Y-Yôp 6 - Klei Aê Diê Blŭ 2015

Y-Yôp Ƀuah Phung Mah Jiăng Ñu

¹ Y-Yôp lŏ wĭt lač:

² “Ơ, hlei dưi mkă klei knap kâo, leh anăn dưm jih jang klei dleh dlan kâo ti dlông knăng!

³ Kyuadah klei anăn jing ktrŏ hĭn kơ čuah êa ksĭ; kyua anăn yơh kâo ruăt blŭ pliă plia.

⁴ Kyuadah ƀrăm Pô Mâo Jih Klei Myang djŏ ti kâo leh; mngăt kâo mnăm êa kêč kam diñu; klei Aê Diê bi huĭ ngă kơ kâo.

⁵ Si ngă aseh dliê ur mơ̆ tơdah ñu mâo rơ̆k ƀơ̆ng, amâodah êmô bŭ mơ̆ tơdah ñu mâo adrăng?

⁶ Dưi mơ̆ arăng ƀơ̆ng dŏ kba anăn tơdah amâo mâo hra ôh, amâodah mâo mơ̆ mnâo hlăm dŏ kô̆ boh mnŭ?

⁷ Kâo amâo čiăng ƀơ̆ng dŏ anăn ôh; dŏ anăn jing msĕ si mnơ̆ng ƀơ̆ng huă kâo bi êmut.

⁸ Ơ čiăng snăk kâo dưi mâo klei kâo akâo, leh anăn klei Aê Diê bi truh klei kâo čang guôn;

⁹ čiăng kơ Aê Diê mâo klei mơak juă bi rai kâo, čiăng kơ Ñu yơr kngan Ñu leh anăn bi luč hĕ kâo!

¹⁰ Klei anăn srăng jing klei bi juh kơ kâo; kâo ăt srăng mơak hlăm klei ruă kâo kjham kyuadah kâo amâo tuôm hngah ôh klei Pô Doh Jăk blŭ.

¹¹ Đơ mâo klei ktang kâo, tơl kâo srăng dôk čang guôn? Leh anăn ya jing klei knhal tuč kâo, tơl kâo dôk gĭr?

¹² Klei ktang kâo jing klei ktang boh tâo mơ̆, amâodah kđeh kâo jing kông mơ̆?

¹³ Sĭt nik kâo amâo mâo klei dưi đru kâo pô ôh, leh anăn akŏ klei đru kâo đuĕ kbưi leh mơ̆ng kâo.

¹⁴ Jing yuôm sa čô êdu ai ênguôt mâo klei đru mơ̆ng phung mah jiăng, huĭdah ñu hngah klei huĭ mpŭ kơ Pô Mâo Jih Klei Myang.

¹⁵ Phung ayŏng adei kâo jing phung lhiăr msĕ si hnoh êa êtăng, msĕ si êa lip đoh đuĕ,

¹⁶ êa anăn jing mmăt hŏng klŏ pliêr lik leh anăn pliêr bi bŏ êa krông.

¹⁷ Êjai mâo mđiă diñu khuôt hĕ, tơdah mâo klei hlơr diñu luč đuĕ mơ̆ng anôk diñu.

¹⁸ Phung đĭ aseh samô mdiăng mnơ̆ng weh mơ̆ng êlan diñu; diñu đĭ nao kơ kdrăn tač leh anăn rai tuč.

¹⁹ Phung đĭ aseh samô mdiăng mnơ̆ng mơ̆ng čar Têma duah hnoh êa, phung hiu čhĭ mnia mơ̆ng čar Sêba čang hmăng kơ êa.

²⁰ Diñu êdu ai kyuadah diñu knang leh; diñu truh leh anăn hêñ.

²¹ Msĕ snăn diih jing leh kơ kâo ară anei hin; diih ƀuh leh klei knap mñai kâo, leh anăn diih huĭ.

²² Kâo tuôm lač leh mơ̆, ‘Brei mnơ̆ng kơ kâo bĕ’? Amâodah ‘Myơr bĕ ngăn sun kơ kâo mơ̆ng ngăn drăp diih’?

²³ Amâodah ‘Bi mtlaih kâo bĕ mơ̆ng kngan pô roh kâo’? Amâodah ‘Bi tui kâo bĕ mơ̆ng kngan phung ktư̆ juă kâo’?

²⁴ Mtô kơ kâo bĕ, leh anăn kâo srăng dôk ñăt; brei kâo thâo săng si kâo soh leh.

²⁵ Klei blŭ ênuah mâo klei kčŭt êdi! Ƀiădah ya yuôm klei diih ƀuah?

²⁶ Diih mĭn mơ̆ diih dưi ƀuah klei kâo blŭ, êjai yap klei blŭ sa čô mnuih êdu ai jing msĕ si angĭn kpuh mđung?

²⁷ Diih ngă klei bi mđăo čiăng mâo anak êrĭt, leh anăn čhĭ mah jiăng diih.

²⁸ Ƀiădah ară anei brei diih dlăng kơ kâo; kyuadah kâo amâo srăng luar ôh ti anăp ƀô̆ mta diih.

²⁹ Kâo akâo kơ diih, wir bĕ, đăm ngă klei wê ôh. Lŏ mĭn bĕ, brei diih thâo kral klei kpă ênô kâo.

³⁰ Mâo mơ̆ klei wê ti êlah kâo? Amâo djŏ hĕ kâo dưi thâo săng klei djŏ leh anăn klei soh?”