Y-Yôp 32 - Klei Aê Diê Blŭ 2015

Y-Êlihu Bi Êdah Si Klei Ñu Dưi Lŏ Wĭt Lač kơ Y-Yôp

¹ Snăn tlâo čô êkei anăn mdei klei lŏ wĭt lač kơ Y-Yôp, kyuadah Y-Yôp yap ñu pô kpă ênô leh.

² Kyua anăn Y-Êlihu, anak êkei Y-Barakel mnuih mơ̆ng čar Bus mơ̆ng găp djuê Ram đĭ ai ăl. Ñu ăl kơ Y-Yôp kyuadah gơ̆ yap gơ̆ pô kpă ênô hĭn kơ Aê Diê.

³ Ñu ăl msĕ mơh kơ tlâo čô mah jiăng Y-Yôp, kyuadah diñu amâo mâo klei lŏ wĭt lač ôh, wăt tơdah diñu hưn kơ Y-Yôp soh leh.

⁴ Y-Êlihu dôk guôn leh čiăng blŭ kơ Y-Yôp, kyuadah digơ̆ mduôn hĭn kơ ñu.

⁵ Leh anăn tơdah Y-Êlihu ƀuh tlâo čô êkei anăn amâo dưi mâo klei lŏ wĭt lač ôh, ñu đĭ ai ăl.

⁶ Leh anăn Y-Êlihu anak êkei Y-Barakel mơ̆ng čar Bus lŏ wĭt lač: “Kâo jing hlăk ai, leh anăn diih mduôn leh; kyua anăn kâo mâo klei guam leh anăn huĭ hưn klei kâo mĭn kơ diih.

⁷ Kâo lač, ‘Brei pô dôk hdĭp sui hruê blŭ, leh anăn pô dôk hdĭp sui thŭn mtô klei knhâo.’

⁸ Ƀiădah jing mngăt hlăm sa čô mnuih yơh, êwa mơ̆ng Pô Mâo Jih Klei Myang brei ñu dưi thâo săng.

⁹ Amâo djŏ ôh pô mduôn jing pô knhâo, kăn djŏ rei sa čô khua leh dưi thâo săng klei djŏ.

¹⁰ Snăn kâo lač, ‘Dôk hmư̆ kâo bĕ; brei kâo msĕ mơh hưn klei kâo mĭn.’

¹¹ Nĕ anei, kâo dôk guôn klei diih blŭ, kâo kăp hmư̆ kơ klei diih lač hŏng klei knhâo, êjai diih duah ya klei lŏ wĭt lač.

¹² Kâo mđing knga kơ diih, leh anăn nĕ anei, amâo mâo sa čô hlăm phung diih brei Y-Yôp tŭ ñu pô jing soh, amâodah dưi lŏ wĭt lač djŏ kơ klei ñu blŭ.

¹³ Răng bĕ huĭdah diih lač, ‘Hmei ƀuh leh klei knhâo; Aê Diê dưi mâo klei găl hŏng ñu, amâo djŏ mnuih ôh.’

¹⁴ Y-Yôp amâo tuôm blŭ bi kdơ̆ng hŏng kâo ôh, leh anăn kâo amâo srăng lŏ wĭt lač kơ ñu msĕ si klei diih blŭ ôh.

¹⁵ Diñu êdu ai, diñu amâo lŏ wĭt lač ôh; diñu amâo lŏ mâo klei čiăng lač ôh.

¹⁶ Leh anăn kâo srăng dôk guôn mơ̆, kyuadah diñu amâo blŭ ôh, kyuadah diñu dôk tinăn leh anăn amâo lŏ wĭt lač ôh?

¹⁷ Kâo msĕ mơh srăng lŏ wĭt lač; kâo msĕ mơh srăng bi êdah klei kâo mĭn.

¹⁸ Kyuadah kâo mâo lu klei kâo čiăng blŭ, mngăt kâo mtrŭt kâo.

¹⁹ Nĕ anei, ai tiê kâo jing msĕ si kpiê amâo mâo ƀăng kbiă ôh; msĕ si giêt klĭt mrâo, păt čiăng kblač.

²⁰ Kâo mâo klei mtrŭt čiăng blŭ, snăn kâo dưi mâo klei hdjul; kâo srăng ha blŭ leh anăn lŏ wĭt lač.

²¹ Kâo amâo srăng dôk tĭng kơ sa čô ôh, kăn blŭ klei myâo mă rei.

²² Kyuadah kâo amâo thâo ôh blŭ klei myâo mă, tơdah snăn Pô Hrih kâo brei kâo rai tuč djăl.”