Y-Yêrêmi 45 - Klei Aê Diê Blŭ 2015

Klei Blŭ Bi Juh Y-Baruk

¹ Snei klei khua pô hưn êlâo Y-Yêrêmi blŭ kơ Y-Baruk anak êkei Y-Nêria êjai ñu čih klei blŭ anei hlăm sa pŏk hdruôm hră tui si Y-Yêrêmi kăp lač brei, hlăm thŭn tal pă Y-Jêhôyakim anak êkei Y-Jôsia mtao Yuđa:

² “Snei Yêhôwa Aê Diê Israel lač kơ ih, Ơ Y-Baruk:

³ Ih lač leh, ‘Knap mñai yơh kơ kâo! kyuadah Yêhôwa thiăm leh klei ênguôt kơ klei ruă kâo; kâo êmăn hŏng klei krao ênguôt, leh anăn amâo mâo klei mdei ôh.’ ”

⁴ Yêhôwa lač, “Snei brei ih lač kơ ñu, ‘Nĕ anei, ya Kâo mdơ̆ng leh Kâo bi klưh hĕ gơ̆, leh anăn ya dŏ Kâo pla leh Kâo buč hĕ gơ̆ hlăm jih čar.

⁵ Bi ih, ih tuôm duah klei prŏng kơ ih pô mơ̆? Đăm duah klei anăn ôh; kyuadah nĕ anei, Kâo dôk bi truh klei jhat kơ jih jang mnuih, Yêhôwa lač, ƀiădah Kâo srăng pioh ih hdĭp hlăm jih anôk ih nao.’ ”