Y-Yôp 16 - Klei Aê Diê Blŭ 2015

Y-Yôp Blŭ Dŭñ Dŭñ kơ Klei Aê Diê Ngă kơ Ñu

¹ Y-Yôp lŏ wĭt lač:

² “Kâo hmư̆ leh lu klei msĕ snăn; jih klei diih bi juh jing hơăi mang, amâo yuôm ôh.

³ Klei blŭ msĕ si angĭn hjan srăng tuč ruê̆ mơ̆? Amâodah ya mtrŭt diih brei blŭ msĕ snăn?

⁴ tơdah kâo jing diih, kâo msĕ mơh, dưi blŭ msĕ si diih, Kâo dưi blŭ lu klei bi kdơ̆ng hŏng diih, leh anăn kteh kŏ mưč kơ diih.

⁵ Kâo dưi bi ktang diih hŏng klei kâo blŭ, leh anăn hŏng klei kâo blŭ bi juh srăng bi hrŏ klei ruă diih.

⁶ Tơdah kâo blŭ, klei ruă kâo amâo hrŏ ôh, leh anăn tơdah kâo dôk ñăt, klei ruă amâo đuĕ mơ̆ng kâo ôh.

⁷ Sĭt nik ară anei Aê Diê bi êmăn kâo leh, Ñu bi rai leh jih gŏ sang kâo.

⁸ Ñu bi kdjuôt kdjiu klĭt kâo leh, klei anăn jing klei hưn bi kdơ̆ng hŏng kâo; klei êwang kâo hưn bi kdơ̆ng hŏng kâo mơh.

⁹ Êjai Ñu ngêñ, Ñu hiêk kâo leh anăn duah ngă kơ kâo, Ñu kriêt êgei Ñu kơ kâo; pô roh hŏng kâo dlăng kơ kâo hŏng ală trơ̆ng.

¹⁰ Phung mnuih ha ƀăng êgei diñu čiăng kĕ ƀơ̆ng kâo, hŏng klei mgao diñu pah miêng kâo, diñu bi kƀĭn mguôp čiăng ngă kơ kâo.

¹¹ Aê Diê jao kâo kơ phung amâo đăo ôh, leh anăn hwiê hĕ kâo hlăm kngan phung ƀai.

¹² Kâo dôk leh êđăp ênang, ƀiădah Ñu kjoh hĕ kâo; Ñu djă ti kkuê kâo leh anăn bi mčah kâo đơ điêt. Ñu mdơ̆ng kâo msĕ si knham Ñu,

¹³ phung kahan Ñu djă hna wang jŭm kâo. Hŏng klei amâo pap ôh, Ñu mbliah tiê kơiêng kâo; Ñu bi hŏk hĕ êa phĭ kâo ti lăn.

¹⁴ Ñu tlŏ kâo bi hluh lu anôk, Ñu ksŭng ngă kơ kâo msĕ si sa čô bi blah.

¹⁵ Kâo jhĭt klŭng guôm asei mlei kâo, leh anăn kâo bi klŭng boh kŏ kâo hlăm bruih lăn.

¹⁶ Ƀô̆ mta kâo jing hrah kyua kâo hia, leh anăn êyui klei djiê guôm ală kâo;

¹⁷ ƀiădah kngan kâo amâo ngă klei ƀai ôh, leh anăn klei kâo wah lač jing êngeh.

¹⁸ Ơ lăn, đăm guôm hĕ ôh êrah kâo, leh anăn brei kâo ur hŏng klei êngiê amâo mâo klei kơ̆ng ôh.

¹⁹ Dlăng bĕ, wăt ară anei Pô hưn bi sĭt kơ kâo dôk hlăm adiê, leh anăn Pô mgang kđi kâo dôk ti dlông.

²⁰ Phung mah jiăng kâo mưč kơ kâo, kâo hia ƀlĕ êa ală kơ Aê Diê,

²¹ čiăng kơ Ñu mgang klei djŏ sa čô mnuih hŏng Aê Diê, msĕ si sa čô mnuih hŏng pô riêng gah ñu.

²² Kyuadah adôk ƀiă thŭn srăng truh, kâo srăng nao kơ anôk kâo amâo srăng lŏ wĭt ôh.”