Y-Yôp 34 - Klei Aê Diê Blŭ 2015

Y-Êlihu Bi Êdah Aê Diê Jing Kpă

¹ Y-Êlihu lač:

² “Hmư̆ bĕ klei kâo blŭ, diih phung mnuih knhâo, leh anăn mđing knga bĕ kơ kâo, diih phung thâo săng;

³ kyuadah hŏng knga arăng ksiêm klei blŭ, msĕ si êlah djiêl mnơ̆ng ƀơ̆ng huă.

⁴ Brei drei ruah ya jing djŏ; brei drei ksiêm hdơ̆ng drei ya jing jăk.

⁵ Kyuadah Y-Yôp lač leh, ‘Kâo jing êngeh, leh anăn Aê Diê mă mđuĕ leh klei kâo jing djŏ;

⁶ wăt kâo mâo klei djŏ dưn, arăng yap kâo leh jing sa čô luar; anôk êka kâo amâo thâo hlao ôh, wăt tơdah kâo amâo tuôm soh ôh.’

⁷ Hlei mnuih jing msĕ si Y-Yôp, pô mnăm klei mưč msĕ si arăng mnăm êa,

⁸ pô bi mguôp mbĭt hŏng phung ngă klei jhat leh anăn êbat mbĭt hŏng phung ƀai?

⁹ Kyuadah ñu lač leh, ‘Amâo mâo klei tŭ dưn ôh kơ sa čô mnuih tơdah ñu mâo klei mơak hlăm Aê Diê.’

¹⁰ Snăn hmư̆ bĕ kâo, diih phung mnuih thâo săng, Aê Diê amâo dưi ngă klei ƀai ôh hơăi, leh anăn Pô Mâo Jih Klei Myang amâo dưi ngă soh ôh.

¹¹ Kyuadah tui si bruă sa čô mnuih, Aê Diê srăng mưn ñu, leh anăn tui si klei ñu ngă, Aê Diê srăng bi truh kơ ñu.

¹² Sĭt nik Aê Diê amâo srăng ngă klei ƀai ôh, leh anăn Pô Mâo Jih Klei Myang amâo srăng bi msoh klei kpă ôh.

¹³ Hlei brei Aê Diê jing khua kơ lăn ala, leh anăn hlei jao kơ Ñu jih lăn ala?

¹⁴ Tơdah Ñu mă wĭt mngăt Ñu kơ Ñu pô, leh anăn bi kƀĭn kơ Ñu pô êwa Ñu,

¹⁵ hlăk anăn jih jang kđeh srăng rai tuč mđrăm mbĭt, leh anăn mnuih srăng lŏ wĭt kơ bruih lăn.

¹⁶ Tơdah diih mâo klei thâo săng, hmư̆ bĕ klei anei; mđing knga kơ klei kâo blŭ.

¹⁷ Srăng mâo mơ̆ sa čô bi êmut kơ klei kpă jing khua kiă kriê? Ih jhŏng ƀuah mơ̆ Pô jing kpă leh anăn Pô mâo klei dưi,

¹⁸ pô lač kơ sa čô mtao, ‘Pô hơăi mang,’ leh anăn kơ phung khua, ‘Pô ƀai’;

¹⁹ Pô amâo dôk tĭng kơ phung khua ôh, kăn uêñ kơ phung mdrŏng lu hĭn kơ phung ƀun ƀin rei, kyuadah jih jang digơ̆ jing bruă kngan Ñu ngă?

²⁰ Bhiâo riâo rit digơ̆ djiê; ti krah mlam phung ƀuôn sang ktư̆ yơ̆ng leh anăn êgao tuč, leh anăn phung ktang luč amâo djŏ ôh kyua kngan mnuih ngă.

²¹ Kyuadah ală Aê Diê kăp dlăng kơ êlan phung mnuih, leh anăn Ñu ƀuh jih knhuang digơ̆.

²² Amâo mâo ôh anôk êyui amâodah mmăt kpal, tinăn phung ngă soh dưi đuĕ dăp.

²³ Kyuadah amâo yuôm Ñu lŏ ksiêm phung mnuih, tơl digơ̆ nao kơ klei phat kđi ti anăp Aê Diê.

²⁴ Ñu bi mčah phung ktang amâo mâo ksiêm klei digơ̆ êlâo ôh, leh anăn dưm pô mkăn hrô anôk digơ̆.

²⁵ Msĕ snăn, kyuadah Ñu thâo kral bruă digơ̆, Ñu mdlưh digơ̆ êjai mlam, leh anăn digơ̆ mčah rai.

²⁶ Ñu čăm digơ̆ kyua klei wê digơ̆ ngă, brei grăp čô ƀuh digơ̆.

²⁷ Kyuadah digơ̆ weh amâo lŏ tui hlue Ñu ôh, leh anăn amâo uêñ ôh kơ êlan Ñu.

²⁸ Snăn digơ̆ brei klei phung ƀun ƀin krao truh kơ Ñu, leh anăn Ñu hmư̆ asăp phung knap mñai ur.

²⁹ Tơdah Ñu dôk kriêp, hlei pô dưi phat kđi Ñu? Tơdah Ñu mdăp ƀô̆ Ñu, hlei pô dưi ƀuh Ñu, thâodah sa găp djuê amâodah sa čô mnuih?

³⁰ Čiăng kơ Ñu đăm brei sa čô mnuih amâo đăo jing mtao ôh; čiăng kơ pô anăn amâo srăng bi lĕ phung ƀuôn sang hlăm kđông ôh.

³¹ Kyuadah tuôm mâo mơ̆ sa čô lač leh kơ Aê Diê, ‘Kâo tŭ leh klei mkra; kâo amâo srăng lŏ ngă soh ôh;

³² mtô bĕ kơ kâo ya klei kâo amâo thâo săng ôh; tơdah kâo tuôm ngă leh klei wê, kâo amâo srăng lŏ ngă klei anăn ôh.’

³³ Snăn Aê Diê srăng brei klei mưn tui si ih čiăng mơ̆, kyuadah ih hngah klei mkra anăn? Kyuadah ih yơh srăng ruah, amâo djŏ kâo ôh; snăn hưn bĕ ya klei ih thâo.

³⁴ Phung mnuih mâo klei thâo săng srăng lač kơ kâo, leh anăn mnuih knhâo dôk hmư̆ kâo srăng lač:

³⁵ ‘Y-Yôp blŭ amâo mâo hŏng klei thâo săng ôh, leh anăn klei ñu blŭ amâo mâo klei ksiêm mĭn ôh.’

³⁶ Čiăng kơ Y-Yôp tŭ klei lông dlăng tơl knhal tuč, kyuadah ñu lŏ wĭt lač msĕ si phung mnuih ƀai.

³⁷ Kyuadah ñu lŏ thiăm klei bi kdơ̆ng mbĭt hŏng klei soh ñu; ñu pah kngan ñu ti anăp hmei, leh anăn lŏ bi lar klei ñu blŭ bi kdơ̆ng hŏng Aê Diê.”