Y-Yôp 41 - Klei Aê Diê Blŭ 2015

¹ “Dưi mơ̆ ih ktŭng mă mya prŏng hŏng wah, amâodah kă êlah ñu hŏng bră?

² Dưi mơ̆ ih čŭt jiên hlăm ƀăng adŭng ñu, amâodah tuăk kang ñu hŏng wah?

³ Ñu srăng kwưh kơ ih lu mơ̆? Ñu srăng blŭ êdu kơ ih mơ̆?

⁴ Ñu srăng ngă klei bi mguôp hŏng ih, brei ih mă ñu jing dĭng buăl kơ ih nanao mơ̆?

⁵ Ih srăng hlăp hŏng ñu msĕ si sa drei čĭm, amâodah kă klei đoh ti kkuê ñu brei kơ phung dĭng buăl mniê ih mơ̆?

⁶ Phung čhĭ mnia srăng mjuă ênoh ñu mơ̆? Arăng srăng bi mbha ñu hdơ̆ng phung mnia mơ̆?

⁷ Dưi mơ̆ ih tlŏ klĭt ñu hŏng kdrang amâodah tlŏ boh kŏ ñu hŏng juih?

⁸ Tơdah ih yơr kngan čiăng ngă kơ ñu, ih srăng hdơr kơ klei bi blah anăn, leh anăn ih amâo srăng lŏ ngă ôh!

⁹ Nĕ anei, klei čang hmăng čiăng mă ñu luč leh, knŏng ƀuh ñu, mnuih dlưh ai leh yơh.

¹⁰ Amâo mâo ôh sa čô ktang jhŏng čuih ai ñu. Snăn, hlei pô dưi bi kdơ̆ng hŏng Kâo?

¹¹ Hlei pô brei leh kơ Kâo, tơl Kâo srăng lŏ tla wĭt kơ ñu? Jih jang mnơ̆ng ti gŭ jih adiê jing dŏ Kâo.

¹² Kâo amâo srăng dôk kriêp ôh tơdah ƀuh jơ̆ng ñu, amâodah ƀuh klei ktang prŏng ñu, amâodah asei mlei siam ñu.

¹³ Hlei dưi lôk klĭt ñu? Hlei pô dưi bi hluh klĭt ñu dua tal?

¹⁴ Hlei dưi pŏk ƀăng êgei ñu? Jŭm êgei ñu mâo mnơ̆ng bi huĭ.

¹⁵ Ti rŏng ñu mâo kkaih lu msĕ si khil, diñu sir msĕ si mnơ̆ng kđăm.

¹⁶ Pŏk kkaih dôk bi ksĭng mbĭt tơl amâo mâo êwa angĭn dưi mŭt ti plah wah kkaih anăn ôh.

¹⁷ Diñu bi đuôm hdơ̆ng diñu; leh anăn diñu jing tlĭp tơl amâo dưi kpĕ mdê mdê ôh.

¹⁸ Êa adŭng ñu bhañ kbiă msĕ si kmlă, leh anăn ală ñu mơ mrăi msĕ si ang dar.

¹⁹ Ƀăng êgei ñu hrah mơhưk msĕ si pui arôk, tơl kčaĭ ti tač msĕ si mnga pui.

²⁰ Mơ̆ng ƀăng adŭng ñu kbiă săp pui, msĕ si kbiă mơ̆ng gŏ êa ktơ̆ng leh anăn msĕ si mơ̆ng anôk pui ƀơ̆ng suah trang.

²¹ Êwa ñu bi trơ̆ng pui hdăng, leh anăn êlah ñu hrah msĕ si pui kbiă mơ̆ng ƀăng êgei ñu.

²² Ti kkuê ñu mâo klei ktang, leh anăn arăng huĭ snăk ƀuh ñu.

²³ Anôk kčŭng kđeh ñu bi đuôm mbĭt, klĭt ñu khăng amâo dưi tĭ ôh.

²⁴ Tiê boh ñu khăng msĕ si boh tâo, khăng msĕ si boh tâo êsŭng tal gŭ.

²⁵ Tơdah ñu kgŭ, phung jhŏng ktang huĭ; tơdah ñu kteh ku ñu, digơ̆ kdŭn đuĕ.

²⁶ Wăt tơdah koh hŏng đao gưm, amâo dưi bi êka ñu ôh; tơdah tlŏ hŏng kju, hŏng juih amâodah hŏng kdrang kăn dưi rei.

²⁷ Ñu dlăng kơ msei msĕ si mbô, leh anăn kông msĕ si kyâo brŭ.

²⁸ Ƀrăm amâo dưi brei ñu đuĕ ôh, boh tâo arăng bhĭr ñu bi mlih jing adrăng.

²⁹ Wăt giê čăm ñu dlăng msĕ si adrăng; ñu tlao tơdah hmư̆ ênai kdrang.

³⁰ Tian ñu êkă msĕ si čeh mčah; ñu kdâo hlăm anôk lŭ msĕ si arăng prah mdiê.

³¹ Ñu brei êa êlam ktơ̆ng msĕ si gŏ êa hlơr, ñu bi ktlăk êa ksĭ msĕ si arăng dôk tlê êa drao hlăm čeh.

³² Ti tluôn ñu êa kbhoh mngač tui hlue; leh anăn ƀăng êlam jing kô̆ msĕ si ƀŭk mnuih mduôn.

³³ Ti lăn ala amâo mâo ôh mnơ̆ng msĕ si ñu, sa mnơ̆ng arăng hrih leh amâo mâo thâo huĭ ôh.

³⁴ Ñu dlăng kơ jih jang mnơ̆ng ti gŭ ñu sơăi, ñu jing mtao kơ jih jang hlô mnơ̆ng jhŏng ktang.”