Y-Yôp 38 - Klei Aê Diê Blŭ 2015

Aê Diê Brei Y-Yôp Thâo Klei Ñu Jing Mluk

¹ Yêhôwa lŏ wĭt lač kơ Y-Yôp mơ̆ng angĭn đrŭng:

² “Hlei pô anei bi mmăt klei kčĕ hŏng klei blŭ amâo mâo klei thâo săng ôh?

³ Hyuă hdrăng kơiêng ih msĕ si sa čô mnuih jhŏng, Kâo srăng êmuh kơ ih, leh anăn ih srăng hưn kơ Kâo.

⁴ Ti anôk ih dôk hlăk Kâo dưm atur kơ lăn ala? Hưn bĕ kơ Kâo, tơdah ih mâo klei thâo săng.

⁵ Hlei bi kčah klei mkă ñu — sĭt nik ih thâo leh! amâodah hlei dăng klei mkă ti dlông ñu?

⁶ Ti dlông ya mnơ̆ng arăng dưm atur ñu, amâodah hlei dưm boh tâo kiêng ñu,

⁷ tơdah jih jang mtŭ aguah mmuñ mđrăm mbĭt, leh anăn jih jang phung anak êkei Aê Diê driâo hơ̆k?

⁸ Amâodah hlei pô kơ̆ng hĕ êa ksĭ, tơdah ñu kbiă lip mơ̆ng tian ñu;

⁹ tơdah Kâo mjing knam brei guôm ñu, leh anăn klei mmăt kpal jing msĕ si čhiăm păn kơ ñu,

¹⁰ leh anăn bi kčah kdriêl kơ ñu, leh anăn kơ̆ng hĕ ñu,

¹¹ leh anăn lač, ‘Tăp anei yơh ih srăng truh, leh anăn đăm lŏ nao kbưi hĭn ôh, leh anăn êa poh yă ih srăng kơ̆ng tăp anei yơh’?

¹² Ih tuôm mtă brei aguah truh mơ̆ mơ̆ng hruê ih mphŭn dôk hdĭp, leh anăn brei ang dar gơ̆ thâo anôk gơ̆ dôk,

¹³ čiăng kơ ñu djă knhal lăn ala, leh anăn suôt hĕ phung ƀai mơ̆ng anăn?

¹⁴ Klei anăn mlih leh msĕ si lŭ ti gŭ mnơ̆ng kđăm, leh anăn mâo klei mprăp msĕ si čhiăm ao.

¹⁵ Arăng mđuĕ hĕ klei mngač kơ phung ƀai, leh anăn arăng bi joh hĕ păl diñu yơr leh.

¹⁶ Ih tuôm trŭn mơ̆ truh ti akŏ êa ksĭ, amâodah êbat ti anôk êa êlam?

¹⁷ Arăng tuôm bi êdah mơ̆ kơ ih ƀăng jang klei djiê, amâodah ih tuôm ƀuh mơ̆ ƀăng jang klei mmăt kpal?

¹⁸ Ih tuôm thâo săng jih mơ̆ boh prŏng lăn ala? Bi êdah bĕ tơdah ih thâo jih klei anăn.

¹⁹ Ti êlan nao kơ anôk klei mngač, leh anăn ti anôk klei mmăt dôk,

²⁰ čiăng kơ ih dưi ba klei anăn kơ anôk pioh kơ ñu, leh anăn čiăng ih dưi ksiêm êlan atăt kơ sang ñu?

²¹ Ih thâo yơh, kyuadah arăng kkiêng leh kơ ih ênuk anăn, leh anăn hruê ih dôk hdĭp jing lu!

²² Ih tuôm mŭt leh mơ̆ hlăm hjiê pioh pliêr, amâodah ih tuôm ƀuh leh mơ̆ hjiê pioh klŏ pliêr,

²³ dŏ anăn Kâo pioh leh kơ ênuk rŭng răng, kơ hruê mâo klei bi blah?

²⁴ Ti êlan nao kơ anôk arăng bi mbha klei mngač, amâodah ti anôk arăng bi mbha angĭn mơ̆ng ngŏ ti lăn ala?

²⁵ Hlei pô pŏk êlan kơ êa hjan kbiă, leh anăn êlan kơ grăm đah,

²⁶ čiăng brei adiê hjan ti lăn amâo mâo mnuih dôk ôh; ti kdrăn tač kăn mâo mnuih rei;

²⁷ čiăng bi msah anôk lăn êhŏng leh anăn amâo jing mnơ̆ng ôh, leh anăn čiăng brei lăn bi čăt rơ̆k?

²⁸ Hjan mâo ama mơ̆, amâodah hlei pô bi rôč êa nguôm?

²⁹ Hlei bi kbiă klŏ êa êăt, leh anăn hlei bi lĕ êa pliêr mơ̆ng adiê?

³⁰ Êa jing khăng hĕ msĕ si boh tâo, leh anăn êlah êa êlam jing êkŏ hĕ.

³¹ Ih dưi mơ̆ kă klei săng đai ti mtŭ Plêat, amâodah bi tloh bră mơ̆ng mtŭ Ôriôn?

³² Ih dưi mơ̆ atăt mtŭ Masarôt djŏ yan gơ̆, amâodah dưi mơ̆ atăt gai mtŭ Kgâo mbĭt hŏng êđai gơ̆?

³³ Ih thâo săng mơ̆ klei bhiăn hlăm adiê? Dưi mơ̆ ih bi truh klei bhiăn anăn brei kiă kriê lăn ala?

³⁴ Dưi mơ̆ ih mđĭ asăp ih mtă kơ knam, tơl êa lip guôm ih?

³⁵ Dưi mơ̆ ih tiŏ nao kmlă, čiăng kơ diñu nao leh anăn lač kơ ih, ‘Tinei hmei’?

³⁶ Hlei pô dưm klei knhâo hlăm ai tiê, amâodah brei leh klei thâo săng kơ akŏ dlô?

³⁷ Hlei dưi yap knam hŏng klei knhâo? Amâodah hlei dưi brei knam hlăm phung adiê bi lĕ êa hjan,

³⁸ tơdah bruih bi klŏ leh anăn klŏ lăn bi đuôm mbĭt kjăp?

³⁹ Dưi mơ̆ ih duah brei knuôp kơ êmông gu ana, amâodah bi trei êđai êmông gu,

⁴⁰ tơdah digơ̆ dôk pun hlăm ƀăng digơ̆, amâodah buôn kăp ti anôk hgăm?

⁴¹ Hlei brei kơ ak mnơ̆ng ñu ƀơ̆ng, tơdah êđai ñu ur kơ Aê Diê, leh anăn hiu tar ƀar kyua kƀah mnơ̆ng ƀơ̆ng huă?”