Y-Yôp 37 - Klei Aê Diê Blŭ 2015

¹ “Hmư̆ klei anei ai tiê kâo yơ̆ng, leh anăn kpư̆ čiăng kbiă mơ̆ng anôk gơ̆.

² Dôk hmư̆ bĕ asăp Ñu msĕ si ênai grăm dah leh anăn ênai grêñ kbiă mơ̆ng ƀăng êgei Ñu. Ñu phưi kmlă Ñu găn jih adiê,

³ Ti gŭ jih adiê Ñu brei klei anăn truh, tơl truh jih kiêng lăn ala.

⁴ Êdei tinăn, asăp Ñu gruh; asăp Ñu đah msĕ si grăm hŏng klei kdrăm, leh anăn Ñu amâo kơ̆ng ôh kmlă êjai arăng hmư̆ asăp Ñu.

⁵ Asăp Aê Diê đah hŏng klei yuôm bhăn; Ñu ngă bruă prŏng drei amâo dưi thâo săng ôh.

⁶ Kyuadah kơ klŏ êa pliêr Ñu lač, ‘Lĕ bĕ ti lăn ala’; leh anăn kơ êa hjan Ñu lač, ‘Hjan bĕ bi ktang’.

⁷ Ñu kđăl hĕ jih jang mnuih brei dôk hlăm sang, čiăng kơ jih jang mnuih thâo bruă Ñu.

⁸ Hlô mnơ̆ng mŭt hlăm hruh diñu, leh anăn ăt dôk hlăm ƀăng diñu.

⁹ Angĭn êbŭ kbiă mơ̆ng Dhŭng, angĭn mơ̆ng Dưr bi truh klei êăt.

¹⁰ Hŏng êwa Aê Diê bi êkŏ jih êa hnoh, leh anăn êa prŏng jing khăng msĕ si boh tâo êăt.

¹¹ Ñu bi bŏ knam kpal hŏng êa, knam bi bra đuĕ kmlă Ñu.

¹² Knam dar wĭt nao hriê tui si Ñu gai, čiăng bi truh jih klei Ñu mtă kơ digơ̆, ti rŏng lăn ala anôk arăng dưi dôk.

¹³ Ñu brei klei anăn truh thâodah jing klei mkra, amâodah kyua čiăng brei lăn jing, amâodah čiăng bi êdah klei Ñu khăp.

¹⁴ Hmư̆ bĕ klei anei, Ơ Y-Yôp, mjưh bĕ leh anăn ksiêm mĭn kơ bruă yuôm bhăn Aê Diê ngă.

¹⁵ Ih thâo mơ̆ si Aê Diê kiă kriê knam, leh anăn brei kmlă mơ̆ng knam ñu mtrang?

¹⁶ Ih thâo mơ̆ si knam đung kjăp ti dlông, anăn jing bruă yuôm bhăn mơ̆ng Pô mâo klei thâo săng klă,

¹⁷ Ih, pô mâo čhiăm ao hlơr, êjai lăn ala dôk ngơ ngĭn kyua angĭn mơ̆ng dhŭng

¹⁸ Dưi mơ̆ ih lang adiê msĕ si Ñu, khăng msĕ si ală kĭng arăng tuh?

¹⁹ Mtô bĕ kơ hmei ya hmei srăng lač kơ Ñu; hmei amâo dưi bi êdah klei hmei ôh kyua klei mmăt hmei.

²⁰ Arăng srăng hưn kơ Ñu mơ̆ kơ kâo srăng blŭ? Mâo mơ̆ mnuih čiăng kơ klei Ñu rai tuč?

²¹ Ară anei, arăng amâo dưi dlăng ală kơ yang hruê ôh, angĭn thut kpuh mđung hĕ leh knam mơ̆ng adiê.

²² Mơ̆ng dưr kbiă hriê klei guh msĕ si mah; Aê Diê hơô klei kdrăm kơah bi krưp.

²³ Pô Mâo Jih Klei Myang — drei amâo dưi tơl truh kơ Ñu ôh; Ñu jing prŏng hŏng klei myang leh anăn klei kpă ênô, leh anăn Ñu amâo srăng bi msoh ôh klei djŏ.

²⁴ Kyua anăn mnuih huĭ mpŭ kơ Ñu; Ñu amâo uêñ ôh hlei pô jing knhâo tui si gơ̆ pô mĭn.”