Y-Êsêkiêl 24 - Klei Aê Diê Blŭ 2015

Klei Bi Hriêng kơ Gŏ Dôk Ktơ̆ng

¹ Hlăm thŭn tal dua păn, mlan pluh, hruê pluh hlăm mlan anăn, Yêhôwa blŭ kơ kâo:

² “Ơ anak mnuih, čih bĕ mrô yap hruê anei, hruê anei yơh. Mtao Ƀaƀilôn dơ̆ng wang ngă leh kơ ƀuôn Yêrusalem hruê anei.

³ Blŭ sa klei bi hriêng kơ phung sang khăng bi kdơ̆ng, leh anăn lač bĕ kơ diñu: ‘Snei Yêhôwa Aê Diê lač: Drŏng bĕ gŏ, drŏng bĕ, tuh êa hlăm gŏ msĕ mơh;

⁴ dưm hlăm gŏ anăn lu kdrêč kđeh čĭm, jih jang kdrêč jăk, kơiêng leh anăn mra; bi bŏ gŏ hŏng klang jăk hĭn.

⁵ Mă ruah bĕ sa drei biăp jăk hĭn, dưm djuh ti gŭ gŏ anăn, tŭk čĭm anăn, tŭk wăt klang hlăm anăn mơh.

⁶ Kyuanăn snei Yêhôwa Aê Diê lač: Knap mñai yơh kơ ƀuôn tuh êrah, kơ gŏ bring jiă leh ti lam, leh anăn bring anăn amâo thâo doh ôh! Mă mơ̆ng anăn sa kdrêč sa kdrêč, đăm ngă klei mđăo ôh.

⁷ Kyuadah êrah ñu tuh leh ăt dôk ti krah ñu; ñu tuh êrah anăn ti dlông boh tâo kla, ñu amâo tuh ôh êrah anăn ti lăn čiăng dơr hĕ gơ̆.

⁸ Čiăng mčhur klei Kâo ngêñ, čiăng brei Kâo rŭ ênua, Kâo dưm leh ti dlông boh tâo kla êrah ñu tuh leh, čiăng kơ arăng amâo dưi guôm ôh êrah anăn.

⁹ Kyuanăn snei Yêhôwa Aê Diê lač: Knap mñai yơh kơ ƀuôn tuh êrah! Kâo msĕ mơh srăng dưm djuh lu.

¹⁰ Kăm lu djuh, kuč pui, tŭk bi jăk kđeh čĭm leh anăn tuh hra, amrêč leh anăn lui pui ƀơ̆ng klang.

¹¹ Leh anăn lŏ dưm gŏ êhŏng ti dlông hdăng, čiăng kơ gŏ anăn jing hlơr leh anăn kông dưi ngur, tơl mnơ̆ng čhŏ mrŏ ñu lik hĕ, leh anăn bring kbiă đuĕ jih.

¹² Hơăi mang yơh Kâo bi êmăn leh Kâo pô; bring kpal anei amâo kbiă ôh hŏng pui.

¹³ Bring anăn jing klei knhông čhŏ mrŏ ih. Kyuadah Kâo čiăng bi doh ih leh, ƀiădah ih amâo čiăng doh mơ̆ng klei čhŏ mrŏ ih ôh, ih amâo srăng lŏ jing doh ôh hơăi tơl Kâo bi hrăp leh klei Kâo ngêñ hlơr kơ ih.

¹⁴ Kâo gơ̆ Yêhôwa blŭ leh klei anăn; klei anăn srăng truh, Kâo srăng ngă klei anăn; Kâo amâo srăng kdŭn ti tluôn ôh, Kâo amâo srăng hơưi ôh, Kâo amâo srăng bi mlih klei mĭn ôh; Kâo srăng phat kđi ih tui si êlan ih êbat leh anăn klei ih ngă, Yêhôwa Aê Diê lač.’ ”

Mô̆ Y-Êsêkiêl Djiê

¹⁵ Msĕ mơh Yêhôwa blŭ kơ kâo snei:

¹⁶ “Ơ anak mnuih, nĕ anei Kâo giăm mă hĕ klei bi mơak kơ ală ih bhiâo riâo rit. Ƀiădah đăm brei ih kơŭ kyăm amâodah čŏk hia amâodah ƀlĕ êa ală ôh.

¹⁷ Krao bĕ, ƀiădah amâo kraih ôh; đăm kơŭ kyăm ôh kơ pô djiê. Păn kŏ ih leh anăn čŭt hdruôm jơ̆ng ih; đăm guôm hĕ kƀông ih ôh, kăn ƀơ̆ng kpŭng arăng čang rei.”

¹⁸ Snăn kâo blŭ kơ phung ƀuôn sang êjai aguah, leh anăn ti tlam mô̆ kâo djiê. Aguah mgi kâo ngă tui si klei Yêhôwa mtă leh kơ kâo.

¹⁹ Phung ƀuôn sang lač kơ kâo, “Ih amâo srăng hưn kơ hmei hĕ si tô hmô klei anei djŏ kơ hmei tơl ih ngă snăn?”

²⁰ Kâo lač kơ diñu, “Yêhôwa blŭ kơ kâo:

²¹ Lač bĕ kơ sang Israel, ‘Snei Yêhôwa Aê Diê lač: Nĕ anei, Kâo srăng bi čhŏ adŭ doh jăk Kâo, anôk myang diih, klei bi mơak kơ ală diih, leh anăn klei mngăt diih čiăng; leh anăn phung anak êkei leh anăn phung anak mniê diih, phung diih lui leh, srăng djiê hŏng đao gưm.

²² Diih srăng ngă tui si Kâo ngă leh: diih amâo srăng guôm kƀông diih ôh, kăn ƀơ̆ng rei kpŭng arăng čang.

²³ Diih srăng păn kŏ leh anăn čŭt hdruôm jơ̆ng; diih amâo srăng kơŭ kyăm amâodah čŏk hia ôh, ƀiădah diih srăng ênguôt hnĭng kơ klei wê diih pô leh anăn bi krao hdơ̆ng diih.

²⁴ Snăn yơh Y-Êsêkiêl srăng jing sa klei bi hmô kơ diih; tui si jih klei ñu ngă leh, snăn yơh diih srăng ngă. Tơdah klei anei truh, hlăk anăn diih srăng thâo kơ kâo pô jing Yêhôwa Aê Diê.’

²⁵ Bi ih, Ơ anak mnuih, hlăm hruê Kâo mă hĕ anôk myang mơ̆ng diñu, klei mơak leh anăn klei guh kơang diñu, klei ală leh anăn ai tiê diñu khăp, leh anăn msĕ mơh wăt phung anak êkei leh anăn phung anak mniê diñu,

²⁶ ti hruê anăn mơh sa čô tlaih đuĕ srăng truh kơ ih čiăng hưn klei mrâo mrang anei kơ ih.

²⁷ Ti hruê anăn ƀăng êgei ih srăng ha kơ pô tlaih đuĕ, ih srăng blŭ leh anăn amâo lŏ jing kmlô ôh. Snăn ih srăng jing sa mnơ̆ng bi hmô kơ diñu; leh anăn diñu srăng thâo kơ Kâo jing Yêhôwa.”