Y-Ôsê 10 - Klei Aê Diê Blŭ 2015

¹ Israel jing sa phŭn boh kriăk ƀâo jăk siam, ñu mboh lu pioh kơ ñu pô. Tơdah boh ñu jing lu hĭn, lu hĭn mơh ñu mdơ̆ng knưl ngă yang; tui si klei čăt đĭ čar ñu, ñu mprăp bi siam hĭn mơh kmeh rup yang ñu.

² Ai tiê diñu bi mbha leh; ară anei diñu srăng gui klei diñu jing soh leh. Yêhôwa srăng klư̆ hĕ knưl diñu, leh anăn bi rai kmeh rup yang diñu.

³ Kyuadah ară anei diñu srăng lač, “Drei amâo mâo mtao ôh, kyuadah drei amâo huĭ mpŭ kơ Yêhôwa ôh. Bi sa čô mtao, ya klei ñu dưi đru drei?”

⁴ Diñu blŭ klei amâo yuôm ôh, hŏng klei kat asei hơăi mang diñu ngă klei bi mguôp. Snăn mơh klei phat kđi srăng čăt msĕ si rơ̆k jhat mâo êa kêč kam hlăm klông wăng kai.

⁵ Phung dôk hlăm čar Samari srăng ktư̆ yơ̆ng kyua rup êđai êmô Bet-Awen. Phung ƀuôn sang srăng kơŭ kyăm kơ rup yang anăn, leh anăn phung khua ngă yang ñu srăng čŏk hia kơ ñu, kyuadah klei guh kơang ñu luč leh.

⁶ Sĭt nik arăng srăng mdiăng ba rup anăn kơ čar Asiri, čiăng jing mnơ̆ng myơr kơ mtao Jarep. Arăng srăng bi hêñ Êphraim, leh anăn Israel srăng hêñ kơ mnêč diñu pô.

⁷ Čar Samari srăng rai tuč mbĭt hŏng mtao ñu, msĕ si kbhoh ti dlông êlah êa.

⁸ Anôk dlông ti Bet-Awen jing klei soh Israel, arăng srăng bi rai hĕ. Êruê ana leh anăn êruê hruĕ srăng čăt ti dlông knưl diñu, leh anăn diñu srăng lač kơ čư̆, “Guôm bĕ hmei?” leh anăn kơ kbuôn, “Lĕ bĕ ti dlông hmei!”

⁹ Dơ̆ng mơ̆ng klei truh ti Gibêa ih ngă soh leh, Ơ Israel; tinăn ih ăt dôk dơ̆ng. Amâo djŏ hĕ klei bi blah hmao phung ngă soh ti Gibêa?

¹⁰ Hruê Kâo čiăng, Kâo srăng bi kmhal diñu, leh anăn phung găp djuê mnuih srăng bi kƀĭn kdơ̆ng hŏng diñu, tơdah arăng kă diñu kyua klei soh diñu dua tal.

¹¹ Êphraim jing sa drei êmô ana êra arăng mđăo leh khăp juă mdiê; leh anăn Kâo srăng dưm knông ti dlông kkuê siam ñu; Kâo srăng gai Êphraim, Yuđa srăng kai, Yakôp srăng čaih lăn kơ ñu pô.

¹² Rah bĕ kơ diih pô klei kpă ênô, wiă bĕ boh mơ̆ng klei jăk; kai bĕ lăn diih lui êhŏng, kyuadah truh leh mông duah Yêhôwa, tơl kơ Ñu dưi hriê leh anăn tuh êa hjan klei kpă ênô ti dlông diih.

¹³ Diih rah leh klei wê, diih wiă leh klei amâo djŏ, diih ƀơ̆ng leh boh klei luar. Kyuadah diih knang leh kơ klei ktang diih pô, leh anăn kơ kahan lu diih.

¹⁴ Klei hao hao kơ klei bi blah srăng ngă kơ phung ƀuôn sang diih, leh anăn jih jang kđông mgang diih srăng rai, msĕ si Y-Salman bi rai ƀuôn Bet-Arbel hlăm hruê bi blah; arăng juă bi rai phung amĭ mbĭt hŏng phung anak diñu.

¹⁵ Snăn arăng srăng ngă kơ diih, Ơ Bêthel, kyua klei ƀai diih prŏng. Ti aguah ưm, arăng srăng bi mdjiê hĕ mtao Israel.