Y-Yakơ 4 - Klei Aê Diê Blŭ 2015

Klei Ngă Mah Jiăng hŏng Lăn Ala

¹ Mơ̆ng kbiă hriê klei bi blah leh anăn klei bi mneh msao hlăm phung diih? Amâo djŏ hĕ klei anăn kbiă hriê mơ̆ng klei kđeh tluh dôk bi blah hlăm ai tiê diih?

² Diih čiăng kơ mnơ̆ng ƀiădah amâo mâo ôh snăn diih bi mdjiê mnuih; leh anăn diih tluh ktang kơ mnơ̆ng, ƀiădah amâo dưi mâo ôh snăn diih mâo klei bi msao leh anăn bi blah. Diih amâo mâo ôh, kyuadah diih amâo akâo ôh.

³ Diih akâo leh anăn amâo mă tŭ ôh, kyuadah soh diih akâo, čiăng yua mnơ̆ng anăn tui si kđeh diih čiăng.

⁴ Diih jing phung knhông yơh! Diih amâo thâo hĕ klei ngă mah jiăng hŏng lăn ala jing roh hŏng Aê Diê? Kyua anăn hlei pô čiăng jing mah jiăng hŏng lăn ala mjing ñu pô roh hŏng Aê Diê.

⁵ Diih mĭn kơ Klei Aê Diê Blŭ čih leh jing hơăi mang hĕ?, “Yang Mngăt Jăk, Aê Diê brei dôk hlăm drei khăp kơ drei tơl Ñu trih”

⁶ Ƀiădah Ñu brei klei pap lu hĭn; kyuanăn Klei Aê Diê Blŭ čih lač, “Aê Diê bi kdơ̆ng hŏng phung mgao, ƀiădah brei klei pap kơ phung luă gŭ.”

⁷ Snăn đup gưt bĕ kơ Aê Diê. Bi kdơ̆ng bĕ hŏng yang jhat, leh anăn ñu srăng đuĕ kbưi mơ̆ng diih.

⁸ Nao giăm bĕ kơ Aê Diê, leh anăn Ñu srăng hriê giăm kơ diih. Ơ phung soh, bi doh bĕ kngan diih. Ơ phung mâo klei mĭn dua nah, bi doh bĕ ai tiê diih.

⁹ Brei diih ênguôt, kơŭ kyăm leh anăn hia. Brei klei diih tlao bliư̆ jing klei kơŭ kyăm, leh anăn klei diih hơ̆k bliư̆ jing klei ênguôt hnĭng.

¹⁰ Luă gŭ bĕ diih pô ti anăp Khua Yang, leh anăn Ñu srăng bi mđĭ diih.

Răng Bĕ, Đăm Phat Kđi Ayŏng Adei Đăo Ôh

¹¹ Ơ phung ayŏng amai adei, đăm bi blŭ jhat hdơ̆ng diih ôh. Hlei pô blŭ jhat amâodah phat kđi kơ ayŏng adei ñu, blŭ jhat leh anăn phat kđi kơ klei bhiăn yơh. Ƀiădah tơdah ih phat kđi kơ klei bhiăn, ih amâo jing mnuih gưt kơ klei bhiăn ôh, ƀiădah jing pô phat kđi klei bhiăn.

¹² Knŏng Aê Diê Pô brei klei bhiăn leh anăn jing khua phat kđi, Ñu yơh dưi bi mtlaih leh anăn dưi bi rai. Ƀiădah hlei ih jing tơl ih phat kđi pô riêng gah ih?

Răng Bĕ, Đăm Bi Mni kơ Ih Pô Ôh

¹³ Bi kơ phung diih lač snei, “Hruê anei amâodah mgi hmei srăng nao kơ sa boh ƀuôn, dôk tinăn sa thŭn, mnia leh anăn ƀơ̆ng đĭ lu.”

¹⁴ Ƀiădah diih amâo thâo ôh ya klei srăng truh mgi. Ya klei hdĭp diih jing? Kyuadah diih jing msĕ si êa hŭl bi êdah bhiâo leh anăn luč hĕ mliêt.

¹⁵ Djŏ hĭn diih lač, “Tơdah Khua Yang čiăng, hmei srăng dôk hdĭp leh anăn hmei srăng ngă snei snăn.”

¹⁶ Ƀiădah ară anei diih bi mni kơ diih pô hlăm klei mĭn mgao. Jih klei bi mni snăn jing jhat.

¹⁷ Hlei pô thâo ngă jăk ƀiădah amâo ngă ôh, jing soh yơh.