Y-Yêrêmi 13 - Klei Aê Diê Blŭ 2015

Klei Bi Hmô kơ Čhiăm Hyuă Kơiêng Brŭ

¹ Snei Yêhôwa lač kơ kâo, “Nao blei bĕ sa blah čhiăm kbuă hyuă kơiêng hyuă ti kơiêng ih, leh anăn đăm đrŭt gơ̆ hlăm êa ôh.”

² Snăn kâo blei čhiăm hyuă kơiêng tui si Yêhôwa mtă, leh anăn kâo hyuă gơ̆.

³ Yêhôwa lŏ blŭ kơ kâo tal dua,

⁴ “Ba čhiăm hyuă kơiêng ih blei leh anăn hyuă leh, leh anăn kgŭ nao bĕ kơ êa krông Ơprat, leh anăn mdăp hĕ gơ̆ hlăm anôk ƀăng boh tâo kđang.”

⁵ Snăn kâo nao leh anăn mdăp gơ̆ giăm êa krông Ơprat tui si Yêhôwa mtă leh kơ kâo.

⁶ Leh êgao lu hruê Yêhôwa lač kơ kâo, “Kgŭ nao bĕ kơ êa krông Ơprat leh anăn lŏ mă čhiăm hyuă kơiêng kâo mtă leh kơ ih brei mdăp tinăn.”

⁷ Snăn kâo nao kơ êa krông Ơprat, klei lăn leh anăn mă čhiăm hyuă kơiêng mơ̆ng anôk kâo mdăp leh gơ̆. Nĕ anei, čhiăm hyuă kơiêng anăn brŭ leh, amâo lŏ thâo yua ôh.

⁸ Snăn Yêhôwa blŭ kơ kâo:

⁹ “Snei klei Yêhôwa lač, Msĕ snăn mơh Kâo srăng bi luč hĕ klei mgao phung Yuđa leh anăn klei mgao prŏng ƀuôn Yêrusalem.

¹⁰ Phung ƀuôn sang jhat anei hngah amâo čiăng hmư̆ ôh klei Kâo blŭ jing khăng kŏ tui hlue klei ai tiê diñu pô čiăng leh anăn tui hlue phung yang mkăn čiăng mă bruă leh anăn kkuh mpŭ kơ digơ̆, srăng jing msĕ si čhiăm hyuă kơiêng anei, amâo lŏ thâo yua ôh.

¹¹ Kyuadah msĕ si čhiăm hyuă kơiêng đuôm ti kơiêng sa čô mnuih, snăn mơh Kâo brei leh jih sang Israel leh anăn sang Yuđa đuôm hŏng Kâo, Yêhôwa lač, čiăng kơ diñu dưi jing phung ƀuôn sang Kâo, jing anăn Kâo mâo klei hing ang, jing klei bi mni Kâo, leh anăn jing klei guh kơang. Ƀiădah diñu amâo čiăng dôk hmư̆ Kâo ôh.”

Klei Bi Hmô kơ Čeh Bŏ Leh

¹² “Brei ih blŭ kơ diñu klei anei: ‘Snei Yêhôwa Aê Diê Israel lač, Tui si klei djŏ, jih jang čeh srăng bŏ hŏng kpiê.’ Tơdah diñu lač kơ ih, ‘Amâo djŏ hĕ hmei thâo leh tui si klei djŏ jih jang čeh srăng bŏ hŏng kpiê?’

¹³ Leh anăn brei ih lač kơ diñu, ‘Yêhôwa lač snei: Nĕ anei, Kâo srăng brei jih jang phung dôk hlăm čar anei kpiê ruă, phung mtao dôk gŭ ti jhưng mtao Y-Đawit, phung khua ngă yang, phung khua pô hưn êlâo, leh anăn jih jang phung dôk hlăm ƀuôn Yêrusalem.

¹⁴ Kâo srăng brei diñu bi drăm hdơ̆ng găp, phung ama hŏng phung anak êkei diñu, Yêhôwa lač. Kâo amâo srăng pap amâodah hơưi kơ diñu ôh, čiăng kơ Kâo dưi bi rai diñu.’ ”

Aê Diê Arưp Aram Mjing Phung Yuđa Mnă

¹⁵ Mđing knga hmư̆ bĕ, đăm jing mgao ôh, kyuadah Yêhôwa blŭ leh.

¹⁶ Brei bĕ klei guh kơang kơ Yêhôwa Aê Diê diih êlâo kơ Ñu bi truh klei mmăt kơ diih, êlâo kơ jơ̆ng diih têč hnêč ti dlông čư̆ êjai mmăt wai băk, leh anăn êjai diih duah klei mngač, Ñu bi mlih jing mmăt, leh anăn brei mâo klei mmăt kpal snăk.

¹⁷ Ƀiădah tơdah diih amâo čiăng dôk hmư̆ ôh, mngăt kâo srăng hia hŏng klei hgăm, kyua klei mgao diih; ală kâo srăng hia ênguôt snăk leh anăn rôč êa ală, kyuadah phung biăp Yêhôwa arăng srăng mă mjing mnă.

¹⁸ Lač kơ mtao leh anăn amĭ mtao mniê: “Dôk gŭ bĕ ti anôk luă gŭ, kyuadah đuôn mtao siam diih srăng lĕ mơ̆ng boh kŏ diih.”

¹⁹ Jih jang ƀuôn čar dhŭng arăng srăng kđăl, amâo mâo pô pŏk digơ̆ ôh; jih jang phung Yuđa arăng srăng suôt mơ̆ng čar mă ba kơ čar mkăn.

²⁰ Kngưr bĕ ală ih leh anăn dlăng, phung hriê mơ̆ng dưr. Ti anôk biăp arăng brei leh kơ ih, jih jang biăp siam ih?

²¹ Ya ih srăng lač tơdah Yêhôwa mdưm khua kiă kriê ih, phung anăn ih pô bi hriăm leh, phung mah jiăng ih mphŭn dô? Amâo djŏ hĕ klei ruă ktang srăng truh kơ ih, msĕ si sa čô mniê dôk đih pui?

²² Leh anăn tơdah ih lač hlăm ai tiê ih, “Si ngă klei anei truh kơ kâo lĕ?” jing kyuadah klei wê ih prŏng đei tơl arăng lưk hĕ knhal ao ih, leh anăn arăng ngă jhat kơ ih.

²³ Dưi mơ̆ sa čô Êthiôpi bi mlih klĭt ñu, amâodah êmông brêč bi mlih klei brung ñu? Snăn kăn diih dưi ngă jăk rei, phung mưng leh ngă klei jhat.

²⁴ “Kâo srăng kpuh mđung diih msĕ si kam angĭn kpuh mđung hlăm kdrăn tač.

²⁵ Anei yơh jing klei pioh kơ ih, kdrêč Kâo mkă leh kơ ih,” Yêhôwa lač, “Kyuadah ih wơr bĭt Kâo leh anăn knang leh kơ phung yang luar.

²⁶ Kâo pô srăng lưk knhal ao ih truh ti ƀô̆ mta ih, leh anăn arăng srăng ƀuh klei hêñ ih.

²⁷ Kâo ƀuh leh klei jhat ih ngă, klei ih tlĕ piu leh anăn tluh ƀô, klei knhông jhat ih ti kbuôn leh anăn hlăm hma. Knap mñai yơh kơ ih, Ơ ƀuôn Yêrusalem! Dŭm boh sui ih srăng dôk čhŏ mrŏ?”