Y-Yôhan 10 - Klei Aê Diê Blŭ 2015

Klei Bi Hriêng kơ War Biăp

¹ “Kâo lač kơ diih klei sĭt nik, hlei pô amâo mŭt ôh ti ƀăng bhă war biăp, ƀiădah đĭ mŭt ti êlan mkăn, mnuih anăn jing sa čô knĕ leh anăn mnuih tlĕ mmiă.

² Ƀiădah pô mŭt ti ƀăng bhă war biăp, ñu yơh jing mgăt biăp.

³ Pô kiă ƀăng bhă srăng pŏk ƀăng bhă kơ ñu. Phung biăp hmư̆ asăp ñu, leh anăn ñu iêô phung biăp ñu pô hŏng anăn digơ̆, leh anăn atăt digơ̆ kbiă kơ tač.

⁴ Tơdah leh ñu atăt jih jang biăp ñu kbiă ti tač, ñu êbat ti anăp digơ̆, leh anăn phung biăp tui hlue ñu, kyuadah digơ̆ thâo kral asăp ñu.

⁵ Digơ̆ amâo srăng tui hlue sa čô tue ôh, ƀiădah digơ̆ srăng đuĕ kơ pô anăn, kyuadah digơ̆ amâo thâo kral asăp phung tue ôh.”

⁶ Yêsu blŭ klei bi hriêng anei kơ diñu, ƀiădah diñu amâo thâo săng ôh klei Yêsu lač kơ diñu.

Yêsu Jing Mgăt Biăp Jăk

⁷ Yêsu lŏ lač kơ diñu, “Kâo lač kơ diih klei sĭt nik, Kâo jing ƀăng bhă kơ phung biăp.

⁸ Jih jang hriê êlâo ti Kâo jing mnuih knĕ leh anăn mnuih tlĕ mmiă; ƀiădah phung biăp amâo tuôm dôk hmư̆ diñu ôh.

⁹ Kâo jing ƀăng bhă. Tơdah hlei pô mŭt ti Kâo, ñu srăng tlaih, srăng mŭt leh anăn kbiă, leh anăn ƀuh rơ̆k ƀơ̆ng.

¹⁰ Mnuih knĕ hriê knŏng čiăng tlĕ, bi mdjiê, leh anăn bi rai. Kâo hriê leh čiăng kơ phung biăp dưi mâo klei hdĭp, leh anăn mâo klei hdĭp êbeh dlai.

¹¹ Kâo jing mgăt biăp jăk. Mgăt biăp jăk jao klei hdĭp ñu pô kyua phung biăp.

¹² Hlei pô jing mgăt arăng mưn amâo djŏ mgăt biăp ôh, kăn jing pô biăp rei, ƀuh asâo tan hriê, lui hĕ phung biăp leh anăn đuĕ mtam. Asâo tan mă phung biăp leh anăn prŭng digơ̆.

¹³ Ñu đuĕ kyuadah ñu jing mgăt arăng mưn, leh anăn amâo uêñ kơ phung biăp ôh.

¹⁴ Kâo jing mgăt biăp jăk. Kâo thâo kral phung biăp Kâo, leh anăn phung biăp Kâo thâo kral Kâo,

¹⁵ msĕ si Ama thâo kral Kâo, leh anăn Kâo thâo kral Ama; leh anăn Kâo jao klei hdĭp Kâo pô kyua phung biăp.

¹⁶ Leh anăn Kâo lŏ mâo phung biăp mkăn amâo dôk hlăm war anei ôh. Kâo srăng atăt ba wĭt phung anăn msĕ mơh, leh anăn digơ̆ srăng hmư̆ asăp Kâo. Snăn srăng mâo sa phung biăp leh anăn sa čô mgăt.

¹⁷ Ama khăp kơ Kâo, kyuadah Kâo jao klei hdĭp Kâo pô, čiăng kơ Kâo dưi lŏ mă gơ̆.

¹⁸ Amâo mâo pô ƀlêč mă klei hdĭp Kâo mơ̆ng Kâo ôh, ƀiădah Kâo jao gơ̆ tui si Kâo pô čiăng. Kâo mâo klei dưi jao gơ̆, leh anăn Kâo mâo klei dưi lŏ mă gơ̆. Klei mtă anăn Kâo mă tŭ leh mơ̆ng Ama Kâo.”

¹⁹ Kyua klei blŭ anăn lŏ mâo klei bi kah mbha hdơ̆ng phung Yuđa.

²⁰ Lu hlăm phung Yuđa lač, “Ñu mâo yang jhat yơh. Ñu khŏ leh. Ya čiăng dôk hmư̆ ñu lĕ?”

