Y-Yôp 24 - Klei Aê Diê Blŭ 2015

Y-Yôp Blŭ Dŭñ Dŭñ kơ Klei Aê Diê Amâo Uêñ kơ Arăng Ngă Ƀai

¹ “Si ngă Pô Mâo Jih Klei Myang amâo bi kčah ôh hruê phat kđi, leh anăn si ngă phung thâo kral Ñu amâo ƀuh ôh hruê anăn truh?

² Phung jhat ƀai bi mlih mnơ̆ng bi knăl knông lăn; diñu plah mă biăp êmô leh anăn mnơ̆ng digơ̆ rông.

³ Diñu mă mđuĕ aseh dliê phung anak êrĭt, diñu mă êmô mniê djiê ung jing mnơ̆ng mgơ̆ng.

⁴ Diñu suôt phung hiu dan mơ̆ng êlan; leh anăn mgô̆ jih jang phung ƀun ƀin đuĕ dăp.

⁵ Nĕ anei, phung ƀun ƀin nao kơ bruă suăi diñu msĕ si aseh dliê, duah mnơ̆ng ƀơ̆ng kơ phung anak diñu hlăm kdrăn tač.

⁶ Diñu wiă kơ diñu pô adrăng hlăm hma, leh anăn duñ boh kriăk ƀâo ăt dôk mơ̆ng đang kriăk ƀâo pô ƀai.

⁷ Jih mlam diñu đih asei lưng, amâo mâo čhiăm ao ôh, leh anăn amâo mâo abăn msăm ôh êjai êăt.

⁸ Diñu msah hŏng hjan ti čư̆, leh anăn dôk giăm hŏng boh tâo kyuadah kƀah anôk kđap.

⁹ Mâo phung jhat ƀai mmiă mă anak êrĭt ama êjai gơ̆ dôk mam, leh anăn mă anak phung ƀun ƀin jing mnơ̆ng mgơ̆ng.

¹⁰ Diñu mgô̆ digơ̆ hiu tinei tinăn asei lưng, amâo mâo čhiăm ao ôh; diñu djă ba čăp mdiê tian êpa.

¹¹ Digơ̆ djiêt êa boh ti war boh ôliwơ phung ƀai; digơ̆ juă thŭng êa boh kriăk ƀâo, ƀiădah digơ̆ ăt mhao.

¹² Mơ̆ng krah ƀuôn, phung giăm djiê dôk krao, leh anăn mngăt pô êka leh ur čiăng mâo klei đru; ƀiădah Aê Diê amâo uêñ ôh kơ klei diñu wah lač.

¹³ Mâo phung bi kdơ̆ng hŏng klei mngač, phung amâo thâo kral êlan klei mngač, leh anăn kăn êbat hlăm klông klei mngač rei.

¹⁴ Pô bi mdjiê mnuih kgŭ êjai mmăt, čiăng kơ ñu dưi bi mdjiê pô ƀun ƀin leh anăn kƀah mnơ̆ng; leh anăn êjai mlam ñu hiu tlĕ.

¹⁵ Pô knhông msĕ mơh dôk guôn tơl mmăt, leh anăn lač, ‘Amâo mâo pô srăng ƀuh kâo ôh’; leh anăn guôm hĕ ƀô̆ mta ñu tơl arăng amâo dưi thâo kral ñu ôh.

¹⁶ Êjai mmăt diñu ƀoh mtih mŭt hlăm sang; êjai hruê diñu đuĕ dăp; diñu amâo čiăng kơ klei mngač ôh.

¹⁷ Kyuadah mmăt tĭt jing aguah kơ jih jang diñu, kyuadah diñu jing mah jiăng hŏng klei bi huĭ êjai mmăt kpal.

¹⁸ Diñu jing msĕ mnơ̆ng hdjul ti dlông êlah êa êtăng; dŏ dô diñu jing mnơ̆ng arăng tăm pah leh ti lăn; amâo mâo pô lŏ tuôm nao ôh kơ đang boh kriăk ƀâo.

¹⁹ Msĕ si adiê không leh anăn mđiă hlơr bi khuôt hĕ êa mơ̆ng pliêr; msĕ snăn mơh Ƀuôn Phung Djiê ngă leh kơ phung soh.

²⁰ Amĭ wơr bĭt diñu, hluăt ƀơ̆ng tơl arăng amâo lŏ hdơr kơ diñu ôh, msĕ snăn klei ƀai joh msĕ si sa ƀĕ ana kyâo.

²¹ Diñu plah mă dŏ dô mniê plao, leh anăn amâo ngă klei jăk ôh kơ mniê djiê ung.

²² Ƀiădah hŏng klei myang Ñu Aê Diê bi rai phung ktang; Aê Diê yơr kngan, diñu amâo lŏ čang hmăng dưi hdĭp ôh.

²³ Aê Diê brei kơ diñu klei hơĭt, leh anăn krơ̆ng diñu, ƀiădah ală Aê Diê kăp dlăng kơ êlan diñu.

²⁴ Diñu mâo klei mđĭ êjai bhiâo, leh anăn diñu luč čhuč čhuê, diñu êbuh leh anăn djiê msĕ si jih mnuih; arăng wiă diñu msĕ si amung mdiê.

²⁵ Tơdah amâo djŏ snăn ôh, hlei srăng bi sĭt kâo jing sa čô luar, leh anăn bi êdah klei kâo lač jing hơăi mang?”