Y-Yôp 12 - Klei Aê Diê Blŭ 2015

Klei Y-Yôp Lŏ Wĭt Lač

¹ Y-Yôp lŏ wĭt lač:

² “Djŏ leh diih jing mnuih sĭt, leh anăn klei thâo mĭn srăng djiê mbĭt hŏng diih.

³ Bi kâo, kâo mâo klei thâo săng msĕ si diih mơh; klei thâo mĭn kâo kăn jing ti gŭ hĭn kơ diih rei. Hlei pô amâo thâo săng klei msĕ snăn?

⁴ Kâo jing mnuih mah jiăng kâo djă djik djak; kâo pô tuôm wah lač kơ Aê Diê, leh anăn Ñu lŏ wĭt lač kơ kâo leh, kâo jing sa čô kpă leh anăn amâo mâo klei arăng dưi ƀuah ôh, ƀiădah jing hĕ sa čô mnuih arăng djă djik djak.

⁵ Sa čô dôk êđăp ênang mâo klei mĭn bi êmut kơ klei knap mñai; klei knap mñai dơ̆ng truh kơ pô ksak jơ̆ng.

⁶ Sang čhiăm phung knĕ dôk êđăp ênang, leh anăn phung bi riêl ai Aê Diê dôk hơĭt, hlăm kngan diñu Aê Diê brei dŏ dô lu êbeh.

⁷ Ƀiădah êmuh bĕ kơ hlô mnơ̆ng, digơ̆ srăng bi hriăm diih; êmuh bĕ kơ čĭm hlăm adiê digơ̆ srăng hưn kơ diih mơh;

⁸ amâodah êmuh bĕ kơ kyâo mtâo ti lăn ala, leh anăn digơ̆ srăng mtô kơ diih; wăt kan hlăm êa ksĭ srăng hưn kơ diih mơh.

⁹ Dŭm hlăm jih mnơ̆ng anăn amâo thâo ôh kơ kngan Aê Diê yơh ngă leh jih klei anăn?

¹⁰ Kngan Aê Diê yơh djă klei hdĭp jih jang mnơ̆ng wăt klei bi êwa jih jang mnuih.

¹¹ Amâo djŏ hĕ knga ksiêm hmư̆ boh blŭ msĕ si ƀăng êgei djiêl mnơ̆ng ƀơ̆ng huă?

¹² Phung mduôn mâo klei knhâo, leh anăn phung dôk hdĭp sui mâo klei thâo săng.

¹³ Klei knhâo leh anăn klei ktang jing dŏ Aê Diê; klei thâo bi kčĕ leh anăn klei thâo săng jing dŏ Ñu mơh.

¹⁴ Tơdah Ñu bi rai, amâo mâo pô dưi lŏ mdơ̆ng ôh; tơdah Ñu krư̆ sa čô mnuih, amâo mâo pô dưi pŏk ôh.

¹⁵ Tơdah Ñu kơ̆ng hĕ êa, digơ̆ khuôt; tơdah Ñu brei digơ̆ đoh, digơ̆ lip čar.

¹⁶ Klei ktang leh anăn klei knhâo dôk mbĭt hŏng Ñu; pô arăng mplư leh anăn pô mplư jing dŏ Ñu.

¹⁷ Ñu brei phung kčĕ ngă jing mluk, leh anăn brei phung khua phat kđi jing hĕ khŏ.

¹⁸ Ñu bi tloh săng đai phung mtao, leh anăn hyuă ti kơiêng digơ̆ čhiăm ao jing dĭng buăl.

¹⁹ Ñu brei phung khua ngă yang jing mnă, leh anăn mdlưh hĕ phung ktang.

²⁰ Ñu bi kmlô phung kčĕ arăng knang leh, leh anăn Ñu mă mđuĕ hĕ klei thâo mĭn phung khua mduôn.

²¹ Ñu brei arăng mưč kơ phung khua prŏng, leh anăn kleh hdrăng kơiêng phung ktang.

²² Ñu bi êdah ya klei arăng mdăp leh hlăm klei mmăt, leh anăn brei êyui klei djiê jing klei mngač.

²³ Ñu brei phung găp djuê hriê kơ prŏng, leh anăn Ñu bi rai hĕ digơ̆; Ñu bi lar lăn čar digơ̆, leh anăn lŏ bi hriă hĕ digơ̆;

²⁴ Ñu mă hĕ klei thâo săng mơ̆ng phung khua ƀuôn sang ti lăn ala, Leh anăn brei digơ̆ hiu rưng hlăm kdrăn tač amâo mâo êlan ôh.

²⁵ Digơ̆ duah êwư hlăm klei mmăt amâo mâo klei mngač; leh anăn brei digơ̆ êbat ting ring rang msĕ si sa čô kpiê ruă.”