²¹ Phung mkăn lač, “Klei blŭ anăn amâo djŏ ôh mơ̆ng sa čô mâo yang jhat. Yang jhat dưi mơ̆ bi mblang ală mnuih bum ală?”

Phung Yuđa Hngah Amâo Đăo Ôh kơ Yêsu

²² Ti ƀuôn Yêrusalem mâo Hruê Knăm Bi Leh Sang Yang. Hlăk anăn jing yan puih,

²³ leh anăn Yêsu êbat hlăm Sang Kkuh Mpŭ ti Adring Salômôn.

²⁴ Phung Yuđa bi kƀĭn jŭm Ñu leh anăn lač kơ Ñu, “Dŭm boh sui Ih srăng brei hmei dôk guôn? Tơdah Ih jing Yang Krist, hưn bĕ kơ hmei bi klă.”

²⁵ Yêsu lŏ wĭt lač kơ phung anăn, “Kâo lač leh kơ diih, ƀiădah diih amâo đăo ôh. Bruă Kâo mă hlăm anăn Ama Kâo, bruă anăn hưn bi sĭt kơ Kâo.

²⁶ Ƀiădah diih amâo đăo kyuadah diih amâo jing phung biăp Kâo ôh.

²⁷ Phung biăp Kâo hmư̆ asăp Kâo, Kâo thâo kral digơ̆, leh anăn digơ̆ tui hlue Kâo.

²⁸ Leh anăn Kâo brei kơ digơ̆ klei hdĭp hlŏng lar, leh anăn digơ̆ amâo srăng rai luč ôh, leh anăn amâo mâo pô srăng kdhăk mă digơ̆ mơ̆ng kngan Kâo ôh.

²⁹ Ama Kâo, Pô brei leh digơ̆ kơ Kâo, jing prŏng hĭn kơ jih jang, leh anăn amâo mâo pô dưi kdhăk mă digơ̆ mơ̆ng kngan Ama Kâo ôh.

³⁰ Kâo hŏng Ama jing sa.”

³¹ Phung Yuđa lŏ mă boh tâo čiăng bhĭr bi mdjiê Yêsu.

³² Yêsu lŏ wĭt lač kơ diñu, “Kâo bi êdah leh kơ diih lu bruă jăk mơ̆ng Ama. Kơ ya mta bruă anăn diih čiăng bhĭr boh tâo kơ Kâo?”

³³ Phung Yuđa lŏ wĭt lač kơ Yêsu, “Amâo djŏ kyua bruă jăk ôh hmei bhĭr ih hŏng boh tâo, ƀiădah kyua klei ih blŭ mgao hŏng Aê Diê. Kyuadah ih, sa čô mnuih, mjing ih pô Aê Diê.”

³⁴ Yêsu lŏ wĭt lač kơ diñu, “Amâo djŏ hĕ arăng čih leh hlăm klei bhiăn diih, ‘Kâo lač diih jing phung yang’?

³⁵ Tơdah ñu pia phung yang kơ phung mă tŭ Klei Aê Diê Blŭ, (leh anăn klei čih leh amâo dưi bi mlih ôh),

³⁶ diih lač mơ̆ kơ Pô Ama pioh brei leh anăn tiŏ hriê leh kơ lăn ala, ‘Ih blŭ mgao hŏng Aê Diê,’ kyuadah Kâo lač, ‘Kâo jing Anak Aê Diê’?

³⁷ Tơdah Kâo amâo ngă ôh bruă Ama Kâo, snăn đăm đăo kơ Kâo ôh.

³⁸ Ƀiădah tơdah Kâo ngă bruă anăn, wăt tơdah diih amâo đăo kơ Kâo dưn, đăo bĕ kơ bruă anăn, čiăng kơ diih dưi thâo săng kơ Ama dôk hlăm Kâo, leh anăn Kâo dôk hlăm Ama.”

³⁹ Diñu lŏ čiăng mă čăp Yêsu, ƀiădah Yêsu đuĕ mơ̆ng kngan diñu.

⁴⁰ Yêsu lŏ đuĕ nao găn kơ hang nah dih êa krông Yurdan ti anôk Y-Yôhan ngă ƀaptem mphŭn dô, leh anăn Ñu dôk tinăn.

⁴¹ Leh anăn lu mnuih nao kơ Yêsu, leh anăn digơ̆ lač, “Y-Yôhan amâo tuôm ngă sa klei bi knăl yuôm bhăn ôh, ƀiădah jih jang klei Y-Yôhan hưn kơ mnuih anei jing sĭt.”

⁴² Leh anăn lu mnuih đăo kơ Ñu tinăn.