Y-Yôp 28 - Klei Aê Diê Blŭ 2015

Klei Mnuih Duah Klei Knhâo

¹ “Sĭt nik mâo anôk arăng klei lăn duah prăk, leh anăn anôk arăng bi doh mah.

² Arăng klei mă msei, mơ̆ng lăn, leh anăn arăng bi lik boh tâo čiăng mă kông.

³ Mnuih suôt klei mmăt truh hlăm anôk êlam ti gŭ lăn, êjai duah boh tâo hlăm anôk mmăt tĭt.

⁴ Diñu klei ƀăng êlam ti anôk amâo mâo mnuih dôk ôh; phung hiu amâo truh anôk anăn ôh, diñu yuôl diñu pô dai wĭt nao kbưi mơ̆ng mnuih mkăn.

⁵ Mơ̆ng lăn, kbiă mnơ̆ng ƀơ̆ng huă, ƀiădah ti gŭ lăn mâo msĕ si pui dôk čuh bi rai.

⁶ Hlăm boh tâo ñu, mâo boh tâo yuôm saphir, leh anăn hlăm ƀruih lăn ñu mâo hbâo mah.

⁷ Klông anăn čĭm tlang amâo thâo kral ôh, leh anăn ală tlang ŭng amâo tuôm ƀuh êlan anăn ôh.

⁸ Hlô mnơ̆ng prŏng hĭn amâo tuôm juă tinăn ôh; êmông gu kăn tuôm găn tinăn rei.

⁹ Hŏng kngan mnuih ngă kơ boh tâo, bi mbliư̆ čư̆ truh ti tur.

¹⁰ Ñu ƀoh ƀăng hlăm boh tâo, leh anăn ală ñu ƀuh djăp mta mnơ̆ng yuôm.

¹¹ Ñu bư̆ hĕ hnoh êa čiăng đăm digơ̆ đoh, leh anăn ya mnơ̆ng dôk hgăm ñu bi êdah kơ tač.

¹² Ƀiădah ti anôk arăng srăng ƀuh klei knhâo? Leh anăn ti anôk mâo klei thâo săng?

¹³ Mnuih amâo thâo săng klei yuôm klei knhâo, leh anăn arăng amâo ƀuh ôh klei anăn hlăm čar phung hdĭp.

¹⁴ Anôk êlam lač, ‘Ñu amâo dôk hlăm kâo ôh.’ Leh anăn êa ksĭ lač, ‘Ñu amâo dôk mbĭt hŏng kâo ôh.’

¹⁵ Arăng amâo dưi blei klei anăn hŏng mah ôh, kăn arăng dưi mkă ênoh ñu hŏng prăk rei.

¹⁶ Arăng amâo dưi mkă ênoh yuôm ñu hŏng mah mơ̆ng čar Ôphir ôh, kăn dưi rei hŏng boh tâo yuôm ônik amâodah saphir.

¹⁷ Mah leh anăn ală kĭng amâo dưi bi knar hŏng ñu ôh, kăn arăng dưi bi mlih ñu hŏng añŭ ngă hŏng mah doh rei.

¹⁸ Amâo yuôm ôh bi hmô hŏng boh tâo ti gŭ êa ksĭ leh anăn hŏng boh tâo kmlăi; ênoh klei knhâo jing yuôm hĭn kơ lu añŭ yuôm.

¹⁹ Boh tâo tôpas mơ̆ng čar Êthiôpi amâo dưi bi knar hŏng ñu ôh, kăn arăng dưi mkă ênoh yuôm ñu hŏng mah doh rei.

²⁰ Snăn mơ̆ng anôk kbiă kriê klei knhâo? Leh anăn ti anôk klei thâo săng dôk?

²¹ Ñu jing hgăm kơ ală jih jang phung hdĭp, leh anăn arăng mdăp leh kơ čĭm phiơr hlăm êwa.

²² Ƀăng êlam leh anăn Klei Djiê lač, ‘Hmei hmư̆ hing leh arăng bâo kơ ñu.’

²³ Aê Diê thâo êlan truh kơ klei knhâo, leh anăn thâo bĭt anôk ñu dôk.

²⁴ Kyuadah Ñu dlăng truh ti knhal lăn ala, leh anăn ƀuh jih jang mnơ̆ng ti gŭ adiê.

²⁵ Tơdah Ñu brei klei ktang kơ angĭn, leh anăn mkă boh ktrŏ kơ êa;

²⁶ tơdah Ñu mkra leh klei bhiăn kơ êa hjan, leh anăn êlan kơ kmlă grăm;

²⁷ hlăk anăn Aê Diê ƀuh leh anăn bi êdah klei knhâo; Ñu bi kjăp gơ̆ leh anăn ksiêm gơ̆.

²⁸ Leh anăn Ñu lač kơ mnuih, ‘Nĕ anei, klei huĭ mpŭ kơ Yêhôwa jing klei knhâo; leh anăn hngah ngă klei soh jing klei thâo săng.’ ”