Y-Yôp 27 - Klei Aê Diê Blŭ 2015

Y-Yôp Bi Êdah Klei Djŏ kơ Phung Ƀai

¹ Y-Yôp lŏ blŭ leh anăn lač:

² “Kâo kat asei hŏng Aê Diê, Pô hngah leh klei djŏ kơ kâo, leh anăn kat asei mơh hŏng Pô Mâo Jih Klei Myang, Pô brei mngăt kâo jing ênguôt ktrŏ;

³ êjai dŭm boh sui kâo dôk bi êwa, leh anăn êwa Aê Diê dôk hlăm ƀăng adŭng kâo,

⁴ kƀông kâo amâo srăng blŭ klei ƀai ôh, leh anăn êlah kâo amâo srăng blŭ klei mplư ôh.

⁵ Sĭt nik kâo amâo dưi lač kơ diih jing djŏ ôh, hơăi; tơl kâo djiê kâo amâo srăng hngah hĕ ôh klei ênuah ênô kâo.

⁶ Kâo djă păn kjăp klei kpă ênô kâo, leh anăn kâo amâo srăng bi luč ñu ôh; ai tiê kpă kâo amâo ƀuah kâo ôh êjai jih hruê kâo dôk hdĭp.

⁷ Brei pô roh kâo jing msĕ si mnuih ƀai, leh anăn brei pô kgŭ ngă kơ kâo jing msĕ si pô amâo kpă ôh.

⁸ Kyuadah ya jing klei čang hmăng kơ pô amâo đăo ôh tơdah Aê Diê bi luč ñu, leh anăn mă hĕ klei hdĭp ñu?

⁹ Aê Diê srăng hmư̆ klei ñu ur mơ̆ tơdah klei rŭng răng truh kơ ñu?

¹⁰ Ñu srăng mâo klei mơak hlăm Pô Mâo Jih Klei Myang mơ̆? Ñu srăng iêô wah lač kơ Aê Diê jih jang hruê mơ̆?

¹¹ Kâo srăng mtô kơ ih klei myang Aê Diê; ya klei Pô Mâo Jih Klei Myang čiăng ngă, kâo amâo srăng mdăp ôh.

¹² Jih jang diih pô ƀuh leh klei anăn, snăn, si ngă diih ngă hŏng klei mluk?

¹³ Anei klei Aê Diê pioh kơ pô ƀai, leh anăn ngăn dưn phung ktư̆ juă mă tŭ mơ̆ng Pô Mâo Jih Klei Myang:

¹⁴ tơdah anak ñu jing lar êngŭm knŏng pioh kơ đao gưm yơh, leh anăn phung anak čô ñu amâo mâo djăp mnơ̆ng ƀơ̆ng huă ôh.

¹⁵ Phung ñu ăt dôk hdĭp mâo klei ruă tưp srăng bi mdjiê, leh anăn phung mniê djiê ung diñu amâo čŏk hia ôh.

¹⁶ Wăt tơdah ñu mkăm pioh prăk msĕ si bruih lăn, leh anăn mkăm pioh čhiăm ao msĕ si lŭ;

¹⁷ ñu dưi mkăm pioh gơ̆, ƀiădah pô kpă ênô srăng čŭt hơô dŏ anăn, leh anăn phung ênuah ênô srăng bi mbha mă prăk anăn.

¹⁸ Sang ñu mdơ̆ng leh jing msĕ si kwang eh wăk wai, msĕ si pưk sa čô kahan gak ngă leh.

¹⁹ Ñu nao đih pĭt, mdrŏng, ƀiădah amâo srăng lŏ mâo msĕ snăn ôh; tơdah ñu mblang ală, klei mdrŏng ñu luč jih.

²⁰ Klei bi huĭ truh kơ ñu msĕ si êa lip; êjai mlam mâo angĭn đrŭng kpuh mđuĕ hĕ ñu.

²¹ Angĭn mơ̆ng ngŏ kpuh mđung ñu leh anăn ñu luč yơh; angĭn thut hĕ ñu mơ̆ng anôk ñu dôk.

²² Angĭn thut ñu amâo pap ôh; ñu đuĕ mơ̆ng klei ktang angĭn hŏng klei prăl.

²³ Arăng srăng pah kngan kyua bruă ñu, leh anăn ur suôt ñu mơ̆ng anôk ñu dôk.”