Y-Ôsê 7 - Klei Aê Diê Blŭ 2015

¹ Tơdah Kâo čiăng bi hlao Israel, klei čhŏ mrŏ Êphraim leh anăn bruă ƀai phung Samari bi êdah leh; kyuadah diñu ngă hŏng klei luar, mnuih tlĕ mŭt hlăm lam, phung knĕ tlĕ ti tač.

² Ƀiădah diñu amâo mĭn ôh kơ Kâo hdơr kơ jih bruă jhat diñu. Ară anei bruă diñu wang jŭm diñu, bruă diñu dôk nanao ti anăp Kâo.

³ Diñu bi mơak kơ mtao hŏng klei ƀai diñu, leh anăn kơ phung khua hŏng klei mnêč luar diñu.

⁴ Jih jang diñu jing phung tlĕ piu; diñu jing msĕ si kpur hlơr pô ăm kpŭng mdei kuč pui êjai ñu kpit mmai kpŭng tơl gơ̆ buk leh.

⁵ Ti hruê knăm mtao drei, phung khua ruă duam kyua mnăm lu đei kpiê. Mtao mă kngan mbĭt hŏng phung mưč.

⁶ Diñu dôk kăp, ai tiê diñu jing hlơr msĕ si kpur; jih mlam pô ăm kpŭng diñu dôk pĭt, leh anăn ti aguah kpur trơ̆ng msĕ si êlah pui.

⁷ Jih jang diñu jing hlơr msĕ si kpur, leh anăn diñu kĕ ƀơ̆ng khua diñu. Jih jang phung mtao diñu lĕ leh; amâo mâo sa čô ôh hlăm phung diñu iêô wah lač kơ Kâo.

⁸ Êphraim bi lŭk diñu pô hŏng phung găp djuê mnuih, Êphraim jing sa klŏ ƀêñ ka arăng tuôm mbliư̆ ôh.

⁹ Phung tue bi luč klei ktang ñu, leh anăn ñu amâo thâo klei anăn ôh; ƀŭk kô̆ čăt leh ti boh kŏ ñu, leh anăn ñu amâo thâo klei anăn ôh.

¹⁰ Klei mgao Israel hưn bi kdơ̆ng hŏng ñu; ƀiădah diñu amâo lŏ wĭt kơ Yêhôwa Aê Diê diñu ôh, kăn duah ñu rei kyua jih klei anei dưn.

¹¹ Êphraim jing msĕ si sa drei mgăm mluk, amâo mâo klei thâo săng ôh. Diñu kwưh kơ čar Êjip, nao kơ čar Asiri.

¹² Êjai diñu đuĕ nao, Kâo srăng dăng ñuăl Kâo ti diñu, Kâo srăng bi lĕ diñu hlăm ñuăl msĕ si čĭm hlăm adiê; Kâo srăng mă diñu tơdah Kâo hmư̆ diñu bi phung.

¹³ Knap mñai yơh kơ diñu, kyuadah diñu klah đuĕ mơ̆ng Kâo! Kâo srăng bi rai diñu, kyuadah diñu bi kdơ̆ng leh hŏng Kâo! Kâo čiăng snăk bi tui diñu, ƀiăđah diñu blŭ klei luar kơ Kâo.

¹⁴ Diñu amâo ur ôh kơ Kâo mơ̆ng ai tiê diñu, ƀiădah diñu dôk krao ti jhưng pĭt diñu. Diñu bi kƀĭn mbĭt čiăng mâo mdiê leh anăn kpiê mrâo, diñu lui wir Kâo.

¹⁵ Wăt tơdah Kâo bi hriăm leh anăn bi ktang păl diñu leh, ăt diñu mĭn kơ klei jhat bi kdơ̆ng hŏng Kâo.

¹⁶ Diñu amâo wir kơ pô ti dlông hĭn ôh, diñu jing msĕ si hna amâo mnah kpă ôh. Khua diñu srăng êbuh hŏng đao gưm kyua êlah diñu blŭ mgao. Klei anăn srăng brei arăng djă djik djak kơ diñu hlăm čar Êjip.