Y-Yôp 40 - Klei Aê Diê Blŭ 2015

¹ Leh anăn Yêhôwa lŏ lač kơ Y-Yôp:

² “Pô blŭ dŭñ dŭñ srăng bi tăng hŏng Pô Mâo Jih Klei Myang mơ̆? Dưi mơ̆ pô bi tăng hŏng Aê Diê mâo klei găl?”

³ Y-Yôp lŏ wĭt lač kơ Yêhôwa:

⁴ “Nĕ anei, kâo jing pô amâo mâo ênoh yuôm ôh; ya kâo srăng lŏ wĭt lač kơ ih? Kâo kđhĭp ƀăng êgei kâo amâo lŏ blŭ ôh.

⁵ Kâo lač leh sa blư̆, leh anăn kâo amâo lŏ wĭt lač ôh; dua blư̆ mơh, ƀiădah kâo amâo srăng lŏ blŭ ôh.”

Klei Bi Êdah Klei Myang Aê Diê

⁶ Leh anăn Yêhôwa lŏ wĭt lač kơ Y-Yôp mơ̆ng angĭn đrŭng:

⁷ “Hyuă bĕ kơiêng ih msĕ si sa čô mnuih jhŏng; Kâo srăng êmuh kơ ih, leh anăn brei ih lŏ wĭt lač kơ Kâo.

⁸ Ih srăng brei wăt Kâo jing soh mơ̆? Ih srăng yap Kâo soh čiăng ih dưi mâo klei yap kpă mơ̆?

⁹ Ih mâo mơ̆ păl ktang msĕ si Aê Diê, leh anăn dưi mơ̆ asăp ih đah msĕ si grăm msĕ si Aê Diê?

¹⁰ Bi hơô bĕ ih pô hŏng klei kdrăm leh anăn kơhưm; leh anăn hơô bĕ klei guh kơang leh anăn klei kmlăi.

¹¹ Tuh bĕ klei ih ngêñ bŏ dlai, leh anăn dlăng bĕ kơ hlei pô jing mgao čiăng bi mdlưh ñu.

¹² Dlăng kơ grăp čô hlei pô jing mgao, leh anăn bi mtrŭn ñu; leh anăn juă lin phung ƀai ti anôk diñu dôk.

¹³ Dơr hĕ jih jang diñu mđrăm mbĭt hlăm ƀruih lăn; păn čhiăm ti ƀô̆ mta diñu hlăm msat.

¹⁴ Hlăk anăn mơh Kâo srăng tŭ kơ ih mâo klei dưi ih pô hŏng kngan hnuă ih.

¹⁵ Nĕ anei, êmô ara, mnơ̆ng Kâo mjing leh msĕ si Kâo mjing ih leh; ñu ƀơ̆ng rơ̆k msĕ si sa drei êmô.

¹⁶ Nĕ anei, dlăng kơ klei ktang hlăm kơiêng ñu, leh anăn klei mơai ñu hlăm kđeh tian ñu.

¹⁷ Ñu bi khăng ku ñu msĕ si kyâo sêdar; aruăt pha ñu bi kuĭ mbĭt.

¹⁸ Klang ñu jing msĕ si đĭng kông, jơ̆ng ñu msĕ si giê msei.

¹⁹ Ñu jing bruă tal sa Aê Diê ngă; knŏng Pô mjing ñu leh dưi suê̆ đao gưm kăp ngă kơ ñu!

²⁰ Kyuadah čư̆ brei mnơ̆ng ƀơ̆ng kơ ñu, ti anôk mâo jih jang hlô dliê hiu hlăp.

²¹ Ti gŭ rơ̆k krih ñu đih, ti anôk hgăm hlăm suah trang leh anăn trăp.

²² Rơ̆k krih guôm ñu hŏng êyui gơ̆; kyâo sôl ti hnoh êa dôk jŭm ñu.

²³ Nĕ anei, tơdah êa lêč ñu amâo huĭ ôh; ñu dôk êđăp ênang wăt tơdah êa krông Yurdan tlă ƀăng êgei ñu.

²⁴ Dưi mơ̆ arăng mă ñu hŏng wah, amâodah čŭt jiên ti ƀăng adŭng ñu hŏng klei?”