Y-Yôp 23 - Klei Aê Diê Blŭ 2015

Y-Yôp Čiăng Mgang Klei Ñu ti Anăp Aê Diê

¹ Y-Yôp lŏ wĭt lač:

² “Wăt hruê anei klei kâo kwưh jing phĭ hĭn, kngan Ñu jing ktrŏ ti kâo wăt tơdah kâo krao dưn.

³ Ơ, čiăng snăk kơ kâo dưi thâo anôk bi tuôm hŏng Ñu, čiăng kơ kâo dưi truh kơ jhưng mtao Ñu!

⁴ Snăn kâo dưi bi êdah klei kâo ti anăp Ñu leh anăn blŭ bi mgăl tơl jih.

⁵ Kâo dưi hriăm klei Ñu lŏ wĭt lač, leh anăn thâo săng klei Ñu blŭ kơ kâo.

⁶ Ñu srăng bi tăng hŏng kâo hŏng jih klei myang prŏng Ñu mơ̆? Hơăi, Ñu srăng dôk hmư̆ kâo.

⁷ Tinăn sa čô mnuih kpă dưi blŭ bi mgăl hŏng Ñu, leh anăn khua phat kđi kâo srăng yap kâo găl nanao.

⁸ Nĕ anei, kâo nao phă anăp, Ñu amâo dôk tinăn ôh; leh anăn kâo kdŭn ti tluôn, kăn ƀuh Ñu rei.

⁹ Kâo duah Ñu tĭng điâo, kâo amâo dưi ƀuh Ñu ôh, kâo wir tĭng hnuă, kăn dưi ƀuh Ñu rei.

¹⁰ Ƀiădah Ñu thâo êlan kâo êbat; tơdah leh Ñu lông dlăng kâo, kâo srăng jing doh msĕ si mah.

¹¹ Jơ̆ng kâo tui hlue sĭt suôr kru Ñu, kâo ăt êbat tui hlue êlan Ñu, amâo mâo weh ôh.

¹² Kâo amâo tuôm klah đuĕ mơ̆ng klei ƀăng kƀông Ñu mtă leh ôh; kâo pioh hlăm ai tiê kâo klei ƀăng êgei Ñu blŭ yuôm hĭn kơ mnơ̆ng kâo ƀơ̆ng huă.

¹³ Ƀiădah Ñu amâo thâo bi mlih ôh, leh anăn hlei dưi bi weh Ñu mơ̆ng klei Ñu čiăng? Ya klei Ñu čiăng, Ñu ngă yơh.

¹⁴ Kyuadah Ñu srăng ngă bi ênŭm ya klei Ñu čuăn leh kơ kâo; Ñu mâo lu klei msĕ snăn hlăm klei mĭn Ñu.

¹⁵ Kyua anăn kâo mâo klei huĭ snăk dôk ti anăp Ñu; êjai kâo dôk mĭn kơ klei anăn, kâo huĭ kơ Ñu.

¹⁶ Aê Diê brei ai tiê kâo jing hwăt leh; Pô Mâo Jih Klei Myang bi huĭ kâo leh.

¹⁷ Wăt tơdah êjai mlam, amâodah klei mmăt tĭt guôm hĕ ƀô̆ mta kâo dưn, kâo amâo dưi dôk ñăt ôh.”