Y-Yôp 15 - Klei Aê Diê Blŭ 2015

Y-Êlipas Ƀuah Y-Yôp

¹ Y-Êlipas mnuih ƀuôn Têman lŏ wĭt lač:

² “Djŏ mơ̆ sa čô êkei knhâo lŏ wĭt lač hŏng klei amâo thâo săng, leh anăn bi bŏ tian ñu pô hŏng angĭn hlơr mơ̆ng ngŏ?

³ Djŏ mơ̆ ñu bi mgăl hŏng klei blŭ amâo yuôm ôh, amâodah hŏng boh blŭ amâo dưi bi truh klei jăk ôh?

⁴ Ƀiădah ih bi luč klei huĭ mpŭ kơ Aê Diê, leh anăn bi gun klei dôk bi mĭn wah lač kơ Aê Diê,

⁵ kyuadah klei wê ih mtrŭt ih blŭ, leh anăn ih ruah klei blŭ mơ̆ng pô mnêč.

⁶ Ƀăng êgei ih pô phat kđi ih, amâo djŏ kâo ôh; ƀăng kƀông ih pô hưn klei bi kdơ̆ng hŏng ih.

⁷ Ih jing mnuih arăng kkiêng tal êlâo mơ̆? Amâodah arăng kkiêng kơ ih êlâo kơ phung čư̆ mơ̆?

⁸ Ih tuôm hmư̆ leh mơ̆ klei Aê Diê čiăng hgăm? Leh anăn ih yap knŏng ih pô hĕ mâo klei knhâo?

⁹ Ya klei ih thâo, hmei amâo thâo ôh? Ya klei ih thâo săng amâo jing mngač ôh kơ hmei?

¹⁰ Mâo phung čăt ƀŭk kô̆ wăt phung mduôn dôk tĭng kơ hmei, phung mduôn hĭn kơ ama ih.

¹¹ Si ngă klei Aê Diê bi juh jing điêt đei, amâodah klei arăng blŭ êmhač jing êdu đei mơ̆ kơ ih?

¹² Si ngă ai tiê ih mâo klei ngêñ, leh anăn si ngă ală ih dlăng trơ̆ng msĕ snăn,

¹³ tơl ih brei klei mĭn ih bi kdơ̆ng hŏng Aê Diê, leh anăn ha blŭ msĕ snăn klei êbeh ti ai?

¹⁴ Ya mnuih jing tơl ñu dưi jing êngeh? Amâodah pô kkiêng leh mơ̆ng mniê tơl ñu dưi jing kpă?

¹⁵ Nĕ anei, Aê Diê amâo knang ôh kơ phung doh jăk Ñu, leh anăn phung adiê amâo jing doh ti anăp ală Ñu ôh,

¹⁶ ƀai hĭn yơh kơ sa čô jing pô arăng bi êmut leh anăn soh jhat, sa čô khăp kơ klei soh msĕ si mnăm êa!

¹⁷ Hmư̆ bĕ, kâo srăng bi êdah kơ ih, leh anăn ya klei kâo ƀuh leh, kâo srăng hưn

¹⁸ klei phung knhâo yăl dliê leh, leh anăn klei phung aê diñu amâo mdăp ôh,

¹⁹ knŏng kơ phung anăn arăng brei leh čar, leh anăn amâo mâo pô tue nao dôk mbĭt hŏng diñu ôh.

²⁰ Mnuih soh kpư̆ asei mlei ñu hŏng klei ruă jih hruê ñu dôk hdĭp, mâo thŭn bi kčah leh kơ phung jhat ƀai.

²¹ Ñu hmư̆ ênai bi huĭ; êjai mâo klei êđăp ênang pô bi rai srăng truh kơ ñu.

²² Ñu amâo čang hmăng ôh kơ ñu srăng tlaih mơ̆ng klei mmăt leh anăn arăng čuăn leh ñu kơ klei djiê hŏng đao gưm.

²³ Ñu hiu rưng tinei tinăn čiăng duah mnơ̆ng ƀơ̆ng huă, leh anăn lač, ‘Ti anôk gơ̆?’ Ñu thâo kơ hruê mâo klei mmăt giăm truh leh;

²⁴ klei rŭng răng leh anăn klei ênguôt hnĭng bi huĭ ñu; klei anăn dưi hŏng ñu msĕ si sa čô mtao mkra leh kơ klei bi blah.

²⁵ Kyuadah ñu yơr leh kngan ñu bi kdơ̆ng hŏng Aê Diê, leh anăn duah klei čiăng ngă kơ Pô Mâo Jih Klei Myang,

²⁶ leh anăn êran mnuh Aê Diê hŏng khil prŏng leh anăn kpal;

²⁷ ñu mâo ƀô̆ mta êmŏng, leh anăn kơiêng ñu prŏng mơh,

²⁸ ñu dôk leh hlăm ƀuôn ênguôl, hlăm sang sa čô mnuih amâo dôk ôh, arăng čuăn leh jing kăm boh tâo mnơ̆ng rai leh.

²⁹ Ñu amâo srăng jing mdrŏng ôh, leh anăn ngăn drăp ñu amâo srăng dôk nanao ôh, kăn srăng lar tar lăn ala rei;

³⁰ ñu amâo srăng tlaih ôh mơ̆ng klei mmăt, êlah pui trơ̆ng srăng bi krô kƀiêng ñu, êwa mơ̆ng êgei Aê Diê srăng kpuh mđung hĕ mnga ñu.

³¹ Đăm brei ñu knang kơ klei hơăi mang ñu pô, klei anăn jing klei mplư; kyuadah klei hơăi mang srăng jing klei mưn kơ ñu.

³² Arăng srăng mưn ñu jih ênŭm êlâo truh hruê ñu, leh anăn adhan ñu amâo srăng jing mtah ôh.

³³ Ñu srăng jing msĕ si phŭn boh kriăk ƀâo luh hĕ boh ka ksă, leh anăn jing msĕ si ana boh ôliwơ luh hĕ mnga.

³⁴ Kyuadah phung mnuih ƀai srăng jing plao, leh anăn pui srăng ƀơ̆ng hĕ sang čhiăm phung mă tŭ ngăn sun.

³⁵ Diñu mtian klei jhat leh anăn kkiêng klei ƀai, leh anăn ai tiê diñu mkra klei mplư.”