ Muat madekua diat: a kum tenawarawi pula diat. Ba ta pula in warawi ta pula kura diara puka rap tau u ra tug.

¹⁵ Ma Petero i arig i lena, Un pira weai ta miat a pirapira welwelara kumi.

¹⁶ I piri lena, Muat kai pa muat manana utbai?

¹⁷ Pa muat nunurai lena, a kum lig rap ba i ruk u ra wadi, i wan aluru u ra baladi, ma di oguai u ra malala?

¹⁸ A kum lig rap ba i pari ko ra wadi, i wan toto ko ra baladi, diat kuma diat pet a durupa a muana.

¹⁹ Kuma i pari ko ra baladi a kan kanap pikoina, a wineum, a pet na tinauru, a pet leilei, a winalog, a welok, a wegagara:

²⁰ A kum lig kumi i pet a durupa a muana: ba i wagan ma pa‐i ki a mukapa a limana, a lig kuma pa i pet a durupa a muana.

²¹ Ma Iesu i wan taka iai, ma i wan u ra bual Turo ma Sidon.

²² Ma boboi rā tebuan a te Kanaan, i wan tak u ra pitpitina kuma, ma i wata i lena, Tadaru, na Tun David, un mari iau: na tuglik a wawina i gugut akit a panina kuma a tebaran i og i.

²³ Ma pa i piri ta lig tana. Ma diat a nuna tara na wawera diat wan korom i, ma diat arig i lena, Un tulua i, kuma i tagtagi murumuru dat.

²⁴ I piri ta diat lena, Di a tula iau korom diat ku a kum sipi i ra un a tara Isarel, diat ba diat rara.

²⁵ Ma ra tebuan i wan ma i tutudug koromi, ma i arig i lena, Tadaru un waraut iau.

²⁶ Ma i piri tana lena, Pa i ka ba di rakan a mandrai a diat a win a nat, ma di ogtai ta ra kum pap.

²⁷ A tebuan i piri lena, A ligtatuna Tadaru: ma ra kum pap diat an a kum mutamuta na utna i pukatau ko ra lū na winagan a nu ra nudiat tadaru.

²⁸ Ma Iesu i piri tana, Nelig, i gala akit a num nuru; din peti korom ui a lig kuma u lig kupi. Ma i lalaun na tunalik a wawina tak u ra pakan a bug kuma.

²⁹ Ma Iesu i wan taka iai, ma i wan na matiti na ra tai Kalilaia; ma i wan toto u ra tagai, ma i ki iai,

³⁰ Ma ra tara‐na‐kaiya pi diat wan korom i, ma diat ben diat korom i a kum buka, a kum pula, a kum mutmut, a kum papeu, ma mogoro na tara bulug, ma diat wainepta diat na ra kakina; ma i wakadelpa diat.

³¹ Ma ra tara‐na‐kaiya diat kakaian, ba diat bobo a kum mutmut diat pirapira, a kum papeu diat lalaun, a kum buka diat wan, ma ra kum pula diat bobo; ma diat pira walaua a Kalou a nu ra Israel.

³² Ma Iesu i wata diat a nuna kum disaipel korom i, ma i piri ta diat, Iau mari diat a tara‐na‐kaiya, kuma tul a bug diat tana nag ma pa ta utna ma diat an ani: ma pa iau ligna tulua diat ba diat molo, kaduk diat mat‐kiratau u ra akapi.

³³ Ma diat a kum disaipel diat piri tana, Dat a rakani taka wai, u ra bil bi, a kum kem na mandrai ba in wewaot u diat a kum tara‐na‐kaiya pi kumi?

³⁴ Iesu i tiri diat lena, Teadi a kem na mandrai muat paki? Diat piri tana, Limadi ma ruadi, ma ta kabana win a ien liklik ku.

³⁵ Ma i piri ta diat a tara‐na‐kaiya lena, diat a ki tau na pia;

³⁶ ma i rakanpa a limadi ma ruadi a kem na mandrai ma ra ien liklik kai, ma ba i lotupa mun, i bikweran‐apai, ma i tari ta diat a nuna kum disaipel, ma ra kum disaipel diat palau diat uni a tara‐na‐kaiya.

³⁷ Ma diat wagan rap ma diat mauru: ma diat tom ugai a kum mutamuta na utna diat ankopotai, ma limadi ma ruadi a ka diat wagan a tegpai mai.

³⁸ Diat ba diat wagan, a wat na nomara na muana diat, ma ra kum tebuan ma ra kum nat bulug pa diat luk diat.

³⁹ Ma i tulua diat a tara‐na‐kaiya, ma i ka u ra tampag, ma i wan pat u ra pitpit u Makadan.