Y-Nahum 3 - Klei Aê Diê Blŭ 2015

¹ Knap mñai yơh kơ ƀuôn prŏng khăng tuh êrah, bŏ hŏng klei luar leh anăn bŏ hŏng mnơ̆ng plah mă, amâo mdei ôh klei ñu plah mă!

² Ênai giê hnuăt, ênai pông êdeh, ênai aseh mlung êran, ênai êdeh aseh êran!

³ Phung đĭ aseh hung kơ anăp, đao gưm leh anăn kju kmlăi ƀlir, lu lĭn mnuih djiê, lu kăm atâo, anôk asei mlei mnuih djiê amâo mâo knhal ôh, diñu têč hnêč êbuh kyua asei mlei djiê!

⁴ Jih klei anăn truh kyua klei mniê knhông ngă klei knhông amâo thâo yap ôh, bŏ hŏng klei siam leh anăn klei kƀăt mplư, pô lhiăr kơ phung găp djuê mnuih hŏng klei knhông ñu, leh anăn phung ƀuôn sang hŏng bruă mjâo ñu.

⁵ “Nĕ anei, Kâo bi kdơ̆ng hŏng ih,” Yêhôwa kơ phung kahan lač, “Leh anăn srăng lưk hĕ ao jhung ih truh ti ƀô̆ mta ih; leh anăn Kâo srăng brei phung găp djuê mnuih dlăng klei lưng mlŭn ih leh anăn phung ƀuôn ala mtao ƀuh klei ih hêñ.

⁶ Kâo srăng hwiê ti ih mnơ̆ng čhŏ mrŏ leh anăn ngă kơ ih hŏng klei bi êmut, leh anăn brei ih jing mnơ̆ng bi tlao kơ phung mnuih.

⁷ Jih jang phung dlăng kơ ih srăng đuĕ mơ̆ng ih leh anăn lač, ‘Rai leh yơh, ƀuôn Niniwơ, hlei srăng kơŭ kyăm kơ ñu?’ Ti anôk Kâo dưi duah phung bi juh ih?”

⁸ Ih jing jăk hĭn kơ ƀuôn Nô Amôn mơ̆, ƀuôn dôk ti krah êa krông Nil, mâo êa jŭm dar ñu? Êa ksĭ jing mnư̆ mgang ñu, leh anăn êa jing mnư̆ ƀuôn ñu.

⁹ Čar Êthiôpi leh anăn čar Êjip jing klei ktang ñu amâo mâo knhal ôh; čar Put leh anăn phung Libi jing phung đru ñu.

¹⁰ Ƀiădah arăng mđuĕ ba ñu leh, ñu nao jing mnă leh; phung anak điêt ñu arăng juă dlăr đơ điêt ti kang jih jang êlan dơ̆ng; arăng mđăo čiăng mâo phung mnuih ñu mpŭ, leh anăn jih jang phung êkei prŏng ñu arăng kă leh hŏng klei săng đai.

¹¹ Ih msĕ mơh srăng kpiê ruă, ih msĕ mơh srăng đuĕ dăp; ih srăng duah anôk kdê mơ̆ng pô roh.

¹² Jih jang kđông ih jing msĕ si ana boh hra hŏng boh ksă tal êlâo; tơdah arăng êyuh diñu, diñu luh hlăm ƀăng êgei pô ƀơ̆ng.

¹³ Nĕ anei, phung kahan ih jing msĕ si phung mniê ti krah ih. Ƀăng jang čar ih pŏk prŏng leh kơ phung roh ih; pui ƀơ̆ng leh giê kal diñu.

¹⁴ Djăt êa êlâo kơ arăng wang, bi kjăp bĕ kđông ih; nao bĕ kơ anôk lŭ, juă lŭ, djă mnơ̆ng mmai lăn čeh!

¹⁵ Tinăn pui srăng ƀơ̆ng ih, đao gưm srăng bi rai ih. Ñu srăng ƀơ̆ng ih msĕ si ktuôp ƀơ̆ng. Bi lar bĕ ih pô msĕ si ktuôp đrêč, bi lar bĕ ih msĕ si ktuôp kdăt!

¹⁶ Ih bi lar leh phung mnia ih lu hĭn kơ mtŭ hlăm adiê. Ƀiădah msĕ si ktuôp diñu bi rai čar, leh anăn phiơr đuĕ.

¹⁷ Phung gak ih jing msĕ si ktuôp kdăt, phung khua ih msĕ si êpul ktuôp đrêč gam ti mnư̆ hlăm hruê êăt — tơdah yang hruê ƀlĕ, diñu phiơr đuĕ, amâo mâo pô thâo ôh ti anôk diñu dôk.

¹⁸ Phung mgăt biăp ih dôk pĭt, Ơ mtao Asiri; phung khua ih dôk đih mdei. Phung ƀuôn sang ih bra đuĕ dôk hlăm čư̆, amâo mâo pô bi kƀĭn digơ̆ ôh.

¹⁹ Amâo mâo êa drao ôh kơ anôk ruă ih, anôk êka ih kjham tơl djiê. Jih jang phung hmư̆ klei mrâo mrang djŏ kơ ih pah kngan diñu kyua klei ih lĕ buh. Kyuadah hlei găp djuê mnuih ih amâo tuôm ngă ƀai ôh tui si ih khăng ngă nanao?