Lukaa 24 - A Buk 1896 (Bible Portions)

IESU I TURU BALET KO RA MAT.

¹³ U ra bug kuma ba Iesu i turu balet uni ko ra mat, ruadi ko diat a kum tara wawera diara wan u ra taman a iana Emeo, i welwelik taka Ierusalema ru‐wat na maile.

¹⁴ Diara pirapiri ugai u ra kum lig rap kumi di a petai.

¹⁵ Ma ba diara pirapiri ugai, ma diara wetiri, Iesu i wan karai korom diara, ma ditul weuru.

¹⁶ Ma di petbat a matadiara ba pa diara nunura i.

¹⁷ I tiri diara lena, Awa duk a wewapua kumi muru pirapiri ugai uni, ba muru wan? Ma diara turu ma ku, ma i tumtumel a matadiara.

¹⁸ Ma rā pa diara a iana Kilopa, i piri tana, Ui ku duk u ki waira Ierusalema, ma pa u nunura a lig di peti iai u ra kum bug kumi?

¹⁹ I tiri diara uni lena, A lig awa? Diara piri tana, a kum lig un Iesu a te Nasareta, a parofita i dekdek akit u ra pinapam u ra pirapira na ra matan Nara, na ra matadiat a kum tara rap kai.

²⁰ Ma ra kum tadaru na pinapet, ma ra numiat kum tadaru diat taramarua i, ba di na ka kon uni lena in wirua, ma diat akwata i u ra kabai.

²¹ Miat nukpai, lena, ia ku in walaun diat a Israelu. Ma ta lig bulug, tul a bug utbai ba di petai a kum lig kumi.

²² Ma ra kum tebuan papa miat diat pet a kakaian miat, kuma diat kalarua kabot u ra ruma na minat;

²³ ma ba pa diat bobopa a minat, diat wan balet urin ma diat piri lena, A kum agelo diat pua korom diat, ma diat wapuata diat lena, I ā lalaun balet.

²⁴ Ma ta magan kon miat, diat wan u ra ruma na minat, ma diat bobotai lenkuma a kum tebuan diat piri ma ia pa diat bobo i.

²⁵ I piri ta diara lena, Muru rara, ma pa muru toka nuru u ra lig rap a kum parofita diat wapua‐mu katau uni.

²⁶ I ka ku korom a Karisito ba in karianai mun a kum lig kumi, ma in ruk na muru u ra nuna măramăra.

²⁷ Ma i pet kabinpai u ra buk a nun Mosese, ma i tuktau u ra buk a nu ra kum parofita, ma i pira‐weatai ta diara a lig rap ba i tana u ra Buk un ia.

²⁸ Ma ditul wan karai korom a taman diara ligna winawan uni: ma ia i wan lena in wan akit.

²⁹ Ma diara arig i, lena, Un ki ugai ma mira: kuma i malurap ma, ma ra ma ke i pot na lop. Ma i ruk in ki ugai ma diara.

³⁰ Ma ba ditul ki ugai u ra winagan, i rakanpa a kem na falaoa ma ba i lotupa mun, i bikweranapai, ma i tari ta diara.

³¹ Ma i tapalā mara kam a matadiara, ma diara nunura i: ma i panai ku ko ra matadiara.

³² Ma diara pirapiri ugai lena, Ka, pa i uan duk a baladara, ba i wapua dara u ra akapi, ma i pira‐weata kai a buk ta dara?

³³ Ma diara turu ma ut u ra pakan a bug kuma, diara wan balet u Ierusalema, ma diara bobo diat a winunu ma ra, diat tolug ugai, ma diat kai diat di ugai ma diat,

³⁴ ma diat lena, A Tadaru i turu balet ligatuna, i ā pua korom Simona.

³⁵ Diara kai diara wapuata diat u ra lig di petai u ra akapi, u ra ruma kai, kuma diara nunura i ba i bikweranapa a kem na falaoa.

³⁶ Ba diat pirapiri kubai u ra kum lig kumi, ia ku i turu na liwan ta diat, ma i piri ta diat, Muat a manatug.

³⁷ Ma i lăklă kontau a baladiat, ma diat burut akit, kuma diat kanapi lena diat bobo a tebaran.

³⁸ I piri ta diat, Awa muat burutai? Lelawai kuma i lăklă kontau a balamuat?

³⁹ Muat bobo a limag ma ra kakig, iau ku: muat a big‐tama iau, muat a nunura iau uni; kuma a tebaran pa ta kamonogina, ma pa ta urina, lenkuma muat bobo iau,

⁴⁰ Ma ba i piri a pirapira kumi, i weatai ta diat a limana ma ra kakina.

⁴¹ Ma ba pa diat nurutau utbai un i, kuma diat kaia, ma diat kakaian kai, i tiri diat lena, Muat paki ta utna na anian, ni?

⁴² Ma diat tabara i ma ta pakan a ien di tuntai u ra lākit.

⁴³ Ma i rakanpai, ma i anpai ku na ra matadiat.

⁴⁴ I wapua diat kai lenkumi, A lig kumi iau piratai ta muat, ba iau ki utbai na muat, kuma i ka ba di pet a wawaotpa a kum lig rap di a timutai un iau, u ra wewadu a nun Mosese, ma ra buk a nu ra kum parofita, ma ra buk na kelekele kai.

⁴⁵ Ma i pet‐pala a baladiat, ba diat a manana uni u ra Buk;

⁴⁶ Ma i piri ta diat, Di a timutai lenkumi, a Karisito in wirua, ma tul a bug in lalaun balet ko ra mat;

⁴⁷ ma din wawera u ra nunukpuku ma ra unuai a petakakai u ra iana, korom diat a un‐a‐tara rap, ba din pet kabinpai taka Ierusalema.

⁴⁸ A kum tenawewapua muat u ra kum lig kumi.

⁴⁹ Boboi, ăg tulai korom muat a lig ba Tamag i orotai: muat ki Ierusalema, ba in wan tau un muat mun a dekdek ko ra maua.

⁵⁰ Ma i ben‐igenpa diat ba diat wetutug ma Betania: ma i tulā a limana, ma i pira‐wadanpa diat.

⁵¹ Ma ba i pira‐wadanpa diat kubai, i wan talura diat, ma di rakan a toto i u ra maua.

⁵² Ma diat lotu korom i, ma diat wan balet u Ierusalema, ba diat kaia akit:

⁵³ Ma diat ki liklik u ra ruma na wetu, ma diat pirawalaua Nara iai.