Y-Yôp 36 - Klei Aê Diê Blŭ 2015

Y-Êlihu Bi Mni kơ Klei Aê Diê Jing Prŏng

¹ Y-Êlihu ăt blŭ leh anăn lač:

² “Gĭr hŏng kâo đa, leh anăn kâo srăng bi êdah kơ ih, kyuadah kâo ăt mâo klei čiăng blŭ tĭng kơ Aê Diê.

³ Kâo mă klei thâo săng mơ̆ng anôk kbưi, čiăng yap Pô Hrih kâo jing kpă.

⁴ Kyuadah sĭt nik klei kâo blŭ amâo jing luar ôh, mâo sa čô pô thâo săng klă dôk ti anăp ih.

⁵ Nĕ anei, Aê Diê jing myang, amâo bi êmut kơ arăng ôh; Ñu jing myang leh anăn klei Ñu čuăn jing kjăp.

⁶ Ñu amâo pioh ôh pô ƀai ăt dôk hdĭp, ƀiădah phat kđi kpă kơ pô mâo klei knap mñai.

⁷ Ală Ñu amâo hngah ôh dlăng kơ phung kpă, Ñu dưm digơ̆ nanao mbĭt hŏng phung mtao ti jhưng mtao, leh anăn digơ̆ mâo klei mpŭ hlŏng lar.

⁸ Ƀiădah tơdah arăng kă digơ̆ hŏng klei săng đai, leh anăn tling digơ̆ hŏng bră klei knap mñai,

⁹ hlăk anăn Ñu hưn kơ digơ̆ bruă digơ̆ ngă leh anăn klei digơ̆ soh, jing klei digơ̆ mgao.

¹⁰ Ñu pŏk knga digơ̆ čiăng thâo săng klei Ñu ƀuah mkra, leh anăn mtă brei digơ̆ kmhal kơ klei wê.

¹¹ Tơdah digơ̆ gưt leh anăn mă bruă kơ Aê Diê, digơ̆ bi ruê̆ hruê digơ̆ dôk hdĭp hŏng klei čăt đĭ, leh anăn hŏng klei hơ̆k mơak.

¹² Ƀiădah tơdah digơ̆ amâo dôk hmư̆ ôh, digơ̆ rai tuč hŏng đao gưm, leh anăn djiê hŏng klei amâo thâo săng ôh.

¹³ Ai tiê phung amâo mâo đăo khăp kơ klei ngêñ; digơ̆ amâo ur ôh čiăng mâo klei đru tơdah Aê Diê kă digơ̆.

¹⁴ Digơ̆ djiê êjai hlăk ai, leh anăn klei hdĭp digơ̆ tuč ruê̆ mbĭt hŏng phung kkuh mpŭ hŏng klei ngă knhông.

¹⁵ Ñu bi mtlaih phung knap mñai hŏng klei knap truh kơ digơ̆, leh anăn pŏk knga digơ̆ hŏng klei jŭ jhat truh.

¹⁶ Msĕ mơh Ñu hrip ih brei kbiă mơ̆ng klei rŭng răng brei mŭt hlăm anôk êhai amâo mâo klei kpĭ ôh, leh anăn mnơ̆ng arăng mdơ̆ng ti jhưng huă ih jing jăk ƀơ̆ng.

¹⁷ Ƀiădah lĕ ih tŭ klei bi kmhal năng djŏ kơ phung ƀai; klei arăng phat kđi leh anăn klei bi wĭt klei djŏ ngă kơ ih.

¹⁸ Răng bĕ huĭdah klei ngêñ mplư ih brei ih mưč; leh anăn đăm brei ngăn sun lu bi weh êlan ih.

¹⁹ Klei ih mdrŏng srăng mgang ih kơ klei rŭng răng mơ̆, amâodah jih klei ktang ih srăng mgang ih mơ̆?

²⁰ Đăm čang hmăng ôh kơ mlam truh, hlăk anăn arăng bi rai phung ƀuôn sang mơ̆ng anôk diñu dôk.

²¹ Răng bĕ, đăm wir ngă klei wê ôh, kyuadah ih khăp leh klei anăn lu hĭn kơ klei knap.

²² Nĕ anei, Aê Diê mâo klei mpŭ kyua klei myang Ñu, hlei jing pô mtô msĕ si Ñu?

²³ Hlei pô kčĕ brei leh êlan kơ Ñu, amâodah hlei pô dưi lač, ‘Ih ngă soh leh?’

²⁴ Hdơr bi mni bĕ kơ bruă Ñu, kơ bruă anăn phung mnuih mmuñ bi mni leh.

²⁵ Jih jang mnuih dlăng leh kơ klei anăn, phung mnuih dlăng kơ klei anăn mơ̆ng kbưi.

²⁶ Nĕ anei, Aê Diê jing prŏng hĭn, êgao kơ drei dưi thâo săng; dŭm thŭn Ñu dôk hdĭp arăng amâo dưi yap ôh.

²⁷ Kyuadah Ñu mđĭ aruăt êa kơ dlông, Ñu bi rôč êa nguôm Ñu jing hjan,

²⁸ adiê hjan, leh anăn tlua mnuih lu snăk.

²⁹ Dưi mơ̆ sa čô thâo săng klei Aê Diê lang knam, klei Ñu brei grăm đah mơ̆ng anôk Ñu dôk?

³⁰ Nĕ anei, Ñu bi ƀlĕ kmlă jŭm dar Ñu, leh anăn trŭn truh ti tur êa ksĭ.

³¹ Hŏng klei anăn Ñu kiă kriê phung ƀuôn sang; Ñu brei mnơ̆ng ƀơ̆ng huă êbeh dlai.

³² Ñu djă kmlă hlăm kngan Ñu, leh anăn hwiê gơ̆ ti anôk Ñu bi kčah.

³³ Ñu hưn kơ Ñu pô hŏng ênai grăm dah, wăt hlô mnơ̆ng thâo mơh klei ñu amra truh.”