Y-Yôna 2 - Klei Aê Diê Blŭ 2015

Klei Y-Yôna Wah Lač

¹ Leh anăn Y-Yôna wah lač kơ Yêhôwa Aê Diê ñu mơ̆ng tian kan,

² lač: “Kâo iêô kơ Yêhôwa hlăm klei knap mñai kâo, leh anăn Ñu lŏ wĭt lač leh kơ kâo. Mơ̆ng tian Ƀuôn Phung Djiê kâo ur, leh anăn Ih hmư̆ leh asăp kâo.

³ Kyuadah Ih hwiê kâo leh hlăm anôk êlam, ti krah êa ksĭ, leh anăn êa guôm jŭm dar kâo. Jih jang êlah êa leh anăn êa poh yă Ih găn leh ti dlông kâo.

⁴ Hlăk anăn kâo lač, ‘Arăng hwiê kâo leh mơ̆ng anăp Ih; ƀiădah ăt kâo srăng lŏ dlăng kơ sang yang doh jăk Ih.’

⁵ Êa hriê guôm păt čiăng bi mdjiê kâo, anôk êlam dôk jŭm dar kâo; kŭl păn boh kŏ kâo.

⁶ Kâo trŭn leh kơ tur čư̆, giê kal lăn kđăl ti dlông kâo hlŏng lar. Ƀiădah Ih kdjŏng mă leh klei hdĭp kâo mơ̆ng Ƀăng Êlam, Ơ Yêhôwa Aê Diê kâo.

⁷ Tơdah mngăt kâo hwăt leh hlăm lam kâo, kâo hdơr kơ Yêhôwa; leh anăn klei kâo wah lač truh leh kơ Ih hlăm sang yang doh jăk Ih.

⁸ Phung mpŭ kơ rup yang amâo yuôm hngah klei sĭt suôr.

⁹ Ƀiădah kâo srăng bi mni kơ Ih, kâo srăng myơr mnơ̆ng ngă yang kơ Ih; ya klei kâo ƀuăn leh kâo srăng bi sĭt. Klei bi mtlaih kbiă hriê mơ̆ng Yêhôwa!”

¹⁰ Snăn Yêhôwa mtă kơ kan leh anăn gơ̆ ô̆ hĕ Y-Yôna ti lăn thu.