Y-Yôp 9 - Klei Aê Diê Blŭ 2015

Y-Yôp Amâo Dưi Lŏ Wĭt Lač kơ Aê Diê Ôh

¹ Y-Yôp lŏ wĭt lač kơ Y-Bildat:

² “Sĭt nik kâo thâo klei anăn jing sĭt; ƀiădah si sa čô mnuih dưi mâo klei kpă ênô ti anăp Aê Diê?

³ Tơdah sa čô mnuih čiăng bi mgăl hŏng Aê Diê, pô anăn amâo dưi lŏ wĭt lač kơ Ñu ôh, sa blư̆ hlăm sa êbâo kăn dưi rei.

⁴ Ñu jing Pô knhâo, leh anăn bŏ hŏng klei myang — hlei pô tuôm bi kdơ̆ng hŏng Aê Diê leh anăn dưi? —

⁵ Aê Diê yơh jing Pô bi klưh phung čư̆, amâo brei digơ̆ thâo ôh, leh anăn bi klŭng digơ̆ hŏng klei Ñu ngêñ;

⁶ Pô êyuh lăn ala mơ̆ng anôk gơ̆, leh anăn kmeh gơ̆ ktư̆ yơ̆ng;

⁷ Pô mtă kơ yang hruê, leh anăn gơ̆ amâo ƀlĕ ôh; Pô guôm mtŭ amâo brei digơ̆ mtrang ôh;

⁸ knŏng hjăn Ñu yơh lang leh phung adiê, leh anăn juă ti dlông êlah êa ksĭ poh yă;

⁹ Pô hrih mtŭ Kgâo, mtŭ Ôriôn, mtŭ Plêat leh anăn phung mtŭ hlăm čar Dhŭng;

¹⁰ Pô ngă bruă prŏng êgao hĭn kơ klei dưi thâo săng, leh anăn klei yuôm bhăn amâo dưi yap ôh.

¹¹ Nĕ anei, Ñu găn giăm kâo, kâo amâo ƀuh Ñu ôh; Ñu hlŏng nao, kâo amâo kral Ñu ôh.

¹² Tơdah Ñu mă mđuĕ sa mta mnơ̆ng, hlei pô dưi ghă Ñu? Hlei dưi lač kơ Ñu, ‘Ya Ih ngă anăn?’

¹³ Aê Diê amâo srăng bi mlih ôh klei Ñu ngêñ; phung đru pô mgao buôn ti jơ̆ng Ñu.

¹⁴ Snăn si kâo dưi lŏ wĭt lač kơ Ñu, ruah boh blŭ bi mgăl hŏng Ñu?

¹⁵ Wăt tơdah kâo jing êngeh dưn, kâo amâo dưi lŏ wĭt lač kơ Ñu ôh; kâo knŏng kwưh klei pap mơ̆ng Khua phat kđi kâo.

¹⁶ Tơdah kâo iêô Ñu leh anăn Ñu lŏ wĭt lač kơ kâo, kâo amâo dưi đăo ôh kơ Ñu dôk hmư̆ asăp kâo.

¹⁷ Kyuadah Ñu brei angĭn êbŭ bi êbuh kâo, leh anăn bi lar anôk êka kâo amâo mâo klei;

¹⁸ Ñu amâo lŏ brei kâo dưi duah ai, ƀiădah Ñu bi bŏ kâo hŏng klei ênguôt ktrŏ.

¹⁹ Tơdah kâo mâo klei bi lông kơ klei ktang, Ñu dưi yơh! Tơdah nao kơ klei phat kđi, si kâo dưi kčŭt kơ Ñu?

²⁰ Wăt tơdah kâo jing êngeh, klei kâo blŭ srăng bi êdah kâo soh leh; wăt tơdah kâo jing kpă ênô Ñu srăng bi sĭt kâo jing wê.

²¹ Kâo kpă ênô yơh; kâo yap kâo pô amâo yuôm ôh; kâo bi êmut kơ klei hdĭp kâo.

²² Jih jang jing msĕ sơăi; snăn kâo lač, Ñu bi rai pô kpă wăt pô soh.

²³ Tơdah klei bi rai bi truh klei djiê bhiâo riâo rit, Ñu tlao mưč kơ klei knap mñai pô êngeh.

²⁴ Tơdah lăn čar lĕ hlăm kngan phung ƀai; Ñu guôm ală phung khua phat kđi ti lăn ala — tơdah amâo djŏ Ñu ngă klei anăn, hlei pô mkăn ngă lĕ?

²⁵ Hruê kâo dôk hdĭp jing pral hĭn kơ pô êran; diñu đuĕ nao leh anăn amâo ƀuh klei jăk mơak ôh.

²⁶ Diñu găn msĕ si kĭ mbô, msĕ si sa drei tlang phiơr trŭn mă čĭm.

²⁷ Tơdah kâo lač, ‘Kâo srăng lui hĕ klei kâo krao, kâo srăng bi êdah ƀô̆ mta mơak leh anăn tlao ƀuñ,’

²⁸ kâo huĭ kơ jih klei knap mñai kâo, kyuadah kâo thâo Ih amâo srăng yap kâo êngeh ôh.

²⁹ Tơdah Aê Diê ăt yap kâo jing soh; snăn, si ngă kâo lŏ bi tăng mgăl hơăi mang?

³⁰ Tơdah kâo mnei hŏng kƀu, leh anăn bi doh kngan kâo hŏng hbâo,

³¹ ăt Ih srăng dlăm kâo hlăm ƀlŭng čhông, leh anăn čhum ao kâo srăng ƀâo jhat.

³² Kyuadah Ñu amâo jing sa čô mnuih ôh msĕ si kâo jing, čiăng kâo dưi lŏ wĭt lač kơ Ñu, čiăng kơ hmei dưi truh kơ klei phat kđi.

³³ Čiăng snăk mâo sa čô pô ti krah hmei, pô dưi ênă kngan kơ jih hmei dua,

³⁴ pô dưi mă hĕ giê Aê Diê čăm mơ̆ng rŏng kâo, leh anăn klei huĭ kơ Ñu amâo srăng truh kơ kâo ôh.

³⁵ Leh anăn kơh kâo dưi blŭ hŏng Ñu amâo mâo klei huĭ ôh, ƀiădah ară anei kâo pô amâo dưi ngă snăn ôh.”